អ្នកលេងគុនចម្រុះកម្ពុជា ចាន់ រតនា ត្រូវប្រជែងជាមួយកីឡាករឥណ្ឌូណេស៊ី Rudy Agustian ក្នុងព្រឹត្តិការណ៍ ONE for Honor នៅទីក្រុងហ្សាកាតាប្រទេសឥណ្ឌូណេស៊ី នាថ្ងៃទី៣ ខែឧសភា ឆ្នាំ២០១៩ ខាងមុខ។ រតនា រំពឹងប្រើស្នៀតពិសេសផ្តួលដៃគូ ដែលរូបគេទទួលស្គាល់មានសមត្ថភាពខ្លាំង ឲ្យសន្លប់មុនទឹកទី៣។ ជាមួយគ្នានេះលោក ហ៊ុន ចាន់រាជ ក៏រំពឹងដែរថា រតនា នឹងប្រើភាពមានប្រៀបផ្នែកកម្លាំងស៊ុះ យកឈ្នះកីឡាករឥណ្ឌូណេស៊ីរូបនេះ ដើម្បីសងសឹកឲ្យមិត្តរួមជាតិ ខុន ស៊ីចាន់។
កីឡាករ ចាន់ រតនា ហាក់មានជំនឿចិត្តខ្ពស់ក្នុងការប្រកួតគុនចម្រុះនៅឥណ្ឌូណេស៊ី នាអំឡុងដើមខែឧសភា ខាងមុខ ដោយរូបគេរំពឹងថា នឹងអាចផ្តួលកីឡាករម្ចាស់ផ្ទះ Rudy Agustian ឲ្យសន្លប់មុនទឹកទី៣។ រតនា បានចាត់ទុកការយកឈ្នះមិត្តរួមជាតិកីឡាករ ខុន ស៊ីចាន់ របស់ Rudy នៅសិង្ហបុរីកាលពីអំឡុងខែកុម្ភៈ កន្លងទៅ វាជាចលករជំរុញទឹកចិត្តឲ្យរូបគេ ខិតខំព្យាយាមហ្វឹកហាត់អភិវឌ្ឍន៍សមត្ថភាព ដើម្បីយកឈ្នះកីឡាករម្ចាស់ផ្ទះរូបនេះ។
«សម្រាប់ការប្រកួត MMA គឺខ្ញុំចង់ផ្តួលគូប្រកួតឲ្យបានមុនទឹក ជាធម្មតាខ្ញុំតែងប្តូរបើមិនគេយើង។ ខ្ញុំតាំងចិត្ត១០០ភាគរយថា នឹងវាយឲ្យអស់ពីសមត្ថភាព និងព្យាយាមផ្តួលដៃគូ(Rudy Agustian)ឲ្យសន្លប់មុនទឹកទី៣»។ ការតាំងចិត្ត និងការបង្ហាញជំនឿចិត្តបែបនេះរបស់ ចាន់ រតនា ធ្វើឡើងក្នុងសន្និសីទសារព័ត៌មាន ត្រៀមមុនការចេញទៅប្រកួត កាលពីថ្ងៃទី២៧ ខែមេសា។
កីឡាការិនី នៅ ស្រីពៅ (ឆ្វេង) និងកីឡាករ ចាន់ រតនា
សម្រាប់ ចាន់ រតនា ការប្រកួតគុនចម្រុះ គឺត្រូវចេះសិក្សា និងស្ទង់ពីសមត្ថភាពរបស់គូប្រកួត បើគូប្រកួតមានសមត្ថភាព ឬកម្លាំងខ្សោយជាង គឺត្រូវវាយផ្តាច់ តែបើគូប្រកួតខ្លាំងជាង ឬប្រហាក់ប្រហែលត្រូវបើល្បិចកលវាយ ដើម្បីយកឈ្នះដោយពិន្ទុ។ ប៉ុន្តែបើទាបស្ទង់ដឹងថា គូប្រកួតខ្លាំងជាងដាច់ គឺត្រូវរកវិធីសាស្ត្រធ្វើយ៉ាងណាវាយឲ្យចប់ទឹក។
