ជាតិ
សេដ្ឋកិច្ច
ក្រសួងទេសចរណ៍ រំពឹងទទួលបានភ្ញៀវទេសចរជប៉ុនជាង ២៣ ម៉ឺននាក់ ក្នុងឆ្នាំ២០១៩
×![]()
ដោយ: ភួង វ៉ាន់ថា
កម្ពុជានឹងទទួលបានភ្ញៀវទេសចរជប៉ុនជាង ២៣ម៉ឺននាក់ក្នុងឆ្នាំ២០១៩នេះ ក្រោយមានការគាំទ្រជាថ្មីពីរដ្ឋាភិបាលជប៉ុន។ រដ្ឋមន្ត្រីការបរទេសជប៉ុន បានប្ដេជ្ញាថានឹងជំរុញលំហូរទេសចរ និងវិនិយោគិនជប៉ុន មកកាន់ប្រទេសកម្ពុជាបន្ថែមទៀត។ 
លោក kenji Yamada អនុរដ្ឋមន្ត្រីនៃក្រសួងការបរទេសជប៉ុន បានថ្លែងក្នុងកម្មវិធីពិព័រណ៍កម្ពុជាឆ្នាំ២០១៩ នៅទីក្រុងតូក្យូ កាលពីថ្ងៃទី៣ ខែឧសភា ឆ្នាំ២០១៩ថា ប្រទេសកម្ពុជា ជាប្រទេសដែលឱកាសវិនិយោគដ៏ទាក់ទាញប្រកបដោយសក្តានុពល និងសំបូរដោយកម្លាំងពលកម្មវ័យក្មេង។ ដោយសារតែប្រទេសទាំងពីរ មានកិច្ចសហប្រតិបត្តិការដ៏យូរលង់ហើយនោះ រដ្ឋាភិបាលជប៉ុន ប្ដេជ្ញាថានឹងជំរុញលំហូរទេសចរ និងវិនិយោគិនជប៉ុនមកប្រទេសកម្ពុជាឲ្យកាន់តែច្រើនថែមទៀត។
ជាមួយគ្នានេះលោក Masahiro Imamura ប្រធានសម្ព័ន្ធមិត្តភាពសភាជប៉ុន-កម្ពុជា បាននិយាយថា ជើងហោះត្រង់រវាងតូក្យូ -ភ្នំពេញ មានដំណើរការល្អ ដែលបានចូលរួមចំណែកក្នុងការពង្រឹងទំនាក់ទំនងទ្វេភាគីជប៉ុន -កម្ពុជា កាន់តែខ្លាំងក្លាថែមទៀត។
លោកបាននិយាយថា៖«ប្រទេសកម្ពុជាបានឆ្លងកាត់ប្រវត្តិសាស្ត្រដ៏ក្រៀមក្រំ ហើយទទួលការអភិវឌ្ឍរឹងមាំនាពេលបច្ចុប្បន្ន ហើយប្រទេសជប៉ុនបាននិងកំពុងជំរុញនូវការបង្កើតឱកាសមួយសម្រាប់ជនជាតិបរទេសដើម្បីរៀន សូត្រឬក៏ធ្វើការ ហើយយើងមានសេចក្តីរីករាយណាស់ប្រសិនបើជនជាតិខ្មែរ មករៀន ឬមកធ្វើការ បានទទួលចំណេះដឹង ក៏ដូចជាបទពិសោធន៍ពីប្រទេសជប៉ុន ត្រឡប់ទៅស្រុកខ្មែរវិញ ហើយប្រើប្រាស់សម្រាប់ជាប្រយោជន៍ដល់កម្ពុជា»។
ក្នុងរយៈពេល២ខែដើមឆ្នាំ២០១៩ នេះ កម្ពុជាទទួលបានទេសចរអន្តរជាតិជាង ១,២ លាននាក់ ក្នុងនោះទេសចរជប៉ុនមានជិត៤ ម៉ឺននាក់ ក្នុងកំណើន ៣,១ ភាគរយ។ ទេសចរជប៉ុនស្ថិតក្នុងចំណោមប្រភពទីផ្សារទេសចរណ៍ធំៗទាំង១០របស់កម្ពុជា។ កាលពីឆ្នាំ២០១៨កន្លងទៅនេះ កម្ពុជាទទួលបានទេសចរអន្តរជាតិជាង ៦.២លាននាក់ ក្នុងកំណើន ១០.៧ ភាគរយ ក្នុងនោះទេសចរជប៉ុនមានចំនួនជាង ២១ម៉ឺននាក់ ក្នុងកំណើន ៣,៥ ភាគរយ។
ក្រសួងទេសចរណ៍ និងអ្នកពាក់ព័ន្ធបានរៀបចំមហោស្រពកម្ពុជា ឆ្នាំ២០១៩ (Cambodia Festival 2019) លើកទី៥ នៅប្រទេសជប៉ុន ដើម្បីផ្សព្វផ្សាយ និងលើកកម្ពស់សិល្បៈ វប្បធម៌ វិស័យទេសចរណ៍ និងមុខមាត់កម្ពុជា ព្រមទាំងសំដៅជំរុញផ្សព្វផ្សាយសក្កានុពលទេសចរណ៍កម្ពុជាលើទីផ្សារជប៉ុន ក៏ដូចជាការពង្រឹងចំណងមិត្តភាពកម្ពុជា-ជប៉ុនផងដែរ៕
Tag:
ទេសចរណ៍
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
