ព្រះអង្គ ប៊ុន សាលួត តស៊ូការពារធម្មជាតិនៅអន្លង់វែង រហូតញ៉ាំងឲ្យគេថតភាពយន្តឯកសារពីព្រះអង្គ

ជាតិ

បទយកការណ៍ / បទសម្ភាសន៍

ព្រះអង្គ ប៊ុន សាលួត តស៊ូការពារធម្មជាតិនៅអន្លង់វែង រហូតញ៉ាំងឲ្យគេថតភាពយន្តឯកសារពីព្រះអង្គ

25, May 2019 , 4:59 pm

រូបភាព

ដោយ: ប៉ូ សាគុន

ភ្នំពេញ៖ ភាពយន្តឯកសារ«ឆ្មាំព្រៃ» ដែលបង្ហាញពីការការពារដែនអភិរក្សព្រៃសង្ឃរុក្ខវ័ន បាន ជោគជ័យ ចេញពីកិច្ចខិតខំប្រឹងប្រែងរបស់ព្រះតេជគុណ ប៊ុន សាលួត បានក្លាយជាគំរូដ៏ប្រពៃ សម្រាប់ក្មេងជំនាន់ក្រោយអនុវត្តតាម។ យុវជន ដែលបានចូលទស្សនាភាពយន្តឯកសារនេះ មានកម្លាំងចិត្តកាន់តែច្រើន ក្នុងការធ្វើឱ្យខ្លួនជាផ្នែកមួយជួយការពារតំបន់អភិរក្សព្រៃធម្មជាតិ។

ភាពយន្តឯកសារដែលមានរយៈពេល៥៦នាទី បានបង្ហាញពីទំនាក់ទំនងរវាងព្រៃឈើក្នុងស្រុកអន្លង់វែង ជាមួយនឹងរបបខ្មែរក្រហម។ អន្លង់វែង ដែលជាតំបន់កាន់កាប់ចុងក្រោយរបស់ខ្មែរក្រហម នាចុងទសវត្សរ៍ឆ្នាំ៩០ ក្លាយមកជាតំបន់សន្តិភាព និងជាតំបន់ដ៏ស្រស់បំព្រងសម្រាប់កម្ពុជានាពេលបច្ចុប្បន្ន។ ភាពយន្តឯកសាររឿង«ឆ្មាំព្រៃ»នេះ បានបញ្ចាំងក្នុងសាលាឆាន់វត្តលង្ការ។ អ្នកចូលរួមប្រមាណ៦០០អង្គ និងនាក់ សុទ្ធតែតាមដានវីដេអូ «ឆ្មាំព្រៃ» យ៉ាងយកចិត្តទុកដាក់។

និស្សិត ខូវ ប្រុស ដែលបានទស្សនាវីដេអូឯកសារនេះ បង្ហាញពីការយល់ឃើញរបស់ខ្លួនថា បើមនុស្សគ្រប់គ្នាមិនចូលរួមការពារព្រៃឈើ នោះវានឹងបាត់បង់។ ប្រុស បានឱ្យតម្លៃព្រះតេជគុណ ប៊ុន សាលួត ថាជាបុគ្គលគំរូ ដ៏សំខាន់ដែលបានការពារព្រៃឈើ សម្រាប់ក្មេងជំនាន់ក្រោយ។ ស្របពេលមនុស្សដទៃទៀតជជែកគ្នាពីនេះពីនោះ យុវជនរូបនេះ សង្កត់ធ្ងន់ថា ការចូលរួមការពារព្រៃឈើ និងធនធានធម្មជាតិ ត្រូវពឹងផ្អែកខ្លាំងលើស្មារតីតាំងចិត្តខ្ពស់ ពីយុវជន និងមនុស្សរស់ក្នុងសង្គម ទើបអាចធ្វើទៅបាន។

