ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
កីឡាជាតិ
ជាតិ
ការងារព័ត៌មានកីឡាសម្រាប់អ្នកកាសែតស្រី ប្រៀបដូចជា Startup ក្នុងអាជីព
04, May 2019 ,
1:13 pm
រូបភាព
×
ដោយ:
អុឹង ចំរើន (Ung Chamroeun)
មានដូចជា លក្ខណ៍ សុខភារី លីហ្សា! នៅពេលសាកសួរមិត្តរួមអាជីពទាក់ទងនឹងស្ត្រីក្នុងវិស័យព័ត៌មានផ្នែកកីឡា ភាគច្រើនរាប់មិនរំលងនារីទាំងបីនាក់នេះឡើយ ហើយក៏ពិបាករកនឹកឃើញអ្នកផ្សេងខ្លាំងណាស់។ ព័ត៌មានកីឡាជាពិភពផ្តាច់មុខរបស់បុរស? អ្នកយកព័ត៌មានស្រស់ស្អាតទាំងបីដែលមានកំណើតនៅបណ្តាខេត្តតំបន់ពាយ័ព្យនៃប្រទេសកម្ពុជា ព្យាយាមបង្ហាញថា មិនត្រឹមត្រូវឡើយ ស្ត្រីក៏អាចធ្វើបានផងដែរ។ សម្រាប់ជំនាញផ្សេងដូចជា សេដ្ឋកិច្ច នយោបាយ សង្គម អ្នកកាសែតស្រីមានគំរូជាច្រើន ប៉ុន្តែសម្រាប់ព័ត៌មានកីឡា លក្ខណ៍ សុខភារី និងលីហ្សា ប្រៀបបីដូចជាអ្នកដែលបានចាប់ផ្តើមដំបូង ដូច្នេះ ពួកគេត្រូវមានការប្រឹងប្រែងខ្ពស់ដើម្បីបានជោគជ័យក្នុងអាជីព។
«ហត់តែសប្បាយ ហើយបានស្គាល់មនុស្សច្រើនក្នុងវិស័យកីឡា ព្រោះអ្វី? ក៏ព្រោះតែការស្រឡាញ់អាជីពមួយនេះ»។ សុខ លក្ខណ៍ បង្ហាញពីជំហរទៅមុខក្នុងអាជីពជាអ្នកយកព័ត៌មានកីឡា ដែលខ្លួនប្រឡូកនារយៈពេលជាង៨ឆ្នាំកន្លងមក។
មានកំណើតនៅខេត្តបាត់ដំបង សុខ លក្ខណ៍ ដែលប្រើឈ្មោះហ្វេសប៊ុកថា «A Lex A Lex» បានឆ្លងកាត់ដំណើរដ៏យូរ មុននឹងក្លាយជាអ្នកព័ត៌មានកីឡាម្នាក់ប្រចាំទូរទស្សន៍ CNC ជាពិសេសមានឱកាសបំពេញការងារជាមួយក្រុមបុរសដ៏ពោរពេញដោយបទពិសោធន៍ដូចជា លោក ស៊ីថូ ណាថាន់ លោក ថោង ប្រសើរ និងលោក យ៉េន ម៉ៅ ជាដើម។
«ព័ត៌មានកីឡាពិតជាពិបាកសម្រាប់មនុស្សស្រី ប៉ុន្តែបើយើងប្រឡូកឲ្យដល់ទៅ មិនមានអ្វីជាឧបសគ្គនោះឡើយ»។ នេះជាការចូលរួមយោបល់របស់កញ្ញា សួង សុខភារី ដែលចាត់ទុកព័ត៌មានកីឡាជាអាហារប្រចាំថ្ងៃរបស់ខ្លួន។
