សហភាពសហព័ន្ធយុវជនកម្ពុជា(ស.ស.យ.ក) រាជធានីភ្នំពេញ សហការជាមួយក្លិបបាល់ទាត់បឹងកេត រៀបចំពានរង្វាន់ជើងឯកវិទ្យាល័យ ដើម្បីផ្តល់ឱកាសឲ្យយុវជន និងរួមចំណែកអភិវឌ្ឍន៍វិស័យកីឡាបាល់ទាត់នៅកម្ពុជា។ នេះជាឱកាសល្អសម្រាប់យុវជនដែលចង់ក្លាយជាកីឡាករបាល់ទាត់អាជីព ព្រោះក្លិបបឹងកេតនឹងសំឡឹងមើលជនយុវជនមានទេពកោសល្យពីពានរង្វាន់នេះ ដើម្បីយកមកធ្វើជាយុវជនថ្នាល។ ក្រុមជើងឯកប្រចាំពានវិទ្យាល័យលើកទី១ ដែលមាន៩ក្រុមចូលរួមនេះ នឹងទទួលបានថវិកាលើកទឹកចិត្តចំនួន៦០លានរៀល។
«ជើងឯកវិទ្យាល័យ» គឺជាឈ្មោះពានរង្វាន់បាល់ទាត់មួយ ដែលទើបបង្កើតឡើងដោយសហភាពសហព័ន្ធយុវជនកម្ពុជារាជធានីភ្នំពេញក្រោមកិច្ចសហការជំនួយបច្ចេកទេសពីក្លិបបាល់ទាត់បឹងកេត។ ពានរង្វាន់នេះ បង្កើតឡើងដើម្បីរួមចំណែកអភិវឌ្ឍវិស័យកីឡាបាល់ទាត់កម្ពុជា និងជំរុញចលនាកីឡាបាល់ទាត់តាមសាលាឲ្យមានសកម្មភាពកាន់តែផុសផុល ពិសេសផ្តល់ឱកាសឲ្យយុវជនបានបង្ហាញសមត្ថភាព។ នេះបើតាមការបញ្ជាក់របស់លោក ងួន សុភៈ ប្រធានគណៈកម្មការរៀបចំការប្រកួត។
«យើងបង្កើតពានជើងឯកវិទ្យាល័យនេះ ក្នុងគោលបំណងរួមចំណែកលើកកម្ពស់វិស័យកីឡាបាល់ទាត់កម្ពុជាឲ្យមានសកម្មភាពរស់រវើកនិងរីកចម្រើនកាន់តែប្រសើរ សំដៅបណ្តុះស្មារតីឲ្យស្រលាញ់កីឡា សុខភាព ចៀសឆ្ងាយពីគ្រឿងញៀន សម្រិតសម្រាំងធនធានកីឡាករបន្តវេន រឹតចំណងមិត្តភាព សាមគ្គីភាព និងកិច្ចសហប្រតិបត្តិការរវាងសិស្សានុសិស្ស»។ លោក ងួន សុភៈ លើកឡើងបែបនេះក្នុងសន្និសីទសារព័ត៌មានកាលពីថ្ងៃទី២៣ ឧសភា នៅទីស្នាក់ការសហភាពសហព័ន្ធយុវជនកម្ពុជារាជធានីភ្នំពេញ។
ជាការប្រកួតប្រជែងដណ្តើមយកពានក៏ពិតមែន តែវាជាឱកាសល្អសម្រាប់យុវជនក្នុងការសម្រេចគោលបំណង ដែលចង់ក្លាយជាកីឡាករអាជីពនាពេលអនាគត។ លោក បែ មករា អ្នកចាត់ទូទៅក្លិបបឹងកេតបាននិយាយថា លោកនឹងចាត់ក្រុមការងារ ដើម្បីសំឡឹងមើលកីឡាករមានទេពកោសល្យក្នុងការប្រកួតនេះ ដើម្បីធ្វើជាយុវជនថ្នាល។ តែយ៉ាងណា នេះគ្រាន់តែជាគោលបំណងតែប៉ុណ្ណោះ ការពិតជាក់ស្តែងអាស្រ័យលើអ្នកជំនាញរបស់ក្លិប និងការបង្ហាញសមត្ថភាពរបស់កីឡាករ។
អ្នកចាត់ការទូទៅរូបនេះបានបន្ថែមថា៖«យើងតែងតែចង់បានកីឡាករល្អៗ ហើយគោលបំណងរបស់ក្លិបចូលរួមរៀបចំពានរង្វាន់នេះ គឺចង់បានកីឡាករល្អៗ ថ្មីៗបន្ថែមទៀត។ យើងតែងតែមានក្រុមបច្ចេកទេសជំនាញតាមដានគ្រប់ការប្រកួត ដើម្បីជ្រើសរើសកីឡាករល្អពិតប្រាកដ។ មានពេលខ្លះយើងសន្យាថានឹងយក តែបែជាយក ដោយសារសមត្ថភាពពួកគេមិនដល់កម្រិតដែលយើងចង់បាន និងមានលក្ខខណ្ឌច្រើនទៀតដូចជាឪពុកម្តាយមិនឯកភាព ឬកីឡាករខ្លួនឯងមិនចង់ធ្វើជាកីឡាករអាជីពជាដើម»។
ពានរង្វាន់នេះ នឹងបើករដូវកាលថ្មីនៅថ្ងៃទី៦ ខែមិថុនា ឆ្នាំ២០១៩ ខាងមុខនេះ ដោយមានក្រុមមកពីគ្រឹះស្ថានចំណេះទូទៅរបស់រដ្ឋ និងឯកជនចំនួន៩ចូលរួម។ ក្រុមទាំងនេះរួមមានវិទ្យា ជា ស៊ីម ច្បារអំពៅ, វិទ្យាល័យឥន្ទ្រទេវី, វិទ្យាល័យចាក់អង្រែ, វិទ្យាល័យឫស្សីកែវ, វិទ្យាល័យ ជា ស៊ីម សាមគ្គី, វិទ្យាល័យបឹងត្របែក, សាលាវេស្ទឡាញន៍, វិទ្យាល័យព្រះស៊ីសុវត្ថិ និងវិទ្យាល័យសម្តេច ហ៊ុន សែន ភ្នំពេញថ្មី។
ការប្រកួតធ្វើឡើងតាមរូបមន្តក្របខណ្ឌមិត្តហ្វូនខេមបូឌានលីគ គឺក្រុមមានពិន្ទុខ្ពស់ជាងគេក្នុងការប្រវិលជុំ Home Away នឹងក្លាយជាជើងឯកតែម្តង ខណៈក្រុមមានពិន្ទុខ្ពស់ជាបន្តបន្ទាប់នឹងទទួលបានចំណាត់ថ្នាក់តាមលំដាប់។ ក្រុមម្ចាស់ជើងឯកទទួលបានថវិកាលើកទឹកចិត្តចំនួន៦០លានរៀល ជើងឯករង៤០លានរៀល និងលេខ៣បាន២០លានរៀល។ ក្រៅពីនេះ ក៏ពានរង្វាន់ផ្សេងៗជាច្រើនទៀតផងដែរ៕