ការប្រកួតក្របខណ្ឌមិត្តហ្វូនខេមបូឌានលីគបានឈានដល់សប្តាហ៍ទី៩ ដោយនៅថ្ងៃសៅរ៍ ទី២៥ ឧសភា ឆ្នាំ២០១៩នេះ មានការប្រកួតចំនួន៣គូ ដែលរៀបចំនៅទីលានផ្សេងៗគ្នា។ ក្រុមក្រសួងការពារជាតិ(ទ័ព)ត្រូវបើកទ្វារកីឡដ្ឋានស្តាតចាស់ស្វាគមន៍ភ្ញៀវវិសាខា ក្រោយអង្គរថាយហ្គឺរតទល់ជាមួយអគ្គស្នងការដ្ឋាននគរបាលជាតិ(ប៉ូលិស)នៅកីឡដ្ឋានខេត្តសៀមរាប ខណៈអាស៊ីអឺរ៉ុបបើកទ្វារកីឡដ្ឋាន A.E.U Sport Park ទទួលបឹងកេត។
ក្រសួងការពារជាតិប៉ះវិសាខា វេលាម៉ោង៦ល្ងាចនៅកីឡដ្ឋានស្តាតចាស់
នេះអាចចាត់ទុកជាជំនួបដ៏សំខាន់ជាងគេប្រចាំថ្ងៃសោរ៍នេះ ព្រោះក្រុមទាំងពីរមានសមត្ថភាពខ្លាំងប្រហាក់ប្រហែលគ្នា។ ក្រោយចាញ់បឹងកេត ២-០ ក្នុងសប្តាហ៍ទី៥ ក្រសួងការពារជាតិបានបញ្ចប់ក្នុងលទ្ធផលស្មើ ១-១ ជាមួយសូលទីឡូអង្គរ បន្ទាប់មកក្រុមនេះបានយកឈ្នះយុវជនអាយុក្រោម១៨ឆ្នាំបាទី ៤-៣ តែចាញ់ក្រុមគីរីវង់សុខសែនជ័យ ៤-១។ ក្រោយបរាជ័យនេះ គេសង្កេតឃើញមិនមានវត្តមានលោក ភា សុភ័ក្ត្រា ដឹកនាំបង្វឹកក្រុមកីឡាករក្រសួងការពារជាតិនោះទេ។ តែយ៉ាងណា គេមិនដឹងពីមូលហេតុនៃអវត្តមាននេះឡើយ។
ចំណែកក្រុមវិសាខាត្រូវការឈ្នះទ័ពនៅថ្ងៃនេះ ដើម្បីឡើងទៅឈរកំពូលតារាងបណ្តោះអាសន្ន។ វិសាខាស្គាល់បរាជ័យតែមួយលើកប៉ុណ្ណោះក្នុងចំណោម៨ប្រកួតរបស់គេ ដោយកាលនោះចាញ់ម្ចាស់ផ្ទះអង្គរថាយហ្គឺរក្នុងលទ្ធផល ២-១។ បន្ទាប់មក ពួកគេបានស្តារមុខមាត់ឡើងវិញ តាមរយៈយកឈ្នះគូប្រជែង៣ប្រកួតជាប់គ្នា ដោយលត់កំពង់ចាម ១៤-០ ឈ្នះបឹងកេត ៣-២ និងឈ្នះ U18 បាទី ៥-១។ បច្ចុប្បន្នក្រុមនេះស្ថិតនៅលេខរៀងទី៣មាន១៩ពិន្ទុ ក្រោយឈ្នះ៦ ស្មើ១ និងចាញ់១ ខណៈទ័ពស្ថិតនៅលេខរៀងទី៥មាន១៤ពិន្ទុ ជាមួយជ័យជម្នះ៤ ស្មើ២ និងចាញ់២។