សុខភារី ជាមួយអតីតមិត្តរួមក្រុមការងារព័ត៌មានកីឡារបស់ខ្លួននៅ CNC
មានកំណើតនៅទឹកដីខេត្តបន្ទាយមានជ័យដែលស្ថិតក្នុងចម្ងាយជាង៤០០គីឡូម៉ែត្រពីរាជធានីភ្នំពេញ កញ្ញា អេង លីហ្សា មិនខុសពីរៀមច្បងទាំងពីរឡើយ។ គាត់បានប្រែក្លាយពីអ្នកស្រឡាញ់កីឡា អ្នកគាំទ្រកីឡា កីឡាការិនីបាល់ទះ និងជិះកង់ រហូតដល់ក្លាយជាពិធីការិនី (MC) ផ្នែកកីឡានៅទូរទស្សន៍ BTV។
មិននៅទើត្រឹមនេះឡើយ លីហ្សា ដាក់គោលដៅច្បាស់លាស់របស់ខ្លួនដើម្បីឲ្យក្លាយជាអ្នកសារព័ត៌មានកីឡាដ៏លេចធ្លោរម្នាក់។ លីហ្សា តែងតែសុំយោបល់ និងរៀនសូត្រពីរៀមច្បងជំនាញកីឡានៅ BTV ដូចជាលោក គង់ ហួន លោក នាង សុភាវុធ និងលោក ង៉ែត វុទ្ធី ជាដើម។
ផ្សងព្រេងក្នុងអាជីព ដោយមិនមាននិមិត្តរូបច្បាស់លាស់
បើរំលឹកពីការងារដំបូងក្នុងវិស័យព័ត៌មានផ្នែកកីឡា អ្នកនាង សុខ លក្ខណ៍ ចាប់ផ្តើមក្នុងនាមជាអ្នកហាត់ការនៅវិទ្យុរបស់កាសែតកោះសន្តិភាព មុននឹងចុះយកព័ត៌មានកីឡាដោយដើរតាមរៀមច្បងជាបុរស។
សុខ លក្ខណ៍ នាពេលសម្ភាសដឹកនាំកីឡាតេក្វាន់ដូ ITF ក្នុងកម្មវិធី Sports Corner របស់ CNC
ដោយឡែក កញ្ញា អេង លីហ្សា មានឱកាសប្រកបអាជីពនៅទូរទស្សន៍ BTV ដោយសារតែមានការណែនាំពីសំណាក់រៀមច្បងម្នាក់ ដែលបានស្គាល់គ្នាតាមរយៈព្រឹត្តិការណ៍ជិះកង់។
និមិត្តរូបជានារី? សម្រាប់ សុខ លក្ខណ៍ និងសុខភារី គ្មាននោះឡើយ។ ពួកគាត់បានចាត់ទុកលោក ម៉ា សេរី អតីតគ្រប់គ្រងព័ត៌មានដ៏ល្បីល្បាញនៅទូរទស្សន៍ប៉ុស្តិ៍លេខ៥ និង CNC ជាគ្រូដើមរបស់ខ្លួន និងជាអ្នកដែលជំរុញទឹកចិត្តពួកគាត់ ឲ្យស្រឡាញ់អាជីពនេះកាន់តែខ្លាំងឡើង។
សម្រាប់លីហ្សា វិញ ហាក់ទទួលបានគំរូភាពមួយចំនួនពី សុខ លក្ខណ៍ដែលជារៀមច្បង។ «មុនចូល BTV ខ្ញុំក៏ធ្លាប់តាមដានមើលបង លក្ខណ៍ នៅ CNC ផងដែរ។ ក្រៅពីនេះ គឺការព្យាយាមខ្លួនឯង និងរៀនសូត្រពីបងៗបុរស»។ នេះជាការបញ្ជាក់របស់លីហ្សា។
ហេតុអ្វីបានជាមិនសូវមានអ្នកកាសែតកីឡាជាស្ត្រី?
