ជាតិ
លោក នេត សាវឿន៖ កម្ពុជាទប់ស្កាត់ក្រុមឧទ្ទាមក្រៅច្បាប់ដោយប្រសិទ្ធភាព ខណៈមានភេរវកម្មលើសកលលោក១៩៧៩លើក
លោក នេត សាវឿន អគ្គស្នងការនគរបាលជាតិ ថ្លែងនៅក្នុងពិធីរម្លឹកខួបលើកទី៧៤ នៃកំណើតនគរបាលជាតិ នៅថ្ងៃទី១៦ ឧសភា ឆ្នាំ២០១៩
×![]()
ដោយ: ធឿន បញ្ញាឬទិ្ធ
ភ្នំពេញ៖ អគ្គស្នងការនគរបាលជាតិ ប្រកាសពីភាពជោគជ័យរបស់មន្ត្រីនគរបាលខ្លួន ក្នុងការទប់ស្កាត់ និងបង្ក្រាបក្រុមឧទ្ទាម ដែលមានបំណងបង្កអសន្តិសុខ ហើយចង់ផ្ដួលរំលំរដ្ឋាភិបាល ខណៈភេរវកម្មកើតឡើងនៅលើសកលលោកចំនួន១៩៧៩លើក។ ការប្រកាសរបស់អគ្គស្នងការនគរបាលជាតិនេះ ធ្វើឡើងនៅក្នុងពិធីអបអរខួបលើកទី៧៤ នៃកំណើតនគរបាលជាតិ នៅព្រឹកថ្ងៃទី១៦ ឧសភានេះ។
លោក នេត សាវឿន បានអានរបាយការណ៍ដែលសម្រេចបាននៅឆ្នាំ២០១៨ ដោយអះអាងថា ទោះបីជាស្ថានភាពនៅក្នុងតំបន់ និងលើសកលលោកជួបប្រទះបញ្ហាភាពវឹកវរដោយភេរវកម្ម និងឧក្រិដ្ឋកម្មក្តី ប៉ុន្តែកម្ពុជានៅតែរក្សាស្ថិរភាព សន្តិសុខ និងសណ្ដាប់ធ្នាប់បានល្អ ដោយគ្មានបញ្ហាអ្វីមករំខានឡើយ។ ក្នុងន័យនេះលោក នេត សាវឿន បានសង្កត់ធ្ងន់ថា ការរក្សាបាននូវស្ថិរភាពនេះ ដោយសារតែមន្ត្រីនគរបាល បានបង្ក្រាបលើចលនាក្រុមឧទ្ទាមក្រៅច្បាប់ទាន់ពេលវេលា ខណៈដែលពិភពលោកជួបប្រទះបញ្ហាភេរវកម្ម១៩៧៩លើក នៅបណ្ដាប្រទេស៥៤ ក្នុងតំបន់អាស៊ី អឺរ៉ុប និងមជ្ឈិមបូព៌ា នៅឆ្នាំ២០១៨ ដែលកើនឡើង៧៣លើក បើធៀបនឹងឆ្នាំ២០១៧ កើតឡើង១៩០៦លើក។
តែយ៉ាងណាអគ្គស្នងការនគរបាលរូបនេះ មិនបានបញ្ជាក់ថា ក្រុមឧទ្ទាមក្រៅច្បាប់ដែលអាជ្ញាធរបង្ក្រាបបានទាំងនោះ ជាអ្នកណាឡើយ ក្រៅពីលោកបកស្រាយករណីនេះ ភ្ជាប់នឹងករណីធ្វើបាតុកម្ម និងកូដកម្មកន្លងមក។
ថ្លែងក្នុងពិធីអបអរខួបលើកទី៧៤ នៃកំណើតនគរបាលជាតិ អគ្គស្នងការនគរបាលជាតិរូបនេះ បាននិយាយដូច្នេះថា៖«ក្នុងអំឡុងពេល(ពិភពលោកជួបបញ្ហាភេរវកម្ម)ដូចគ្នានេះដែរ កម្ពុជាបានទប់ស្កាត់ប្រកបដោយប្រសិទ្ធភាព នូវរាល់ឧបាយកលសកម្មភាពពួកក្រុមឧទ្ទាមក្រៅច្បាប់ ដែលប៉ុនប៉ងធ្វើបដិវដ្ដព័ណ៌ ផ្ដួលរំលំរដ្ឋាភិបាលស្របច្បាប់។ បើទោះបីជាសកម្មភាពមួយចំនួន ក្នុងចំណោមហេតុការណ៍បាតុកម្ម កូដកម្មប្រមាណជាង១៥០០លើកបានកើតឡើង ដោយមានការញុះញង់ពីសំណាក់ពួកអមិត្តក្តី ប៉ុន្តែឧបាយកលទាំងនេះ ត្រូវបានបរាជ័យ តាមរយៈការខិតខំប្រឹងប្រែងរបស់កងកម្លាំងនគរបាលជាតិ ក្នុងការរៀបចំសម្រួលសណ្ដាប់ធ្នាប់ និងសហការដោះស្រាយដោយសន្តិវិធី…»។
បន្ថែមពីនេះលោក នេត សាវឿន បានអះអាងថា សមត្ថកិច្ច ក៏បានទប់ស្កាត់ និងបន្សាបរាល់មនោគមវិជ្ជា ទាំងក្នុងនិងក្រៅប្រទេស ដែលមានបំណងញុះញង់ឲ្យបំបែកបំបាក់សាមគ្គីជាតិ និងប្រើប្រាស់ទឹកដីកម្ពុជាប្រឆាំងរដ្ឋាភិបាលជិតខាងផងដែរ។
