កីឡាជាតិ
ជាតិ
សម្តេច ហ៊ុន សែន ផ្តល់ថវិកា៨០លានរៀលលើកទឹកចិត្តដល់ជ័យលាភីមេដាយមាសយុវជនអាស៊ី លោក យី វាសនា (កណ្តាល) លោក យី សុភក្ត្រា (ឆ្វេង) និងកីឡាករ យ៉ុន មួយ, រូបភាពពី NOCC
× សម្តេចនាយករដ្ឋមន្ត្រី ហ៊ុន សែន ផ្តល់ថវិកាចំនួន៨០លានរៀល ដើម្បីលើកទឹកចិត្តដល់កីឡាករ និងគ្រូបង្វឹក ដែលដណ្តើមបានមេដាយមាស១ ពីការប្រកួតហែលទឹកដណ្តើមពានរង្វាន់យុវជនអាស៊ីនៅសាធារណៈរដ្ឋកូរ៉េកាលពីចុងឆ្នាំ២០១៨ នៅព្រឹកថ្ងៃទី៣ ឧសភានេះ។
កីឡាករហែលទឹក យ៉ុន មួយ និងគ្រូបង្វឹក យី សុភក្ត្រា ដែលដណ្តើមបានមេដាយមាស១គ្រឿង ពីការប្រកួតដណ្តើមជើងឯកយុវជនអាស៊ីនៅប្រទេសកូរ៉េ កាលពីអំឡុងខែវិច្ឆិកា ឆ្នាំ២០១៨ ទទួលបានថវិកាលើកទឹកចិត្តម្នាក់៤០លានរៀល ពីសម្តេចនាយករដ្ឋមន្ត្រី ហ៊ុន សែន។ ថវិកាទាំងនេះ ត្រូវបានលោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា ប្រគល់ជូនម្ចាស់ជ័យលាភីនិងគ្រូបង្វឹករួចរាល់ហើយ នៅព្រឹកថ្ងៃទី៣ ខែឧសភា ឆ្នាំ២០១៩។
លោក យី វាសនា ប្រគល់ថវិកាជូនកីឡាករ យ៉ុន មួយ
លោក យី វាសនា ចាត់ទុកការបណ្តុះបណ្តាល និងប្រកួតជើងឯកយុវជនរបស់កូរ៉េ ជាការលើកទឹកចិត្តមួយដ៏សំខាន់ក្នុងការជំរុញឲ្យកីឡាករមានទឹកចិត្តខិតខំប្រឹងប្រែងហ្វឹកហាត់កាន់តែខ្លាំង។ ជាមួយគ្នានេះ លោក ជំរុញឲ្យកីឡាករទាំងជ័យលាភីនិងមិនលាភីទាំងអស់ បន្តខិតខំប្រឹងប្រែងហ្វឹកហាត់ពង្រឹងសមត្ថភាព ដើម្បីត្រៀមប្រជែងក្នុងព្រឹត្តិការណ៍ ASEAN Para Game នៅហ្វីលីពីនឆ្នាំនេះ ។ជាពិសេសនៅឆ្នាំ២០២៣ ដែលកម្ពុជាធ្វើជាម្ចាស់ផ្ទះព្រឹត្តិការណ៍នេះ។
លោក យី វាសនា ប្រគល់ថវិកាជូនលោក យី សុភក្ត្រា
មេដាយមាសរបស់កីឡាករ យ៉ុន មួយ ទទួលបានក្នុងអំឡុងពេលគណៈកម្មាធិការជាតិប៉ារ៉ាឡាំពិកកម្ពុជា បញ្ជូនរូបគេរួមជាមួយកីឡាករ ឈឿន កុសល ដែលមានលោក យី សុភក្ត្រា ប្រធានប្រតិភូទៅហ្វឹកហាត់ពង្រឹងបច្ចេកហែលទឹកនៅសាធារណៈរដ្ឋកូរ៉េ ចន្លោះពីថ្ងៃ៣០ ខែតុលា ដល់ថ្ងៃទី៤ ខែវិច្ឆិកា ឆ្នាំ២០១៨។
សម្រាប់ការប្រកួតដែលមាន១៤ប្រទេសចូលរួមត្រូវបានបែងចែកជាបីក្រុម ដោយកីឡាករ យ៉ុន មួយ ស្ថិតនៅក្នុងក្រុមទី១ ខណៈកីឡាករ ឈឿន កុសល ស្ថិតក្នុងក្រុមទី២។ ជាលទ្ធផលក្រុមទី១ទទួលបានចំណាត់ថ្នាក់លេខ១ និងក្រុមទី២ទទួលបានលេខ២ និងក្រុមលេខ៣ទទួលបានលេខ៣។ ប៉ុន្តែដោយ យ៉ុន មួយ ជាកីឡាករហែលទឹកមានល្បឿនជាងគេ ទើបគណៈកម្មការរៀបចំការប្រកួតសម្រេចផ្តល់មេដាយដល់រូបគេ។ ចំណែកកីឡាករ ឈឿន កុសល ទោះបីស្ថិតក្នុងក្រុមលេខ២ក៏ដោយ តែរូបគេមិនទទួលបានមេដាយប្រាក់នោះទេ ដោយសាររូបគេចាញ់ល្បឿនកីឡាករថៃ។ សូមបញ្ជាក់ថា ការប្រកួតនេះក្នុង១ក្រុមទទួលបានមេដាយតែមួយប៉ុណ្ណោះ គឺមាស ប្រាក់ និងសំរឹទ្ធ៕
Tag:
ហែលទឹក
យី វាសនា
ប៉ារ៉ាឡាំពិក
© រក្សាសិទ្ធិដោយ thmeythmey.com