អង្គរថាយហ្គឺរប៉ះអគ្គស្នងការដ្ឋាននគរបាលជាតិ វេលាម៉ោង៣:៣០នាទីរសៀលនៅកីឡដ្ឋានខេត្តសៀមរាប
ក្រោយណាហ្គាវើលធ្វើឲ្យស្គាល់បរាជ័យលើកដំបូងកាលពីសប្តាហ៍មុនជាមួយលទ្ធផល ៤-០ អង្គរថាយហ្គឺររំពឹងប្រើភាពជាម្ចាស់ផ្ទះយកឈ្នះប៉ូលិសនៅថ្ងៃនេះ ដើម្បីស្តារមុខមាត់ ក៏ដូចជាពង្រឹងទីតាំងរបស់ខ្លួន។ បច្ចុប្បន្នមានមូលដ្ឋាននៅខេត្តសៀមរាបមួយនេះស្ថិតនៅលេខរៀងទី៤មាន១៥ពិន្ទុ ក្រោយ៨ប្រកួតឈ្នះ៤ ស្មើ៣ និងចាញ់១។ មុនចាញ់ណាហ្គាវើលក្នុងសប្តាហ៍ទី៨ ក្រុមនេះបានបញ្ចប់ក្នុងលទ្ធផលស្មើ ១-១ ជាមួយព្រះខ័នរាជស្វាយរៀង ដែលលទ្ធផលនេះធ្វើឲ្យព្រះខ័នរាជស្វាយរៀងធ្លាក់ពីកំពូលតារាងមកឈរលេខរៀងទី២។ បន្ទាប់មកក្រុមនេះយកឈ្នះអាស៊ីអឺរ៉ុបក្នុងលទ្ធផល ៦-១។
ចំណែកក្រុមអគ្គស្នងការដ្ឋាននគរបាលជាតិស្ថិតនៅលេខរៀងទី១២មាន៧ពិន្ទុ ក្រោយឈ្នះ២ ស្មើ១ និងចាញ់៥។ ក្រោយស្មើ ២-២ ជាមួយសូលទីឡូអង្គរ ប៉ូលិសចាញ់គីរីវង់សុខសែនជ័យ ៣-២ ចាញ់ភ្នំពេញក្រោន ៣-០ តែយកឈ្នះអគ្គិសនីកម្ពុជា ១-០។
អាស៊ីអឺរ៉ុបប៉ះបឹងកេត វេលាម៉ោង៣:៣០នាទីរសៀល នៅកីឡដ្ឋាន A.E.U Sport Park
អាស៊ីអឺរ៉ុបបានយកឈ្នះកំពង់ចាមក្នុងលទ្ធផល ៥-០ កាលពីសប្តាហ៍មុន បន្ទាប់ពីពួកគេបញ្ចប់ក្នុងលទ្ធផលស្មើ ២-២ អគ្គិសនីកម្ពុជា និងចាញ់អង្គរថាយហ្គឺរ ៦-១។ បច្ចុប្បន្នក្រុមនេះស្ថិតនៅលេខរៀងទី៧មាន១០ពិន្ទុក្រោយឈ្នះ៣ស្មើ១ ចាញ់៤។ បឹងកេតត្រូវការជាដាច់ខាតនៅថ្ងៃនេះ ដើម្បីរក្សារក្សាគម្លាតកុំឆ្ងាយពីក្រុមកំពូលតារាង។ ពួកគេស្ថិតនៅលេខ៦មាន១៤ពិន្ទុ ក្រោយឈ្នះ៤ ស្មើ និងចាញ់២ ខណៈក្រុមកំពូលតារាងណាហ្គាវើលមាន២១ពិន្ទុ។ សម្រាប់៣ប្រកួតចុងក្រោយ ពួកគេយកឈ្នះយុវជនអាយុក្រោម១៨ឆ្នាំបាទី ៣-១ ចាញ់វិសាខា ៣-២ និងស្មើ ២-២ ជាមួយព្រះខ័នរាជស្វាយរៀង៕