ទេសចរជាង៤ម៉ឺននាក់ ទៅកម្សាន្តនៅបាត់ដំបងនិងមណ្ឌលគិរី ក្នុងថ្ងៃចម្រើនព្រះជន្មព្រះមហាក្សត្រ

ជាតិ

សង្គមជាតិ

ទេសចរជាង៤ម៉ឺននាក់ ទៅកម្សាន្តនៅបាត់ដំបងនិងមណ្ឌលគិរី ក្នុងថ្ងៃចម្រើនព្រះជន្មព្រះមហាក្សត្រ

16, May 2019 , 10:19 pm

រូបភាព

សមុទ្រឈើ

ដោយ: ឡាយ សុភាវតី

ខេត្តបាត់ដំបង់និងខេត្តមណ្ឌលគិរី មានភ្ញៀវទេសចរទៅកម្សាន្តប្រហែលគ្នា គឺជាង២ម៉ឺននាក់។ ភ្ញៀវទេសចរភាគច្រើនចូលចិត្តទៅលេងតំបន់ភ្នំមានទឹកធ្លាក់តាមស្ទឹងតាមភ្នំ និងមើលទេសភាពព្រៃឈើជាដើម។ នេះបើតាមប្រធានមន្ទីរទេសចរណ៍ខេត្តបាត់ដំបងនិងមណ្ឌលគិរីដែលបានប្រាប់សារព័ត៌មានថ្មីៗ តាមទូរស័ព្ទនៅថ្ងៃទី១៦ ខែឧសភា ឆ្នាំ២០១៩។

លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានឲ្យដឹងថា ភ្ញៀវទេសចរ ទៅទស្សនាខេត្តបាត់ដំបងរយៈពេល៤ថ្ងៃ ចាប់ពីថ្ងៃទី១២ ដល់១៥ ខែឧសភា មានជាង២ម៉ឺន៧ពាន់នាក់ គឺការកើនឡើង១៨.៥% បើធៀបនឹងឆ្នាំ២០១៨ ដែលមានប្រមាណ២ម៉ឺន២ពាន់នាក់។

រូបភាពពីមន្ទីរទេសចរណ៍ខេត្តបាត់ដំបង រមណីយដ្ឋាន ថ្វាក

ក្នុងចំណោមភ្ញៀវទេសចរភាគច្រើនជាជនជាតិខ្មែរ ហើយបរទេសមានត្រឹមតែជិត២០០នាក់។ ភ្ញៀវទេសចរភាគច្រើន ទៅទស្សនានៅតំបន់ដែលមានទឹក ដូចជារមណីយដ្ឋានថ្វាក ចម្ការស្វាយ ទំនប់ទឹកសេកសក ក្នុងស្រុករតនមណ្ឌល ទឹកធ្លាក់ស្រុកសំឡូត និងភ្នំបាណន់ជាដើម។

រីឯខេត្តមណ្ឌលគិរីវិញ លោក ងិន សុវិមាន ប្រធានមន្ទីរទេសចរណ៍ បានបញ្ជាក់ថា មានភ្ញៀវទេសចរប្រមាណ២ម៉ឺន៧ពាន់នាក់ បានទៅទស្សនានៅខេត្តមណ្ឌលគិរីក្នុងថ្ងៃឈប់សម្រាកនៃពិធីបុណ្យចម្រើនព្រះជន្មព្រះមហាក្សត្រ។ ភាគច្រើននៃភ្ញៀវទេសចរគឺជនជាតិខ្មែរ ដែលចូលចិត្តកម្សាន្តនៅតំបន់ទឹកធ្លាក់ប៊ូស្រា សមុទ្រឈើ និងទេសភាពដាក់ដាំ ជាដើម៕