ជាតិ
បទយកការណ៍ / បទសម្ភាសន៍
ស្ថាបនិកកម្មវិធីពេទ្យយើង៖ «ទោះខ្ញុំមិនអាចធ្វើជាវេជ្ជបណ្ឌិត ប៉ុន្តែខ្ញុំអាចបង្កើតកម្មវិធីជួយដល់វេជ្ជបណ្ឌិត»
រូបពីហ្វេសប៊ុកអ្នកស្រី លីមសាន ដែលទទួលបានពានរង្វាន់សហគ្រិនស្រ្តីឆ្នើមក្នុងវិស័យបច្ចេកវិទ្យាប្រចាំឆ្នាំ ២០១៩
×![]()
ដោយ: ភួង វ៉ាន់ថា
«ពេទ្យយើង» ជាកម្មវិធីសម្រាប់គ្រប់គ្រងទិន្នន័យមន្ទីពេទ្យតាមបែបឌីជីថល ដែលត្រូវបានបង្កើតឡើងដោយសហគ្រិនស្ត្រីកម្ពុជា គឺអ្នកស្រី ប៉ុង លីមសាន ។ កម្មវិធីនេះ ដើម្បីជួយលើកកម្ពស់សេវាកម្មផ្នែកសុខភិបាលក្នុងប្រទេសកម្ពុជាឲ្យកាន់តែមានប្រសិទ្ធភាព និងគុណភាពខ្ពស់។ 
មូលហេតុដែលអ្នកស្រី លីមសាន បង្កើតកម្មវិធីគ្រប់គ្រងទិន្នន័យនេះឡើង ដោយសារអ្នកស្រី បានមើលឃើញថា ការគ្រប់គ្រងព័ត៌មានរបស់អ្នកជំងឺ និងទិន្ធន័យផ្សេងៗទៀតនៅតាមបណ្ដាមន្ទីពេទ្យនានាក្នុងប្រទេសកម្ពុជា នៅមានភាពខ្វះចន្លោះ ក្រោយពេលដែលអ្នកស្រី បានប្រឡូកការងារជាអ្នកប្រឹក្សាយោបល់ផ្នែកទិន្នន័យក្នុងវិស័យសុខាភិបាល អស់រយៈពេលជាង៦ឆ្នាំមក។
ដើម្បីជ្រាបច្បាស់ សូមលោក-អ្នកនាងស្ដាប់បទសម្ភាសរវាង លោក ភួង វ៉ាន់ថា អ្នកសារព័ត៌មានថ្មីៗ និង អ្នកស្រី ប៉ុង លីមសាន សហគ្រិនស្ត្រីកម្ពុជា ដូចតទៅ៖
តាមពិតទៅអ្នកស្រី ប៉ុង លីមសាន មិនមានជំនាញឯកទេសផ្នែកសុខាភិបាលនោះទេ ។ ជំនាញរបស់អ្នកស្រី ពិតប្រាកដនោះ គឺផ្នែកព័ត៌មានវិទ្យា (Information Technology)។ ប៉ុន្តែដោយសារតែមានឱកាសបានប្រឡូកការងារជាអ្នកប្រឹក្សាយោបល់ផ្នែកទិន្នន័យក្នុងវិស័យសុខាភិបាល កាលពីឆ្នាំ២០១២នោះ ទើបធ្វើឲ្យអ្នកស្រី លីមសាន មានការចាប់អារម្មណ៍ និងចង់ដោះស្រាយលើបញ្ហាគ្រប់គ្រងទិន្នន័យអ្នកជំងឺនេះ តាមរយៈការយកជំនាញរបស់ខ្លួន មកបង្កើតជាកម្មវិធី«ពេទ្យយើង» ដើម្បីសម្រួលដល់ការគ្រប់គ្រងទិន្នន័យនៅក្នុងមន្ទីពេទ្យ។ បើតាមអ្នកស្រី លីមសាន បច្ចុប្បន្នមានមន្ទីពេទ្យរដ្ឋ និងឯកជនជាង១០០ ហើយ ដែលបានប្រើប្រាស់កម្មវិធីនេះ។
សហគ្រិនស្ត្រីដែលមានជំនាញព័ត៌មានជាង២០ឆ្នាំរូបនេះបាននិយាយថា៖«បើទោះបីខ្ញុំមិនបានធ្វើវេជ្ជបណ្ឌិត ប៉ុន្តែខ្ញុំបង្កើតកម្មវិធីជួយវេជ្ជបណ្ឌិត ដើម្បីឲ្យប្រើប្រាស់កម្មវិធីនេះ ជួយទៅដល់សង្គមរបស់ខ្ញុំវិញ»។
អ្នកស្រី លីមសាន បានទទួលពានរង្វាន់សហគ្រិនស្ត្រីឆ្នើមក្នុងវិស័យបច្ចេកវិទ្យាប្រចាំឆ្នាំ ២០១៩ ពីក្រសួងប្រៃសនីយ៍និងទូរគមនាគមន៍កម្ពុជាផងដែរ។
ដើមឡើយម្តាយអ្នកស្រី លីមសាន បានជំរុញឲ្យអ្នកស្រីរៀនជំនាញពេទ្យ ខណៈពេលដែលអ្នកស្រីកំពុងរៀនថ្នាក់វិទ្យាល័យ ប៉ុន្តែអ្នកស្រីមិនបានជ្រើសរើសតាមម្ដាយនោះទេ ព្រោះអ្នកស្រីជាមនុស្សខ្លាចឈាម និងម្ជុល ។ ដូច្នេះអ្នកស្រីក៏សម្រេចចិត្តរៀនជំនាញ ព័ត៌មានវិទ្យា ឬហៅថា IT ជំនួសវិញ។
អ្នកស្រីក៏បានចែករំលែកបទពិសោធន៍ផ្ទាល់ខ្លួនដល់សហគ្រិនស្ត្រីជំនាន់ក្រោយ និងស្ត្រីដែលចង់សិក្សាជំនាញព័ត៌មានវិទ្យាថា ស្ត្រីទាំងអស់ត្រូវកំណត់គោលដៅរបស់ខ្លួនឲ្យបានច្បាស់លាស់ និងត្រូវរៀនសូត្រពីមនុស្សជុំវិញខ្លួន ឬអ្នកដែលជាគំរូ។ ហើយនៅពេលជួបឧបសគ្គ ត្រូវគិតថាឧបសគ្គគឺជាឱកាស ដែលត្រូវដោះស្រាយដោយផ្ដោតលើការព្យាយាម ភាពស្មោះត្រង់ និង ភាពជាអ្នកដឹកនាំ (ម្ចាស់ការលើខ្លួនឯង)៕
Tag:
សហគ្រិនស្ត្រី
សុខភិបាល
© រក្សាសិទ្ធិដោយ thmeythmey.com
