ជាតិ
លោក រ៉ាដូ គ្រោងដាំឪឡឹកពូជពណ៌ស្វាយ និងពណ៌ទឹកប្រាក់ ក្រោយជោគជ័យលើការដាំពូជសាច់លឿង
×![]()
ដោយ: ថ្មីៗ
ភ្នំពេញ៖ លោក មួយ រ៉ាដូ ជាអ្នកដាំបន្លែនិងផ្លែឈើសុវត្ថិភាព នៅភូមិទួល ឃុំអរបួនលើ ស្រុកកោះញែក ខេត្តមណ្ឌលគិរី ដែលធ្លាប់បានទទួលជោគជ័យរួចហើយ លើការដាំឪឡឹកពូជសាច់លឿង។ ដោយមើលឃើញពីទិន្នផលគាប់ចិត្តនេះ លោក រ៉ាដូ ក៏គ្រោងនឹងដាំឪឡឹកពូជពណ៌ស្វាយ និងពណ៌ទឹកប្រាក់ រួមទាំងពូជឪឡឹកទម្ងន់១០០គីឡូបន្ថែមទៀត។
គម្រោងនៃការដាំពូជឪឡឹកប្រភេទទាំងនេះ គឺធ្វើឡើងបន្ទាប់ពីលោក រ៉ាដូ ទទួលបានការបណ្ដុះបណ្ដាលពីមិត្តភក្តិជនជាតិជប៉ុន ដែលបានបង្រៀនលោក ពីរបៀបដាំនៅក្នុងចម្ការផ្ទាល់ ក្នុងផ្ទៃដីទំហំ៤ហិកតា ស្ថិតនៅក្នុងខេត្តមណ្ឌលគិរីតែម្ដង។ ចំណែកឪឡឹកសាច់លឿង ដែលលោក ដូ ដាំបានជោគជ័យល្អចំនួន៣០០០គុម្ពនោះ គឺបានផ្ដល់ទិន្នផលជាទឹកប្រាក់ជិត៧០០០ដុល្លារវិញ ក្នុងរយៈពេលពីរខែនៃការប្រមូលផល។
ថ្លែងប្រាប់សារព័ត៌មាន ThmeyThmey អ្នកដាំបន្លែនិងផ្លែឈើសុវត្ថិភាពរូបនេះ បាននិយាយថា៖«ឪឡឹកនេះ មានរសជាតិផ្អែមឆ្ងាញ់ សាច់ស្រួយខុសពីឪឡឹកសាច់ក្រហមទូទៅ »។
ទីផ្សារឪឡឹកដែលលោក រ៉ាដូ ផ្គត់ផ្គង់នោះរួមមាន ខេត្តមណ្ឌលគិរី រតនៈគិរី និងទីក្រុងភ្នំពេញ។ ក្រៅពីដាំឪឡឹក លោក រ៉ាដូ កំពុងដាំផ្លែឈើមួយចំនួនទៀតដូចជា ស្រកានាគពណ៌ស្វាយ ធុរេន ត្រសក់ផ្អែម ផាសិនលឿង និងផ្លែប៊័រជាដើម។ ជាមួយគ្នាក៏មានដាំបន្លែចម្រុះ ដូចជាទំពាំងបារាំង ប៉េងប៉ោះ ម្ទេសហាវៃ ការ៉ុត និងដំឡូងបារាំង នៅលើផ្ទៃដីសរុប៤ហិកតាទៀតផង។
«ដំណាំទាំងនេះ មានការដាំដុះទៅតាមបច្ចេកទេសត្រឹមត្រូវ មានស្តង់ដារ ដែលធានាបាននូវសុវត្ថិភាពខ្ពស់ដល់អ្នកបរិភោគ។ ខ្ញុំក៏មានគម្រោងនាំចេញបន្លែ និងផ្លែឈើទាំងនេះ ទៅប្រទេសជប៉ុនផងដែរ ព្រោះខ្ញុំមានដៃគូសហការ ជាមួយជប៉ុនស្រាប់។ ប៉ុន្តែអ្វីដែលខ្ញុំត្រូវធ្វើចំពោះមុខ គឺត្រូវពង្រីកការដាំទាំងនេះ ដើម្បីឆ្លើយតបនឹងតម្រូវការក្នុងស្រុក និងឈានដល់ការនាំចេញទៅបរទេស»។ នេះជាការអះអាងរបស់លោក រ៉ាដូ។
វាជារឿងមួយល្អ ដែលកសិកម្មកម្ពុជា ចេះរកគំនិតច្នៃប្រឌិតដាំប្រភេទដំណាំប្លែកៗ សម្រាប់ផ្គត់ផ្គង់ទីផ្សារក្នុងស្រុក និងក្រៅប្រទេស។ នេះជាការលើករបស់លោក សុង ឃាង ប្រធានមន្ទីរកសិកម្ម ខេត្តមណ្ឌលគិរី បានលើកទឹកចិត្តដល់លោក មួយ រ៉ាដូ ឲ្យបន្តកិច្ចការវិស័យកសិកម្មបែបនេះទៀត។
«នេះជាគំរូភាពមួយយ៉ាងល្អក្នុងវិស័យកសិកម្ម ដែលយើងចង់បាន។ យើងនឹងជួយគាំពារដល់កសិករទាំងនេះ ប្រសិនបើត្រូវការយើងជួយ»។ នេះជាការបញ្ជាក់របស់លោក ឃាង ដែលបានបន្ថែមថា បច្ចុប្បន្នផ្ទៃដីដាំដុះបន្លែ និងផ្លែឈើ ទូទាំងខេត្តមណ្ឌលគិរី មានជិត៤០ហិកតា៕
Tag:
កសិកម្ម
ឪឡឹក
មណ្ឌលគិរី
© រក្សាសិទ្ធិដោយ thmeythmey.com
