លិខិតមិត្តអ្នកអាន៖ នៅក្នុងសេចក្តីសន្និដ្ឋាននៃការសិក្សាមួយរបស់ក្រុមអ្នកស្រាវជ្រាវជប៉ុនដែលត្រូវបានផ្សព្វផ្សាយកាលពីចុងឆ្នាំ២០១៨ ស្តីពីចរាចរណ៍ក្នុងរាជធានីភ្នំពេញ ក្រុមអ្នកស្រាវជ្រាវបានសរសេរថា គេមិនអាចទទួលបានការធ្វើចរាចរណ៍ដោយរលូន និងសុវត្ថិភាពចរាចរណ៍ផ្លូវគោក ដោយសារតែដំណោះស្រាយផ្នែកបច្ចេកទេសតែមួយប៉ុណ្ណោះទេ។ក្រុមអ្នកស្រាវជ្រាវបានសរសេរយ៉ាងដូច្នេះ៖«នៅពេលដែលរាជធានី ភ្នំពេញត្រូវបានបំពាក់នូវប្រព័ន្ធឧបករណ៍ទំនើបដើម្បីសម្រួលចរាចរណ៍ហើយនោះ ការអនុវត្តច្បាប់ និង ការអប់រំស្តីពីការធ្វើចរាចរណ៍ក៏ត្រូវតែពង្រឹងដូចគ្នាដែរ»។
បច្ចុប្បន្ននេះ អ្នកណាក៏ដឹង អ្នកណាក៏និយាយថា ការបើកបរយ៉ាងអនាធិបតេយ្យបានធ្វើឱ្យខាតបង់ថវិកា យ៉ាងសន្ធឹកសន្ធាប់ និងធ្វើឱ្យបាត់បង់ជីវិតមនុស្សក៏ច្រើនដែរ។ កំណើនសេដ្ឋកិច្ចនៅក្នុងរាជធានីបានធ្វើឱ្យមានការកើនឡើងនូវចំនួនរថយន្ត ម៉ូតូ ម៉ូតូកង់បី រថយន្តធុនធ្ងន់ រថយន្តក្រឡុកស៊ីម៉ង់ ខណៈដែលរថយន្តដឹកទំនិញ ការចតរថយន្តគ្មានសណ្តាប់ធ្នាប់ រឹតតែបង្កការរាំងស្ទះចរាចរណ៍។
ដើម្បីដោះស្រាយបញ្ហាខាងលើនេះ អាជ្ញាធរបានប្រើប្រាស់ប្រព័ន្ធគ្រប់គ្រងបញ្ហាចរាចរណ៍ដ៏ទំនើបមួយដោយមានការគាំទ្រពីអ្នកជំនាញជប៉ុន។ ការងាររៀបចំប្រព័ន្ធគ្រប់គ្រងចរាចរណ៍នេះត្រូវបានបញ្ចប់កាលពីឆ្នាំកន្លងទៅ ដោយរួមមានបច្ចេកទេសបញ្ជាភ្លើងសញ្ញាចរាចរណ៍ដ៏ទំនើបអស្ចារ្យ និងការបែងចែកគន្លងចរាចរណ៍ទៀតផង។
អ្នកជំនាញការជប៉ុន លោក Seiya Marsuoka បានគូសបញ្ជាក់ថា រាជធានីភ្នំពេញកំពុងប្រើប្រាស់បច្ចេកវិទ្យានៃភ្លើងសញ្ញាចរាចរណ៍ដ៏ទំនើប។ ទិន្នន័យនិងរូបភាពដែលទទួលបានពីកាមេរ៉ា ដែលគេបំពាក់ភ្ជាប់ភ្លើងសញ្ញាចរាចរណ៍នោះ ត្រូវបញ្ជូនតាមប្រព័ន្ធខ្សែកាបអុបទិកទៅមជ្ឈមណ្ឌលបញ្ជាចរាចរណ៍រួម ដែលគេអាចបញ្ជាកំណត់រយៈពេលនៃភ្លើងសញ្ញាចរាចរណ៍ទៅតាមស្ថានភាពជាក់ស្តែងនៃចរាចរណ៍។
អ្នកភ្នំពេញអើយ! លោកអ្នកដឹងទេថា ទីក្រុងរបស់អ្នកកំពុងតែប្រើប្រាស់ប្រព័ន្ធបច្ចេកវិទ្យាខ្ពស់ដែលបានធ្វើឱ្យលោកអ្នកភ្ញាក់ផ្អើលទៀតផង។
ប៉ុន្តែ ទោះជាមានការខិតខំប្រឹងប្រែងយ៉ាងណាក៏ដោយ គេនៅតែឃើញការបើកបរគ្មានសណ្តាប់ធ្នាប់។ អ្នកបញ្ជាយានយន្តសុខចិត្តការកកស្ទះចរាចរណ៍ ជាជាងការបើកបរតាមសម្រួល និងទៅមុខយឺតៗ។
បញ្ហានៅត្រង់នេះហើយ គឺមកពីកត្តាមនុស្សនេះឯង ពិសេសគឺអ្នកភ្នំពេញហ្នឹងតែម្តង។
