កីឡាអន្តរជាតិ
អន្តរជាតិ
ទោះបានលេខ២ តែ Liverpool រកចំណូលបានច្រើនជាង ម្ចាស់ជើងឯក Man City
× ក្រុម Liverpool បើទោះបីទទួលបានត្រឹមជើងឯករង បែរជាអាចរកប្រាក់ចំណូលបានច្រើនជាង Manchester City ដែលម្ចាស់ជើងឯក Premier League សម្រាប់រដូវកាល ២០១៨-២០១៩នេះ។ បានចំណូលច្រើន ដោយសារហង្សក្រហមមានប្រជាប្រិយភាពខ្លាំងលើការផ្សាយតាមទូរទស្សន៍លើសក្រុមមេឃខៀវ។
ក្រុមរបស់លោក Jurken Klopp ដែលបញ្ចប់ទៅក្នុងចំណាត់ថ្នាក់លេខ ២ ទទួលបានប្រាក់ចំណូលសរុបពីក្របខណ្ឌកំពូលអង់គ្លេសចំនួន ១៤៩,៥ លានផោន (១៩៤,៤៧លានដុល្លារអាមេរិ) លើសក្រុមលោក Pep Guardiola ប្រមាណជិត២លានដុល្លារអាមេរិក។
ការទូទាត់ប្រាក់ចំណូលរបស់ក្រុមទាំង២០ នៅ Premier League រដូវកាលនេះត្រូវបានចែកចេញជា៣ផ្សេងគ្នា ដោយក្នុងនោះប្រាក់ចំនួន៥០ភាគរយត្រូវផ្តល់ឲ្យក្រុមនីមួយៗស្មើគ្នា ដោយក្នុង១ក្រុមទទួលបាន ១០៣លានដុល្លារ។ ២៥ភាគរយត្រូវបង់ឲ្យក្រុមដោយផ្អែកលើចំនួនការប្រកួតដែលបានផ្សាយផ្ទាល់ក្នុងកញ្ចក់ទូរទស្សន៍នៅចក្រភពអង់គ្លេស ហើយ២៥ភាគរយទៀត ត្រូវបង់ឲ្យក្រុមដោយគិតតាមចំណាត់ថ្នាក់ពីលេខ១ ដល់២០ រួមទាំងពាណិជ្ជកម្ម និងការផ្សព្វផ្សាយផ្សេងៗ។
រាល់ការផ្សាយផ្ទាល់មួយលើក ក្រុមនីមួយៗទទួលបាន ៣លានដុល្លារ ហើយបើសរុបការផ្សាយរបស់ក្រុមទាំងអស់ក្នុងរដូវកាលនេះ មានចំនួនទឹកប្រាក់រហូតដល់ ៣,២៧ពាន់លានដុល្លារឯណោះ។
Liverpool បានផ្សាយការប្រកួតរបស់ខ្លួននៅលើទឹកដីអង់គ្លេសច្រើនជាងគេ គឺចំនួន២៩លើកតាមរយៈទូរទស្សន៍ Sky Sports និង BT Sport អំឡុងរដូវកាលនេះ ដែលលើស Man City ចំនួន៣ប្រកួត។ ដូច្នេះហង្សក្រហមចំណេញលើការផ្សាយផ្ទាល់លើសគូប្រជែងប្រមាណ៩លានដុល្លារ។
ដោយឡែកទឹកប្រាក់ចំនួន ៣៨, ៦លានផោន (៥០, ២១លានដុល្លារ) ត្រួវបានផ្តល់ជូនក្រុមមេឃខៀវដែលជាម្ចាស់ជើងឯកលីគកំពូលអង់គ្លេស ខណៈក្រុមរងជើងឯក Liverpool ទទួលបាន ៣៦.៧លានផោន (៤៧,៧៤លានដុល្លារ)៕
Tag:
បាល់ទាត់
Premier League
Premier League prize money
© រក្សាសិទ្ធិដោយ thmeythmey.com