រថយន្ត
អន្តរជាតិ
ប្រេងសាំងនៅបារាំងកាន់តែឡើងថ្លៃលើកដំបូង បើគិតចាប់តាំងពីឆ្នាំ២០១៣មក
× តម្លៃប្រេងសាំងនៅប្រទេសបារាំង បានឡើងថ្លៃខ្ពស់ បើគិតចាប់តាំងពីខែមេសា ឆ្នាំ២០១៣មក។ នេះបើតាមរបាយការណ៍របស់ក្រសួងបរិស្ថានបារាំង ដែលក្នុងនោះមានការឡើងខ្ពស់បំផុតនៅខែតុលា ឆ្នាំ២០១៨ មុនពេលមានចលនាបាតុកម្មរបស់ក្រុមអាវកាក់ពណ៌លឿង។
AFP បានផ្សាយឲ្យដឹងថា ប្រេងឥន្ធនៈដែលលក់នៅតាមបណ្តាស្ថានីយ៍ មានប្រេងសាំង៨០ភាគរយ ដោយតម្លៃ ១. ៤៨១៨អឺរ៉ូ (១.៦៦ដុល្លារអាមេរិក) ក្នុង១លីត្រ ដោយកើន ១,៤៧សេន។ ប្រេងសាំងប្រភេទ Sans-plomb 95 កើនឡើងជាងគេនារយៈពេលចុងក្រោយនេះ។
ប្រមាណ៥ខែមកហើយដែលក្រុមចលនាអាវកាក់លឿងនៅបារាំង ធ្វើបាតុកម្មប្រឆាំងនឹងគោលនយោបាយសង្គមកិច្ច ពន្ធដា របស់រដ្ឋាភិបាលលោក អេម៉ានុយអែល ម៉ាក្រុង ហើយស្របពេលជាមួយគ្នានេះ តម្លៃប្រេងសាំងមានការឡើងជាលំដាប់ ដោយសារតែកត្តាអន្តរជាតិ ដូចជា អត្រាដូរលុយអឺរ៉ូ-ដុល្លារ កម្រិតនៃស្តុកផលិតប្រេង និងតម្រូវការច្រើន ក៏ដូចជាគោលការណ៍តម្លើងពន្ធផ្សេងៗ។
បើគិតចាប់តាំងពីដើមឆ្នាំ២០១៩មក ស្ថានភាពកាន់តែយ៉ាប់យ៉ឺន ជាពិសេសឆន្ទះរបស់បណ្តាប្រទេសនាំប្រេងចេញរបស់អង្គការ OPEC និងសម្ព័ន្ធមិត្តនៅមានកម្រិត ក៏ដូចជាវិបត្តិនៅប្រទេសជាច្រើន ដូចជាវ៉េណេស៊ុយអេឡា អ៊ីរ៉ង់ និងលីប៊ី ជាដើម។
ពាក់ព័ន្ធនឹងបញ្ហានេះ រដ្ឋមន្ត្រីបរិស្ថានបារាំង លោក Francois de Rugy បានលើកឡើងពីយន្តការពន្ធ ជាពិសេសគោលដៅទប់ស្កាត់ការឡើងចុះនៃតម្លៃប្រេង។ លោកជឿថា អ្វីៗនឹងមិនមានស្ថានភាពអាក្រក់ដូចកាលពីឆ្នាំ២០០០នោះឡើយ៕
© រក្សាសិទ្ធិដោយ thmeythmey.com