អ្នកបើកបរនៅភ្នំពេញនេះ ជាអ្នកបើកបរដ៏រឹងរូស។ ពួកគេចូលចិត្តបើកបរបញ្ច្រាសទិស បើកជែងខាងស្តាំ និងពេលខ្លះក៏បើកបរលើចិញ្ចើមផ្លូវក៏មាន ឱ្យតែមានកន្លែងទូលាយបន្តិច។
បើសិនជាមានមន្ត្រីប៉ូលិសចរាចរណ៍នៅឈរបាំងក្បែរដើមឈើ ដើម្បីចាប់ពិន័យអ្នកបើកបរមិនពាក់មួកសុវត្ថិភាព និងឬអ្នកជិះបញ្ច្រាសទិស អ្នកបើកបរដែលជាអ្នកភ្នំពេញទាំងនោះ ច្បាស់ជាព្យាយាមបើកបរឱ្យត្រឹមត្រូវ គោរពច្បាប់ចរាចរណ៍មួយភ្លែត ហើយក៏ត្រឡប់មកល្មើសឡើងវិញ ពេលផុតភ្នែកប៉ូលិស។
មានរឿងគួរឱ្យអស់សំណើចមួយទៀត។ អ្នកបើកបរនៅក្នុងរាជធានី មិនចូលចិត្តភ្លើងសញ្ញាចរាចរណ៍ឡើយ ពិសេសភ្លើងសញ្ញាពណ៌ក្រហម។ គ្រាន់ពេលខ្លះ ពួកគេក៏ដាក់ចិត្តឈប់នៅភ្លើងក្រហមនេះខ្លះ ដោយសារតែពួកគេដឹងថា បើគោរពតាមភ្លើងសញ្ញានេះទេ ពួកគេមិនអាចឆ្លងផុតផ្លូវបែកជាបួននេះឡើយ។
ប៉ុន្តែ បើសិនជាពួកគេមើលឃើញថា ចរាចរណ៍មិនចង្អៀតពេកទេ ហើយគ្មានយានយន្តនៅពីមុខ ឬឆ្លងកាត់ដែលធ្វើឱ្យគេគ្រោះថ្នាក់នោះទេ អ្នកបើកបរនោះច្បាស់ជាបញ្ជាយានយន្តកាត់ទម្លុះភ្លើងក្រហម ហើយក៏ប្រហែលជាពួកគេក៏មានអារម្មណ៍ក្អេងក្អាងបានបង្អួតជាសាធារណៈថា ពួកគេក្លាហានមិនគោរពភ្លើងសញ្ញាចរាចរណ៍ក៏បាន។
ពេលខ្លះ លទ្ធផលក៏ស្តែងឡើងភ្លាមៗដែរ។ គឺគ្រោះថ្នាក់ចរាចរណ៍ ដែលបណ្តាលឲ្យស្លាប់ ឱ្យរបួស ហើយចុងក្រោយគឺមានតែក្រុមគ្រួសារដែលទឹកភ្នែក។ រឿងនេះ អ្នកណាក៏ដឹង។ ឥរិយាបថនៃការបើកបរបែបអាត្មានិយម និងបង្កគ្រោះថ្នាក់បែបនេះហើយ ដែលជាការបើកបរល្ងីល្ងើនោះ។
នៅពេលដែលអ្នកភ្នំពេញឃើញអាជ្ញាធរបំពាក់កាមេរ៉ានៅតាមផ្លូវ និងពិសេសនៅតាមភ្លើងសញ្ញាចរាចរណ៍ ពួកគេបែរជាខ្សឹបខ្សៀវគ្នាថា អាជ្ញាធរដាក់កាមេរ៉ាទាំងនោះ គឺគ្រាន់តែដើម្បីតាមដានពលរដ្ឋទៅវិញ។
ខុសស្រឡះពីការគិតរបស់ពួកគេ! តាមពិត ទាំងនោះគឺជាកាមេរ៉ាដែលថតក្រុមអ្នកបើកបរល្ងីល្ងើទេតើ! គឺអ្នកបើកបរល្ងីល្ងើ ដែលធ្វើជាមិនឃើញភ្លើងសញ្ញាពណ៌ក្រហម ដោយយកភ្នែកពួកគេទៅសំឡឹងមើលមេឃទៅវិញ។
ចាប់ពីពេលនេះទៅ សូមអ្នកបើកបរល្ងីល្ងើមេត្តាជ្រាប! នៅពេលពួកអ្នកនៅតែបញ្ជាយានយន្តឆ្លងកាត់ភ្លើងក្រហម សូមញញឹមដាក់កាមេរ៉ាផង ព្រោះកាមេរ៉ាកំពុងថតពួកអ្នក៕
*សំគាល់៖ ជាករណីសិក្សាស្តីពីគម្រោងគ្រប់គ្រងចរាចរណ៍នៅភ្នំពេញស្រាវជ្រាវដោយ Seiya Matsuoka, Matsuoka & Associates, Inc., 4-10-3 W1705, Minatomirai, Nishi-ku, Yokohama City 220-0012, Japan)