លោក ហ៊ុន ចាន់រាជ អគ្គលេខាធិការសហព័ន្ធកីឡាគុនចម្រុះកម្ពុជាមានជំនឿចិត្តខ្ពស់លើ រតនា ថានឹងអាចប្រើភាពមានប្រៀបរបស់ខ្លួនផ្តួលកីឡាករ Rudy Agustian ដើម្បីសងសឹកឲ្យមិត្តរួមជាតិ ខុន ស៊ីចាន់ ដែលចាញ់កីឡាកររូបនេះយ៉ាងឆាប់រហ័សកាលពីពេលកន្លងទៅ។ លោក ចាន់រាជ សង្កេតឃើញថា រតនា កីឡាករដែលឧស្សាហ៍ព្យាយាម និងប្រឹងប្រែងហ្វឹកហាត់ ហើយរូបគេក៏ជាកីឡាករក្តីរំពឹង ដែលអាចឈានទៅប្រកួតដណ្តើមខ្សែក្រវាត់ប្រចាំព្រឹត្តិការណ៍ ONE សម្រាប់កម្ពុជាផងដែរ។
លោក ហ៊ុន ចាន់រាជ អគ្គលេខាធិការសហព័ន្ធកីឡាគុនចម្រុះកម្ពុជា
«ខ្ញុំរំពឹងខ្លាំងលើបង រតនា ដោយសារលើកនេះ គាត់ប្រឹងប្រែងហ្វឹកហាត់ខ្លាំងជាងមុន ហើយដៃគូរបស់គាត់ក៏ខ្លាំងដូចគ្នា។ តែខ្ញុំរំពឹងថា គាត់នឹងទទួលបានលទ្ធផលល្អនៅលើកនេះ ព្រោះគាត់មានប្រៀបលើគូប្រកួតរបស់គាត់ ផ្នែកកម្លាំងស៊ុះ និងភាពរហ័សរហួន។ ជើង រតនា គាត់ទាត់ប្រយោលរហ័សមែនទែន ដូច្នេះបើគូប្រកួតមិនអាចចាប់គាត់បាន នឹងមានការលំបាក»។ នេះជាការលើកឡើងរបស់លោក ហ៊ុន ចាន់រាជ ពេលផ្តល់បទសម្ភាសដល់សារព័ត៌មានថ្មីៗ។
កីឡាករ ចាន់ រតនា បានមើលឃើញពីចំណុចរបស់ដៃគូ គឺរូបគេពូកែខាងចាប់ផ្តួលគូប្រកួត ឃ្លេ និងគ្រប់គ្រងស្ថានការណ៍បានល្អមិនងាយរើបម្រះរួច ពេលរូបគេមានឱកាសឡើងជិះលើកីឡាករណាម្នាក់។ ទន្ទឹមនឹងចំណុចខ្លាំង ចាន់ រតនា ក៏មើលឃើញពីចំណុចខ្សោយកីឡាករ Rudy ផងដែរ ដោយរូបគេជាកីឡាករមិនចេះឈរវាយប្រយោល និងឈរវាយជាមួយគូប្រកួត។ បើសិនអាចគ្រប់គ្រងការចាប់ផ្តួល ឬឃ្លេ និងវាយប្រយោលឲ្យបានច្រើន រតនា មានភាគរយខ្ពស់ក្នុងការយកឈ្នះ Rudy Asustian។
កីឡាករ ចាន់ រតនា ត្រូវតតាំងជាមួយកីឡាករម្ចាស់ផ្ទះ Rudy Agustian ក្នុងព្រឹត្តិការន៍ ONE for Honor នៅថ្ងៃទី៣ ខែឧសភា ឆ្នាំ២០១៩ នាទីក្រុងហ្សាកាតា ប្រទេសឥណ្ឌូណេស៊ី។ កីឡាការិនី នៅ ស្រីពៅ ត្រូវប្រជែងជាមួយកីឡាការិនីម្ចាស់ផ្ទះ Priscilla Hertati Lumban Gaol ក្នុងព្រឹត្តិការណ៍នេះផងដែរ៕