អតីតមន្ត្រីគណបក្សប្រឆាំង២៦នាក់នៅតាមមូលដ្ឋាន បានចូលទៅបំភ្លឺនៅមុខព្រះរាជអាជ្ញានៃអយ្យការអមសាលាដំបូងខេត្តបាត់ដំបងរួចហើយ ខណៈ៩នាក់ទៀត នឹងបន្តចូលទៅបំភ្លឺនៅថ្ងៃ២៤ ខែឧសភា ឆ្នាំ២០១៩។ នេះបើតាមលោក សំ សុគង់ មេធាវីរបស់អ្នកទាំងនោះ។
លោកមេធាវី សំ សុគង់ ប្រាប់សារព័ត៌មានថ្មីៗថា កូនក្តីរបស់លោកទាំង៣៥នាក់ ត្រូវបាននគរបាលសរសេរសំណុំរឿងបញ្ជូនទៅព្រះរាជអាជ្ញា ដោយសង្ស័យថាពួកគេ ប្រឆាំងនឹងសាលដីការបស់តុលាការកំពូល អំពីការរំលាយគណបក្សប្រឆាំងកាលពីចុងឆ្នាំ២០១៧។ ពួកគេ ធ្លាប់ជួបគ្នានិងពិសានំបញ្ចុកជាមួយនាពេលកន្លងមក ទើបធ្វើឲ្យនគរបាលសង្ស័យថា ពួកគេ ចង់ប្រឆាំងនឹងសាលដីការបស់តុលាការកំពូល។
បើតាមលោក សំ សុគង់ មកដល់ពេលនេះ ព្រះរាជអាជ្ញា មិនទាន់សម្រេចថា ចោទប្រកាន់ពួកគេ ឬក៏តម្កល់រឿងមិនចាត់ការនោះទេ។ លោក បន្តថា ប្រសិនបើព្រះរាជអាជ្ញាចោទប្រកាន់ ព្រះរាជអាជ្ញា នឹងបញ្ជូនសំណុំរឿងទៅឲ្យចៅក្រមស៊ើបសួរ។ យ៉ាងណា លោក សង្ឃឹមថា ព្រះរាជអាជ្ញា នឹងតម្កល់សំណុំរឿងមិនចាត់ការ។
លោកមេធាវី ពន្យល់ពីផ្លូវច្បាប់បែបនេះថា «ការជួបគ្នា និងការពិសានំបញ្ចុកជាមួយគ្នា មិនមែនជារឿងខុសច្បាប់ទេ។ វា ជាសិទ្ធិរបស់ពួកគាត់ដែលធានាដោយច្បាប់ជាតិនិងអន្តរជាតិ»។
លោក អ៊ូ ច័ន្ទរ័ត្ន អតីតតំណាងរាស្ត្រគណបក្សប្រឆាំង ដែលកំពុងរស់នៅក្នុងស្រុក ចាត់ទុក ចំណាត់ការបស់តុលាការ ថាជាការរឹតត្បិតសិទ្ធិសេរីភាព។ លោក បកស្រាយ ទោះជាគណបក្សប្រឆាំង ត្រូវបានរំលាយហើយក្តី តែពុំមានន័យថា ប្រជាពលរដ្ឋ ឬអ្នកគាំទ្រគណបក្សប្រឆាំង បាត់បង់សិទ្ធិនោះទេ។
ម្យ៉ាងទៀត លោក យល់ថា ប្រជាពលរដ្ឋទាំងនោះ មិនមែនជាប់បម្រាម ដូចអតីតថ្នាក់ដឹកនាំគណបក្សប្រឆាំងទាំង១១៨នាក់ឡើយ។ លោក សង្កត់ធ្ងន់ថា «រដ្ឋាភិបាល ឬតុលាការ ធ្វើអ៊ីចឹង គឺប៉ះពាល់មុខមាត់កម្ពុជាវិញទេ ព្រោះតំណាងអង្គការសហប្រជាជាតិនៅកម្ពុជា ក៏ឃ្លាំងមើលរឿងហ្នឹងដែរ»។
ពេលរំលាយគណបក្សប្រឆាំង តុលាការកំពូល បានហាមអតីតថ្នាក់ដឹកនាំ១១៨នាក់នៃគណបក្សនេះ មិនឲ្យធ្វើនយោបាយរយៈពេល៥ឆ្នាំ។ មានអតីតថ្នាក់ដឹកនាំគណបក្សប្រឆាំង៤-៥នាក់ហើយ ដែលទទួលបានសិទ្ធិនយោបាយវិញ ក្រោយពួកគេ ស្នើសុំ។
