ជាតិ
«កាផា» ឧបករណ៍ប្រពៃណីជនជាតិដើម ប្រឈមនឹងបាត់បង់ ខណៈយុវជនលែងចង់ត្បាញ
× មណ្ឌលគិរី៖ លោក ជុច ជែល ជាជនជាតិដើមភាគតិចព្នងម្នាក់ ដែលចេះត្បាញ«កាផា» នៅក្នុងសហគមន៍ភូមិពូតាំង សង្កាត់រម្យនា ក្រុងសែនមនោរម្យ។ ក្រៅពី «កាផា» បុរសវ័យ៥៤ឆ្នាំ ជុច ដែល ចេះត្បាញចង្អេរ និងអង្រុតជាដើម ដែលជំនាញត្បាញទាំងនេះ មានតែចាស់ៗប៉ុណ្ណោះ ចេះត្បាញ។ លោក ដែល កំពុងបារម្ភពីអនាគត «កាផា» ដែលជនជាតិព្នងហៅថា «សាស់» នោះ ជាឧបករណ៍ប្រពៃណីសម្រាប់ប្រើប្រាស់ប្រចាំថ្ងៃ របស់ជនជាតិដើមភាគតិច ដែលប្រឈមនឹងបាត់បង់ ដោយយុវជនជនជាតិដើមភាគតិចជំនាន់ក្រោយមិនចាប់អារម្មណ៍នឹងតម្បាញនេះ។
«ធ្វើកាផា, ចង្អេរ, អង្រុត និងត្បាល់បុកអីហ្នឹង អត់ចាប់អារម្មណ៍ធ្វើទេក្មេងៗឥឡូវ»។ នេះជាសម្តីរបស់ ជនជាតិដើមភាគតិចព្នង ជុច ជែល ដែលបានរៀបរាប់ប្រាប់សារព័ត៌មានថ្មីៗ។ បុរសវ័យ៥៤ឆ្នាំ ជុច ដែល ពន្យល់ពីមូលហេតុដែលយុវជនជនជាតិដើម ជំនាន់ក្រោយមិនមានការចាប់អារម្មណ៍នឹងតម្បាញនេះថា ដោយសារយុវជនភាគច្រើន ចេញទៅរកស៊ីខាងក្រៅ, ស៊ីឈ្នួលធ្វើចម្ការ និងខ្លះទៀត រវល់រៀនសូត្រ។ ម្យ៉ាងទៀត មកពីមិនមានសហគមន៍ចុះបង្រៀន និងមិនមានអ្នកចេះត្បាញ «កាផា» ច្រើនដូចកាលពីមុននោះឡើយ។
សូមអញ្ជើញទស្សនាវិដេអូខាងក្រោមនេះ ដូចតទៅ៖
លោក ជុច ជែល ដែលមានសមាជិកគ្រួសារ៤នាក់ រស់នៅសហគមន៍ភូមិពូតាំង សង្កាត់រម្យនា ក្រុងសែនមនោរម្យ ខេត្តមណ្ឌលគិរី នេះ បញ្ជាក់ថា ប្រសិនបើ មានអ្នកឧបត្ថម្ភថវិកាសម្រាប់បង្រៀនពីរបៀបធ្វើកាផានេះ ដល់យុវជនជំនាន់ក្រោយ លោកនឹងចំណាយពេលប្រៀន ដើម្បីអភិរក្សឧបករណ៍ប្រពៃណីជនជាតិដើមភាគតិចមួយនេះ ឲ្យបានឋិតថេរ៕
Tag:
ជនជាតិភាគតិចព្នង
កាផា
ត្បាញ
© រក្សាសិទ្ធិដោយ thmeythmey.com