កីឡាអន្តរជាតិ
អន្តរជាតិ
កំណត់ត្រា៖ កីឡាករអាហ្វ្រិក Aubameyang, Salah, Mane ឈ្នះស្បែកជើងមាសនៅ EPL ព្រមគ្នា
× ម្ចាស់ស្បែកជើងមាស Golden Boot ក្នុងក្របខណ្ឌ Premier League រដូវកាល ២០១៨-១៩ មិនមែនមានតែមួយរូប ឬពីររូបទេ ប៉ុន្តែមានកីឡាករអាហ្វ្រិកដល់ទៅ៣រូបបានឈ្នះពានអ្នកស៊ុតបញ្ចូលទីច្រើនជាងគេ។ អ្នកទាំងបីរួមមាន Mohamed Salah, Sadio Mane និង Pierre-Emerick Aubameyang ដែលស៊ុតបញ្ចូលទីម្នាក់២២គ្រាប់។
Manchester City បានក្លាយជាម្ចាស់ពានរង្វាន់ Premier League រដូវកាល ២០១៨-១៩ ដោយនាំមុខគូប្រជែង Liverpool ចំនួនមួយពិន្ទុប៉ុណ្ណោះ បន្ទាប់ពីបញ្ចប់ការប្រកួតកាត់សេចក្តីសប្តាហ៍ចុងក្រោយ។ បើទោះបីមិនអាចឈ្នះពានលីគកំពូលអង់គ្លេសក្តី ប៉ុន្តែកីឡាកររបស់ហង្សក្រហមពីររូបដូចជាខ្សែប្រយុទ្ធ Salah និង Mane ទទួលបានពានស្បែកជើងមាសម្នាក់មួយ។
ក្នុងជំនួបបិទរដូវកាល ខ្សែប្រយុទ្ធសញ្ជាតិសេណេហ្គាល់ Mane អាចរកបានដល់ទៅ២គ្រាប់ម្នាក់ឯងនៅ Anfield ដើម្បីជួយ Liverpool ឈ្នះ Wolverhampton ២-០ និងនាំឲ្យរូបគេកើនដល់២២គ្រាប់។ Salah កីឡាករអន្តរជាតិអេហ្ស៊ីបដែលជាមិត្តរួមក្រុមរបស់ Mane មិនអាចរកគ្រាប់បាល់បន្ថែមឡើយសម្រាប់ជំនួបសប្តាហ៍ចុងក្រោយនេះ ខណៈរូបគេមាន២២គ្រាប់ក្នុងដៃរួចស្រេច។
ដោយឡែកខ្សែប្រយុទ្ធ Pierre-Emerick Aubameyang ក៏អាចស៊ុតបញ្ចូលទី២គ្រាប់ផងដែរសម្រាប់ជំនួបចុងក្រោយក្នុងជ័យជម្នះរបស់ Arsenal លើ Burnley ដោយលទ្ធផល៣-១។ ២គ្រាប់នេះបានជួយឲ្យកីឡាករសញ្ជាតិហ្គាបុង វ័យ២៩ឆ្នាំទទួលបានស្បែកជើងមាសមួយដែរនៅរដូវកាលនេះ។ នេះជារដូវកាលដ៏អស្ចារ្យ និងដំបូងបំផុតក្នុងប្រវត្តិសាស្ត្របាល់ទាត់អស់គ្លេសដែលមានកីឡាករពីតំបន់អាហ្វ្រិកអាចឈ្នះ Golden Boot ដល់ទៅ៣រូបព្រមគ្នា។
តាមច្បាប់ក្នុងក្របខណ្ឌ Premier League រង្វាន់ស្បែកជើងមាស គឺគិតតែលើគ្រាប់បាល់ស៊ុតបញ្ចូលទីប៉ុណ្ណោះ ដោយមិនរាប់បញ្ចូលការបញ្ជូនបាល់ឲ្យដៃគូ (assists) សម្រេចទីនោះទេ។ ដូច្នេះអ្នកស៊ុតបញ្ចូលទីស្មើគ្នា នឹងទទួលបានរង្វាន់ស្ទួន។
សូមបញ្ជាក់ថា កាលរដូវកាល ១៩៩៨-៩៩ ក៏មានអ្នកឈ្នះស្បែកជើងមាសចំនួន៣រូបផងដែររួមមាន Jimmy Floyd Hasselbaink (Chelsea), Michael Owen (Liverpool) និង Dwight Yorke (Man Utd)៕
ខាងក្រោមជាកីឡាករដែលស៊ុតបញ្ចូលទីក្នុងរដូវកាលនេះ
Tag:
ទេព ពិទូរ្យ កីឡាបាល់ទាត់
Golden Boot
Premier League
© រក្សាសិទ្ធិដោយ thmeythmey.com