ក្រៅពីខេត្តបាត់ដំបង អតីតមន្ត្រីគណបក្សប្រឆាំងថ្នាក់មូលដ្ឋាន ក្នុងខេត្តកំពង់ធំ និងនៅខេត្តដទៃទៀត ក៏ត្រូវហៅទៅសួរនាំដែរ។ នៅកំពង់ធំ មានអតីតមន្ត្រីគណបក្សប្រឆាំង៣៥នាក់ដូចគ្នា ដែលត្រូវបានកម្លាំងនគរបាល ហៅទៅសួរនាំពីរឿងជួបជុំគ្នា។ ប៉ុន្តែសំណុំរឿងរបស់ពួកគេ មិនទាន់ធ្លាក់ដល់ដៃតុលាការនៅឡើយទេ។
លោក ផៃ ស៊ីផាន អ្នកនាំពាក្យរដ្ឋាភិបាល ធ្លាប់ប្រាប់សារព័ត៌មានថ្មីៗថា ចំណាត់ការរបស់តុលាការនិងសមត្ថកិច្ច មិនមែនជាការបំភ័យឡើយ។ ផ្ទុយទៅវិញ លោក យល់ថា ចំណាត់ការនេះ គឺជាការបង្ហាញពីសុចរិតភាពរបស់អតីតមន្ត្រីគណបក្សប្រឆាំងទាំងនោះ បើពួកគេ ពិតជាមិនបានប្រព្រឹត្តអំពើប្រឆាំងនឹងសាលដីការបស់តុលាការកំពូលមែន។
ការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជា បង្ហាញក្តីកង្វល់ដែរ ដែលតុលាការនិងសមត្ថកិច្ច ហៅអតីតមន្ត្រីគណបក្សប្រឆាំងមិនតិចជាង៧០ ទៅសួរនាំជាបន្តបន្ទាប់។ ស្ថាប័នតំណាងឲ្យអង្គការសហប្រជាជាតិមួយនេះ សរសេរលើទំព័រហ្វេសប៊ុក នៅថ្ងៃទី២១ ខែឧសភា ឆ្នាំ២០១៩ ថា ខ្លួនកំពុងតាមដានរឿងនេះ។
លើសពីនេះ អ្នកនាំពាក្យក្រសួងការបរទេស បានចេញសេចក្តីថ្លែងការណ៍មួយ កាលពីថ្ងៃទី១៧ ខែឧសភា ដោយបង្ហាញក្តីកង្វល់ចំពោះមរណភាពលោក ទិត រ៉ន កូនប្រុសរបស់អតីតសកម្មជនគណបក្សប្រឆាំង នៅក្នុងពន្ធនាគារវត្តឃ្មួងខេត្តកំពង់ចាម។ ក្រសួងការបរទេសអាមេរិក អំពាវនាវឲ្យមានការស៊ើបអង្កេតឯករាជ្យជាបន្ទាន់លើករណីនេះ។
ក្រសួងការបរទេសអាមេរិក ក៏មានកង្វល់ផងដែរ អំពីការចាត់វិធានការរបស់តុលាការ ទៅលើអតីតមន្ត្រីគណបក្សប្រឆាំង។ ក្រសួងការបរទេសអាមេរិក អំពាវនាវឲ្យរដ្ឋាភិបាលកម្ពុជា លុបបំបាត់ការរឹតត្បិត និងដោះលែងអ្នកទោសទាំងឡាយណា ដែលត្រូវបានឃុំខ្លួនតាមអំពើចិត្ត ដោយរួមទាំងលោក កឹម សុខា ផងដែរ។
«យើង ក៏សូមអំពាវនាវដល់រដ្ឋាភិបាលកម្ពុជា ឲ្យគាំទ្រលទ្ធិប្រជាធិបតេយ្យពហុបក្សពិតប្រាកដ ហើយធ្វើយ៉ាងណា ឲ្យសកម្មភាព និងច្បាប់របស់ខ្លួន គោរពទៅតាមកាតព្វកិច្ចសិទ្ធិមនុស្ស របស់កម្ពុជា ស្ថិតក្រោមច្បាប់អន្តរជាតិ»។ នេះបើតាមសេចក្តីថ្លែងការណ៍របស់ក្រសួងការបរទេសអាមេរិកដដែល៕