ព័ត៌មានកីឡានៅកម្ពុជាស្ថិតក្នុងដំណើរផ្លូវដ៏វែងឆ្ងាយដើម្បីក្លាយខ្លួនជាចំណីព័ត៌មានអាទិភាព។ រយៈពេលចុងក្រោយនេះ កីឡាបាល់ទាត់ និងព្រឹត្តិការណ៍កីឡាផ្សេងៗ ជាពិសេសការប្រកួតថ្នាក់តំបន់ដែលមានកម្ពុជាចូលរួម បានធ្វើឲ្យចំនួនអ្នកយកព័ត៌មានកីឡាមានកំណើនដ៏គួរឲ្យកត់សម្គាល់ ប៉ុន្តែចំនួនស្ត្រីនៅមានតិចតួចនៅឡើយ។
តាមពិតទៅនេះ ជានិន្នាការសកលទៅហើយ។ Lesley Visser ស្ត្រីដំបូងរបស់អាមេរិក ដែលបានក្លាយជាអ្នកជំនាញវិភាគកីឡា NFL តាមទូរទស្សន៍ គូសបញ្ជាក់ថា អ្នកយកព័ត៌មាននារីជាទូទៅ ហាក់មិនសូវជាទទួលបាននូវការស្វាគមន៍ពីសំណាក់គ្រូបង្វឹកសម្រាប់ការផ្តល់បទសម្ភាសនោះឡើយ។ ដោយរាល់ការសម្ភាសផ្សេងៗ ភាគច្រើនឃើញតែនារីអមជាមួយបុរសប៉ុណ្ណោះ។
នាង Erin Molan អ្នករាយការណ៍ព័ត៌មានកីឡាម្នាក់ប្រចាំវិទ្យុ Kiis FM នៅអាមេរិក បានលាឈប់ពីការងារ ដោយសារការចំអកឡកឡឺយ ដោយអ្នកខ្លះសួរនាងថា តើនាងធ្លាប់មានទំនាក់ទំនងផ្លូវភេទជាមួយកីឡាករប៉ុន្មាននាក់ក្រោយសម្ភាសរួច។ Erin បានប្រាប់ news.com.au ថា ការប្រឡូកអាជីពរបស់នាងតែងតែរងនូវការសើចចំអកជាពិសេស Comment នៅលើបណ្តាញសង្គម Twitter ដោយអ្នកខ្លះថា នាងគួរតែចូលជើងក្រានវិញល្អជាង។
ងាកទៅ Erin Riley ដែលសរសេរព័ត៌មានកីឡាឲ្យ The Guardian និង Fairfax ឯណោះវិញ ក៏ធ្លាប់រងនូវការវាយប្រហារផងដែរ បន្ទាប់ពីនាងលើកឡើងពីភាពស៊ិចស៊ីរបស់អ្នកគាំទ្រនាព្រឹត្តិការណ៍ប្រកួតកីឡាមួយកាលពីឆ្នាំ២០១៤។ អ្នកខ្លះថា នាងមិនចេះកីឡា ហើយគួរតែសម្លាប់ខ្លួន ឬថតរូបស៊ិចស៊ីវិញ ហើយអ្នកខ្លះថែមទាំងគំរាមសម្លាប់នាងទៀត។
អ្នកចូលចិត្តកីឡាមួយចំនួនក៏មិនបានផ្តល់ឱកាស ឬលើកទឹកចិត្តស្ត្រីនោះដែរ ដោយអ្នកខ្លះនិយាយដោយជ្រេញថា ហេតុអ្វីឲ្យមនុស្សមិនចេះកីឡាសោះមកនិយាយ។
ភាពស៊ិចស៊ីទាក់ទាញជាងជំនាញអាជីព
កីឡាករគ្រីតឃីតម្នាក់របស់អូស្ត្រាលី ទទួលរងនូវការរិះគន់យ៉ាងខ្លាំង នៅពេលដែលគេនិយាយទៅកាន់អ្នកសារព័ត៌មានកីឡាស្រីម្នាក់ថា ៖ «ខ្ញុំចង់ឲ្យនាងសម្ភាស ហេតុដូច្នេះហើយបានជាខ្ញុំមកទីនេះ។ ខ្ញុំចង់ឃើញភ្នែករបស់នាងជាលើកដំបូង ពិតជាអស្ចារ្យណាស់»។
