ជាតិ
សេដ្ឋកិច្ច
ADB ជួយសង់ឧទ្យានថាមពលពន្លឺព្រះអាទិត្យកម្លាំង១០០មេហ្គាវ៉ាត់ នៅកម្ពុជា
× ភ្នំពេញ៖ ធនាគារអភិវឌ្ឍន៍អាស៊ី (ADB) បានអនុម័តផ្តល់កម្ចីជាង២១លានដុល្លារ ដល់កម្ពុជា សម្រាប់សាងសង់ឧទ្យានថាមពលពន្លឺព្រះអាទិត្យកម្លាំង១០០មេហ្គាវ៉ាត់។ កម្ចីនេះ នឹងជួយកម្ពុជាអភិវឌ្ឍធនធានថាមពលកកើតឡើងវិញ ធ្វើពិពិធកម្មប្រភពថាមពល និងពង្រឹងការប្រកួតប្រជែងសេដ្ឋកិច្ចរបស់ខ្លួននៅកម្ពុជា។ សេចក្តីប្រកាសព័ត៌មានរបស់ ADB ដែលចេញផ្សាយនៅថ្ងៃទី២៤ឧសភា បញ្ជាក់ថា កម្ចីជាង២១លានដុល្លារ ក្នុងគម្រោងនេះ មាន១៤លានដុល្លារ ជាកម្ចីឥតសំណង។
សេចក្តីប្រកាសព័ត៌មានដដែល បានឲ្យដឹងថា កម្ចីឥតសំណង១៤លានដុល្លារនេះ ទទួលបានពីមូលនិធិអាកាសធាតុយុទ្ធសាស្ត្រ តាមរយៈកម្មវិធីពង្រីកថាមពលកកើតឡើងវិញ។ បន្ថែមពីនេះ ក៏មានកម្ចីឥតសំណង៥០ម៉ឺនដុល្លារ សម្រាប់ជំនួយបច្ចេកទេស ដែលផ្តល់ដោយមូលនិធិe-Asia និងភាពជាដៃគូចំណេះដឹងនៃប្រទេសកូរ៉េខាងត្បូង ដើម្បីគាំទ្រដល់ការអភិវឌ្ឍសមត្ថភាពរបស់អគ្គិសនីកម្ពុជា (EDC) និង អាជ្ញាធរអគ្គិសនីកម្ពុជា (EAC)។ EDC និង EAC ជានិយ័តករអគ្គិសនីជាតិអំពីបច្ចេកវិទ្យាបម្លែងពន្លឺទៅជាថាមពលអគ្គិសនី និងរៀបចំគម្រោងឧទ្យានថាមពលពន្លឺព្រះអាទិត្យនេះ ដែលស្ថិតនៅក្រោមការគ្រប់គ្រងធនធានរបស់ ADB។
លោក Pradeep Tharakan ប្រធានក្រុមអ្នកឯកទេសផ្នែកការប្រែប្រួលអាកាសធាតុរបស់ADB បាននិយាយថា «ការមានប្រភពថាមពលដែលគួរឲ្យជឿជាក់បាន មាននិរន្តភាព មានតម្លៃសមរម្យ មានសារៈសំខាន់ខ្លាំងណាស់ សម្រាប់ការអភិវឌ្ឍសេដ្ឋកិច្ចរបស់ប្រទេសដែលកំពុងរីកចម្រើនយ៉ាងឆាប់រហ័ស ដូចជាកម្ពុជា។ ជំនួយរបស់ ADB មិនគ្រាន់តែជួយធ្វើពិពិធកម្មប្រភពថាមពលរបស់កម្ពុជា តាមរយៈការអភិវឌ្ឍថាមពលពន្លឺព្រះអាទិត្យប៉ុណ្ណោះទេ។ វាក៏ជួយឲ្យកម្ពុជាសម្រេចបាននូវគោលដៅកាត់បន្ថយឧស្ម័នផ្ទះកញ្ចក់របស់ខ្លួន យោងតាមកិច្ចព្រមព្រៀង ស្តីពីអាកាសធាតុនៅទីក្រុងប៉ារីសផងដែរ»។
គម្រោងឧទ្យានជាតិថាមពលពន្លឺព្រះអាទិត្យ នឹងជួយ EDC ដែលជាសេវាផ្គត់ផ្គង់អគ្គិសនីជាតិរបស់កម្ពុជាអាចសាងសង់ឧទ្យានជាតិថាមពលពន្លឺព្រះអាទិត្យ ដែលមានកម្លាំង១០០មេហ្គាវ៉ាត់ ព្រមទាំងហេដ្ឋារចនាសម្ព័ន្ធពាក់ព័ន្ធផ្សេងៗ ដូចជា ធ្វើផ្លូវចេញ-ចូល របង និងប្រព័ន្ធបង្ហូរទឹក ក្នុងខេត្តកំពង់ឆ្នាំង។ គម្រោងនេះ ក៏កសាងប្រព័ន្ធបញ្ចូនអគ្គិសនី ដែលតភ្ជាប់ទៅនឹងបណ្តាញចែកចាយចម្បងក្បែររាជធានីភ្នំពេញ និងផ្គត់ផ្គង់ថាមពលទៅបណ្តាញចែកចាយជាតិផងដែរ។
គម្រោងឧទ្យានជាតិថាមពលពន្លឺព្រះអាទិត្យ នឹងត្រូវដាក់ដេញថ្លៃឲ្យក្រុមហ៊ុនផលិតថាមពលឯករាជ្យ (IPP) ជាពីរដំណាក់កាល។ ដំណាក់កាលពីទីមួយ មានគោលបំណងផលិតថាមពលក្នុងកម្លាំង៦០មេហ្គាវ៉ាត់ ដែលការិយាល័យភាពជាដៃគូរវាងរដ្ឋ និង ADB កំពុងដើរតួនាទីជាទីប្រឹក្សា ដើម្បីជួយ EDC ក្នុងចេតនា និងរៀបចំដំណើរដេញថ្លៃប្រកួតប្រជែងដោយបើកចំហ។
ក្នុងឆ្នាំ២០១៨ កម្ពុជា អាចផ្គត់ផ្គង់អគ្គសនី បានជាង២ពាន់មេហ្គាវ៉ាត់។ ក្នុងនោះ ថាមពលពីវារីអគ្គិសនីមានជាង១ពាន់០មេហ្គាវ៉ាត់ ដែលស្មើ៦២ភាគរយ និងថាមពលអគ្គិសនីពីឥន្ទនៈហ្វូស៊ីលមាន៧៨០មេហ្គាវ៉ាត់ ស្មើ៣៦ភាគរយ។ ដោយឡែក បច្ចុប្បន្ន កម្ពុជា ផលិតថាមពលពន្លឺព្រះអាទិត្យ បានតែ១០មេហ្គាវ៉ាត់ប៉ុណ្ណោះ។
តាមការសិក្សារបស់ ADB កម្ពុជា អាចបន្ថែមថាមពលពន្លឺព្រះអាទិត្យបានប្រមាណ២០០មេហ្គាវ៉ាត់ ទៅក្នុងបណ្តាញចែកចាយត្រឹមឆ្នាំ២០២១ ដោយប្រើបច្ចេកទេសដែលមានស្រាប់ និងមិនប៉ះពាល់ដល់បណ្តាញចែកចាយ៕
Tag:
ឧទ្យាន
ថាមពលពន្លឺព្រះអាទិត្យ
ADB
© រក្សាសិទ្ធិដោយ thmeythmey.com