ជាតិ
នយោបាយជាតិ
លោក សម រង្ស៊ី សំពះព្រះសង្ឃ ក្នុងពិធីរម្លឹកខួប៤០ឆ្នាំ នៃការរួចផុតពីរបបខ្មែរក្រហម ដែលពិធីនេះ រៀបចំដោយអតីតគណបក្សប្រឆាំង នៅមជ្ឈមណ្ឌលប្រល័យពូជសាសន៍ជើងឯក កាលពីខែមេសា ឆ្នាំ២០១៥ (រូបពី AFP)
×![]()
ដោយ: ថ្មីៗ
ក្រុមអ្នកប្រឆាំងនៅក្រៅប្រទេស នឹងរៀបចំពិធីប្រសិទ្ធពរជ័យជូន លោក សម រង្ស៊ី និង អតីតថ្នាក់ដឹកនាំគណបក្សប្រឆាំង មុននឹងវិលមកប្រទេសកម្ពុជាវិញ។ គេ បានឃើញខិត្តប័ណ្ណ ដែលត្រូវបានបង្ហោះលើបណ្តាញសង្គម ដើម្បីជូនដំណឹងដល់អ្នកគាំទ្រលោក សម រង្ស៊ី អំពីការរៀបចំពិធីនេះ។
ពិធីប្រសិទ្ធពរជ័យនេះ នឹងប្រាព្ធឡើងក្នុងវត្តខ្មែរមួយឈ្មោះ មុនីសុតារាម ដែលស្ថិតក្រុង Minneapolis រដ្ឋ Minnesota សហរដ្ឋអាមេរិក នាថ្ងៃទី៧ ខែមិថុនា ឆ្នាំ២០១៩ ដើម្បីបួងសួងឲ្យលោក សម រង្ស៊ី និងសហការីរបស់លោក ទទួលបានជ័យក្នុងការធ្វើមាតុភូមិនិវត្ត និងឈានទៅរកការផ្លាស់ប្តូរនៅកម្ពុជា។ តាមរយៈខិត្តប័ណ្ណនោះ ក្រុមអ្នកប្រឆាំង បានអំពាវនាវដល់អ្នកគាំទ្រលោក សម រង្ស៊ី ទាំងនៅក្នុងសហរដ្ឋអាមេរិក និងកាណាដា ឲ្យចូលរួមក្នុងពិធីប្រសិទ្ធពរជ័យនេះ។
ការរៀបចំពិធីប្រសិទ្ធពរជ័យខាងលើ ហាក់ចង់បង្ហាញសញ្ញាថា លោក សម រង្ស៊ី នឹងធ្វើមាតុភូមិនិវត្តនៅឆ្នាំ២០១៩នេះពិតប្រាកដមែន មិនមែនគ្រាន់តែប្រកាសចោលនោះទេ។ ថ្មីៗនេះ លោក សម រង្ស៊ី បានប្រកាសថា លោក នឹងឈានជើងចូលប្រទេសថៃ ដើម្បីប្រមូលប្រជាពលរដ្ឋខ្មែរ វិលមកកម្ពុជាជាមួយលោក។ លោក សង្ឃឹមថា ប្រជាពលរដ្ឋខ្មែរនៅតាមបណ្តាប្រទេសផ្សេងទៀត ដូចជា កូរ៉េ ម៉ាឡេស៊ី សហរដ្ឋអាមេរិក និង កាណាដា ជាដើម ក៏នឹងមកជាមួយលោកដែរ។
យ៉ាងណាក៏ដោយ គណបក្សកាន់អំណាច ដូចជាមិនជឿឡើយថា លោក សម រង្ស៊ី ហ៊ានវិលមកកម្ពុជាវិញ។ គណបក្សកាន់អំណាច ធ្លាប់ចំអកជាញឹកញាប់ថា «លោក សម រង្ស៊ី បានតែប្រកាសប៉ុណ្ណោះ»។
សម្តេចនាយករដ្ឋមន្ត្រី ហ៊ុន សែន ព្រមានទុកជាមុនថា «គុកនិងខ្នោះ បានត្រៀមសម្រាប់លោក សម រង្ស៊ី រួចហើយ»។ ចំណែក អ្នកនាំពាក្យរដ្ឋាភិបាល ក៏ប្រកាសរួចហើយដែរថា អាជ្ញាធរ នឹងចាត់វិធានការលើលោក សម រង្ស៊ី បើមានដីកាពីតុលាការ៕
Tag:
សម រង្ស៊ី
មាតុភូមិនិវត្ត
© រក្សាសិទ្ធិដោយ thmeythmey.com