ទាក់ទងនឹងស្ត្រីក្នុងព័ត៌មានកីឡាវិញ អ្នកកាសែតដូចគ្នា ក៏ហាក់ដូចជាមិនសូវមើលឃើញនោះដែរ កន្លងមក គេមិនសូវឃើញអត្ថបទដែលសរសើរពីការងាររបស់អ្នកទាំងនោះឡើយ ប៉ុន្តែបែរជាមានអត្ថបទដ៏សម្បូរបែបទាក់ទងនឹងរូបសម្ផស្ស។
ចំណងជើងដែលគេតែងតែឃើញទាក់ទងអ្នកយកព័ត៌មានកីឡា ដូចជា «អ្នកកាសែតកីឡាស្ត្រីដ៏ស៊ិចស៊ីទាំង២០ប្រចាំឆ្នាំ២០១៩ »(20 Sexiest Sports Reporters of 2019) ឬ «អ្នករាយការណ៍ព័ត៌មាននារីដ៏ស៊ិចស៊ីជាងប្រចាំតំបន់ជាដើម»។
Maybe I'm More Than That...
សុខភារី ហួសចិត្តយ៉ាងខ្លាំង នៅពេលមនុស្សមួយចំនួននាំគ្នាសើចចំអកចំពោះការសម្រេចចិត្តរបស់ខ្លួន តាមរយៈការជ្រើសរើសជំនាញព័ត៌មានផ្នែកកីឡា ក្រោយបញ្ចប់ការសិក្សានៅមហាវិទ្យាល័យ។
«រៀនបានប៉ុណ្ណឹងហើយ ហេតុអ្វីបានជាមកធ្វើព័ត៌មានកីឡាទៅវិញ?»។ សំណួរនេះ តែងតែលឺពេញត្រចៀករបស់កញ្ញាអ្នកខេត្តសៀមរាប។ ពិតណាស់ស្ត្រីយកព័ត៌មានកីឡាមិនអាចទៅសម្ភាសកីឡាករ ជាពិសេសកីឡាករបាល់ទាត់នៅបន្ទប់សម្លៀកបំពាក់ក៏ដោយ ប៉ុន្តែពួកគេក៏មានលក្ខខណ្ឌអនុគ្រោះមួយចំនួនដែលខាងបុរសមិនអាចធ្វើបាននោះដែរ។
អេង លីហ្សា និងក្រុមការងារព័ត៌មានកីឡារបស់ខ្លួននៅទូរទស្សន៍ BTV
«គេចូលចិត្តហៅនាងខ្ញុំថាស្រីស្អាត... តើគេមានគិតថាខ្ញុំក៏ស្រីឆ្លាត... Maybe I’m more than that...»។ មិនខុសពីអត្ថន័យបទចម្រៀង «ស្រីស្អាត» ដែលជាការបកស្រាយរួមគ្នារបស់កញ្ញា សុខ ពិសី និងឡរ៉ា ម៉ម នោះឡើយ កញ្ញា លីហ្សា និង អ្នកនាង លក្ខណ៍ ចង់ទទួលបានការកោតសរសើរលើចំណេះជំនាញ ជាជាងរូបសម្ផស្សរបស់ខ្លួន។
«ទោះភាគច្រើនខ្ញុំចុះទៅយកព័ត៌មានតាមខេត្ត ដោយមានតែស្រីម្នាក់ឯងក៏ដោយ ប៉ុន្តែខ្ញុំតែងតែព្យាយាមធ្វើឲ្យបានល្អ ពោលគឺតាំងចិត្តឲ្យដូចអ្នកកីឡា ដើម្បីរាយការណ៍ព័ត៌មាន»។ នេះជាការអះអាងរបស់ សុខ លក្ខណ៍ ដែលចូលចិត្តសរសរភ្ជាប់ព័ត៌មានកីឡា ទៅនឹងទេសចរណ៍។