ទាក់ទងនឹងករណីបង្ក្រាបក្រុមឧទ្ទាមនេះ គេសង្កេតឃើញថា មានអតីតមន្ត្រី និងក្រុមសកម្មជន អតីតគណបក្សសង្គ្រោះជាតិ ជាង២០រូប កំពុងជាប់ការសង្ស័យ ដោយត្រូវបានតុលាការកោះហៅសាកសួរជាបន្តបន្ទាប់ នៅរយៈពេលប៉ុន្មានថ្ងៃនេះ។
លោក គឺ ប៊ុណ្ណារ៉ា តំណាងអយ្យការអមសាលាដំបូងខេត្តបាត់ដំបង បានចេញដីកាជាបន្តបន្ទាប់ កោះហៅអតីតសកម្មជន នៃអតីតគណបក្សសង្គ្រោះជាតិជាង២០រូប នៅខេត្តបាត់ដំបង ឱ្យចូលបំភ្លឺនៅតំណាងអយ្យការខេត្តបាត់ដំបង នៅខែឧសភានេះ ពាក់ព័ន្ធនឹងករណីប្រឆាំង និងបំពានសាលដីកាតុលាការកំពូល ដែលចេញកាលពីថ្ងៃទី១៦ ខែវិច្ឆិកា ឆ្នាំ២០១៧។
ដើមចមនៃរឿងរ៉ាវនោះ កើតចេញពីកន្លែងហាងលក់នំបញ្ចុករបស់កញ្ញា ស៊ិន ចាន់ពៅរ៉ូហ្ស៊ិត អតីតចៅសង្កាត់អូរចា នៃអតីតគណបក្សសង្គ្រោះជាតិ ដែលអាជ្ញាធរសង្ស័យថា ជាកន្លែងសម្រាប់អ្នកអ្នក«ប្រកាសគាំទ្រចលនាឧទ្ទាម ចេញចូល» បរិភោគ និងអង្គុយពិភាក្សាគ្នាលើគំនិតអវិជ្ជមានប្រឆាំងរដ្ឋាភិបាល។ ក្រោយសង្ស័យបែបនេះ អាជ្ញាធរខេត្តបាត់ដំបង ក៏បានចុះបិទហាងលក់នំបញ្ចុកមួយរបស់កញ្ញា ស៊ិន ចាន់ពៅរ៉ូហ្ស៊ិត តែម្ដង កាលពីចុងខែមករា ឆ្នាំ២០១៨។ ក្រោយពីអាជ្ញាធរចុះបិទហាងនោះមក មន្ត្រី និងសកម្មជនអតីតគណបក្សសង្គ្រោះជាតិ ដែលចេញ-ចូលហាងនំបញ្ចុករបស់កញ្ញា ស៊ិន ចាន់ពៅរ៉ូហ្ស៊ិត ស្ថិតនៅក្រោមការសង្ស័យរបស់តុលាការ ក្នុងការអនុវត្តនីតិវិធីផ្លូវច្បាប់នេះ។
ក្រៅពីនេះ ក៏មានមន្ត្រី និងសកម្មជនអតីតបក្សប្រឆាំងផ្សេងទៀត ដែលនៅជុំគ្នាបរិភោគនំបញ្ចុក ហើយមិនព្រមទៅបោះឆ្នោតជ្រើសតាំងតំណាងរាស្ត្រ អាណត្តិទី៦ កាលពីខែកក្កដា ឆ្នាំ២០១៨កន្លងមក កំពុងស្ថិតនៅក្រោមការតាមដាន និងសួរចម្លើយពីសំណាក់តុលាការផងដែរ។ ពួកគេទាំងនោះ ស្ថិតនៅក្រោមការសង្ស័យធ្វើសកម្មភាពឧទ្ទាម និងបដិវដ្ដផ្ដួលរំលំរដ្ឋាភិបាល។
អត្ថបទទាក់ទង
ទាក់ទងបញ្ហានេះមន្ត្រីការពារសិទ្ធិមនុស្សនៃសមាគមអាដហុកប្រចាំខេត្តបាត់ដំបង ដែលបានតាមដានបញ្ហានេះ យល់ឃើញថា ការកោះហៅរបស់តុលាការនេះ មិនមែនជាអនុវត្តច្បាប់ ប៉ុន្តែអាចជាការគំរាមកំហែងការបញ្ចេញទៅវិញ។ មូលហេតុដែលលោក យិន ម៉េងលី លើកឡើងបែបនេះ ដោយសារលោកបានចូលស្ដាប់ការសាកសួររបស់តុលាការ ហើយកត់សម្គាល់ឃើញថា តុលាការបានសាកសួរអតីតមន្ត្រីគណបក្សសង្គ្រោះជាតិ ភាគច្រើនពាក់ព័ន្ធនឹងសកម្មភាពមួយចំនួន ទាក់ទងនឹងការលក់-ទិញនំបញ្ចុក និងអង្គុយញាំនំបញ្ចុកជួបគ្នា ដែលហាក់ដូចជាគ្មានអ្វីពាក់ព័ន្ធនឹងផ្លូវច្បាប់ឡើយ។
ចំណែកអង្គការឃ្លាំមើលសិទ្ធិមនុស្សអន្តរជាតិ(Human Right Watch) ស្នើឲ្យឈប់រំលោភបំពានលើអតីតមន្ត្រីមូលដ្ឋានរបស់គណបក្សសង្គ្រោះជាតិ ហើយទម្លាក់ចោលការចោទប្រកាន់លើពួកគេ ៕
Tag:
នេត សាវឿន
នគរបាល់
បទឧក្រិដ្ឋ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
