ព្រះមហាក្សត្រនាព្រះរាជវត្តមានក្នុងពិធីអបអរខួប២៥ឆ្នាំ «ICC-Angkor» នៅក្រុងប៉ារីស

ជាតិ

សង្គមជាតិ

ព្រះមហាក្សត្រនាព្រះរាជវត្តមានក្នុងពិធីអបអរខួប២៥ឆ្នាំ «ICC-Angkor» នៅក្រុងប៉ារីស

25, May 2019 , 11:58 am

រូបភាព

ព្រះមហាក្សត្រយាងជាព្រះរាជាធិបតីភាពក្នុងពិធីអបអរខួប២៥ឆ្នាំនៃគណៈកម្មាធិការអន្តរជាតិសម្របសម្រួលកិច្ចគាំពារ និងអភិរក្សតំបន់អង្គរ ដែលហៅកាត់ថា អាយ ស៊ី ស៊ី អង្គរដែលរៀបចំនៅវិទ្យាស្ថានជាតិបារាំង។ រូបថត Institut de France

ដោយ: រួបរួម

ព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី កាលពីថ្ងៃទី២៤ ខែឧសភា ទ្រង់បានយាងជាព្រះរាជាធិបតីភាពក្នុងពិធីអបអរខួប២៥ឆ្នាំនៃគណៈកម្មាធិការអន្តរជាតិសម្របសម្រួលកិច្ចគាំពារ និងអភិរក្សតំបន់អង្គរ ដែលហៅកាត់ថា អាយ ស៊ី ស៊ី អង្គរ (ICC-Angkor) ដែលរៀបចំនៅវិទ្យាស្ថានជាតិបារាំង ក្រុងប៉ារីស ប្រទេសបារាំង។

បច្ចុប្បន្ន ICC-Angkor ក៏កំពុងក្លាយជាគំរូមួយ បង្ហាញទៅបណ្តាប្រទេសនានាលើសាកលលោកទៀតផង ដោយសកម្មភាព និងសមិទ្ធផល ដែលICC-Angkor បានអនុវត្តកន្លងមកនោះ គឺការជួសជុលប្រាសាទ និងអភិរក្សបេតិកភណ្ឌ, គម្រោងបណ្តុះបណ្តាលថែទាំប្រាសាទ ស្រាវជ្រាវ និងអភិវឌ្ឍន៍ , លើកតម្លៃរមណីយដ្ឋានអង្គរតាមរយៈក្រមប្រតិបត្តិអង្គរ,សាងសង់សារមន្ទីរព្រះនរោត្តមសីហនុ-អង្គរ និង សារមន្ទីរកុលាលភាជន៍អង្គរនៅភូមិតានី និងសាងសង់សារមន្ទីរវាយនភណ្ឌប្រពៃណីអាស៊ីអាគ្នេយ៍ជាដើម។

បច្ចុប្បន្នសមាជិក ICC-Angkor មានចំនួន៣៧ប្រទេស និងអង្គការអន្តរជាតិចំនួន ១៣ទៀត។ ក្នុងនោះអ្នកជំនាញបច្ចេកទេស មានជាង៣០០នាក់។ បារាំង និងជប៉ុន គឺជាសហប្រធានICC-Angkor ខណៈអាជ្ញាធរជាតិអប្សរាកម្ពុជា និងការិយាល័យតំណាងអង្គការយូណេស្កូប្រចាំព្រះរាជាណាចក្រកម្ពុជា ជាលេខាធិការដ្ឋានវិទ្យាសាស្ត្រអចិន្ត្រៃយ៍។

កាលពីចុងខែធ្នូ ឆ្នាំ២០១៨ ព្រះករុណា ព្រះមហាក្សត្រ នៃព្រះរាជាណាចក្រកម្ពុជា ព្រះអង្គក៏បានយាងជាព្រះរាជាធិបតីដ៏ខ្ពង់ខ្ពស់បំផុត ក្នុងពិធីបិទជាផ្លូវការ នៃពិធីអបអរសាទរខួប២៥ឆ្នាំ ការបង្កើតគណៈកម្មាធិការ អន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់អង្គរ ហៅកាត់ថា អាយ ស៊ី ស៊ី អង្គរ (ICC-Angkor) នាលានព្រះជល់ដំរី ខេត្តសៀមរាប ផងដែរ៕