សម្រាប់ លីហ្សា ការផ្តល់តម្លៃលើការងារនេះ ហើយ ដែលបានកាត់បន្ថយការនឹកផ្ទះរបស់ខ្លួន។ «វាជាការផ្សងព្រេងមួយសម្រាប់ខ្ញុំ ប៉ុន្តែជាច្រើនបានផ្តល់តម្លៃ ដូច្នេះខ្ញុំរីករាយយ៉ាងខ្លាំងចំពោះការងារនៅ BTV ហើយខ្ញុំនឹងព្យាយាមដើម្បីអាចឈានទៅផលិតព័ត៌មានកីឡាដោយខ្លួនឯង»។
នៅសម័យអ៊ីនធ័រណិតនេះ តំបន់ពាយ័ព្យ សៀមរាប បាត់ដំបង និងបន្ទាយមានជ័យ មិនឆ្ងាយពីរាជធានីភ្នំពេញ។ សុខ លក្ខណ៍ សុខភារី និងលីហ្សា ទាក់ទងជាប្រចាំទៅកាន់គ្រួសាររបស់ខ្លួន។ សម្រាប់អ្នកទាំងបី អ្នកគាំទ្រដ៏ស្មោះស្ម័គ្របំផុត គឺ «អ្នកម្តាយ» ដែលតែងតែលើកទឹកចិត្ត និងគាំទ្រជានិច្ច៕
សុខភារី និងមិត្តរួមអាជីពកន្លងមក
លីហ្សា ពីកីឡាការិនីជិះកង់ ក្លាយជាកាន់កម្មវិធីកីឡា និងជាអ្នកយកព័ត៌មានកីឡា
លីហ្សា ថតរូបអនុស្សាវីយ៍ជាមួយលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា
សុខ លក្ខណ៍ និងលោក ស៊ីថូ ណាថាន់ នាពេលសម្ភាសក្រុមកីឡាករប្រដាល់កម្ពុជា
សុខភារី ជាមួយម្ចាស់មេដាយមាសអាស៊ានហ្គេម (Asian Games) ផ្នែកតេក្វាន់ដូ ស៊ន សៀវម៉ី
សុខ លក្ខណ៍ ឈរនៅពីមុខផ្ទាំងកម្មវិធីព័ត៌មានកីឡារបស់ខ្លួន
សុខ លក្ខណ៍ ចុះទៅយកព័ត៌មានផ្ទាល់នៅខេត្តសៀមរាប និងថតជាមួយប្រធានក្លិបបាល់ទាត់អង្គរថាយហ្គឺរ
ជ័យជម្នះរបស់ក្រុមកីឡាករ កីឡាការិនី ក៏ជាជោគជ័យរបស់អ្នកកាសែតកីឡាដែរ
កាលពីប៉ុន្មានឆ្នាំមុន សុខភារី សកម្មយ៉ាងខ្លាំងក្នុងការចុះទៅយកព័ត៌មានកីឡាដោយផ្ទាល់
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
សារព័ត៌មាន
អ្នកកាសែតស្រី
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
2 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
3 ថ្ងៃ
សមត្ថកិច្ចខេត្តកែប ធ្វើកិច្ចសន្យាអាជីវករ២រូប ឱ្យឈប់ទារលុយពីភ្ញៀវទេសចរដែលអង្គុយតាមឆ្នេរ
1 សប្តាហ៍
«បុរាណ»និង«បូរាណ» មានអត្ថន័យដូចគ្នា
1 សប្តាហ៍
«ភេរវកម្ម» មិនមែន «ភេវរកកម្ម» ឬ «ភារវកម្ម» ឡើយ
5 ថ្ងៃ
អត្ថបទពេញនិយមបន្ថែម