ស្ថិតក្នុងវ័យសិក្សានេះ ប្រុស បានចូលរួមសកម្មភាពសង្គម តាមរយៈការផ្សព្វផ្សាយពីការការពារបរិស្ថាន ការការពារព្រៃឈើ និងធនធានធម្មជាតិជាច្រើនទៀត នៅតាមបណ្ដាខេត្តផ្សេងៗ។ បុរសវ័យ២១ឆ្នាំមកពីព្រៃវែង ដែលនឹងធ្វើការទាក់ទងនឹងបរិស្ថាន ក្រោយពីគាត់រៀនចប់ថ្នាក់បរិញ្ញាបត្រ បានបញ្ជាក់ដូច្នេះ ៖«ខ្ញុំក៏បានចូលរួមផ្សព្វផ្សាយពីបញ្ហាបរិស្ថាននៅក្នុងសហគមន៍ តាមបណ្ដាខេត្តនានាច្រើនដែរ។ ពេលរៀនចប់ខ្ញុំនឹងធ្វើការទាក់ទងនឹងបរិស្ថាន។ ខ្ញុំយល់ថាការងារនេះទាល់តែមានការតាំងចិត្តខ្ពស់ ទើបធ្វើបានល្អ»។

ចំណែកកញ្ញា សាយ លឹមជូ វិញ ចាប់អារម្មណ៍ចំពោះការលះបង់របស់ព្រះតេជគុណ ប៊ុន សាលួត ក្នុងការការពារដែនព្រៃសង្ឃរុក្ខវ័ន។ នារីសម្ដីមួយៗច្បាស់ៗរូបនេះ បានមើលឃើញពីជោគជ័យក្នុងការកៀងគរយុវជន និងប្រជាពលរដ្ឋ រួមទាំងអ្នកពាក់ព័ន្ធផ្សេងទៀត ដើម្បីការពារដែនអភិរក្ស។ មិនខ្វល់ពីសំឡេងរំខាននៅជុំវិញ និស្សិតអាយុ២១ឆ្នាំរូបនេះ បង្ហាញអារម្មណ៍មោទកភាពចំពោះលទ្ធផលរបស់ព្រៃសង្ឃរុក្ខវ័ន ដែលបានក្លាយជាគំរួដ៏ត្រចះត្រចង់ ដល់យុវជនជំនាន់ក្រោយឆ្លុះបញ្ចាំងពីខ្លួនឯង។ កញ្ញាបន្ថែមទាំងសម្ដីម៉ឺងម៉ាត់ ៖«លទ្ធផលរបស់ព្រះសង្ឃ ប៊ុន សាលួត និងដែនព្រៃសង្ឃរុក្ខវ័ន គឺជាគំរូដ៏ល្អសម្រាប់ក្មេងជំនាន់ក្រោយ ឱ្យពួកគាត់ឆ្លុះបញ្ចាំងពីខ្លួនឯង ថាតើពួកគាត់គួរធ្វើយ៉ាងណាខ្លះ ដើម្បីបរិស្ថាន»?

ជាតួអង្គសំខាន់ក្នុងវីដេអូឯកសារ “ឆ្មាំព្រៃ “ ព្រះតេជគុណ ប៊ុន សាលួត បានធ្វើការងារនេះ តាំងពីឆ្នាំ២០០០មកម្ល៉េះ។ តាមបទពិសោធនៅតំបន់ផ្សេង ឬខេត្តផ្សេងៗទៀត ការការពារព្រៃអភិរក្សឬសត្វព្រៃ គឺជាការងារប្រឈមគ្រោះថ្នាក់ខ្លាំងបំផុតជាមួយឈ្មួញទុច្ចរិត។

ទោះជាយ៉ាងណាក៏ដោយ ព្រះតេជគុណ ប៊ុន សាលួត បានការពារដីក្នុងដែនអភិរក្សព្រៃសង្ឃរុក្ខវ័នបាន១០០ភាគរយ ព្រៃឈើបានប្រមាណ៩៥ភាគរយ និងសត្វព្រៃប្រមាណ៧០ភាគរយ ព្រោះព្រះអង្គតែងយកព្រះធម៌មកដោះស្រាយបញ្ហា។ ព្រះអង្គមិនមានអាវុធការពារព្រះកាយអ្វីទាំងអស់ពេលចុះល្បាតព្រៃ។ «យើងដោះស្រាយជាមួយគាត់ដោយយកព្រះធម៌ទៅនិយាយ និងសួររកឯកសារពាក់ព័ន្ធពីគាត់។ កាលពីឆ្នាំ២០០៨ និងឆ្នាំ២០១៧ យើងមានបញ្ហាប្រឈមច្រើនដែរ តែយើងមិនមានគ្រោះថ្នាក់អ្វីទេ ព្រោះយើងតែងដោះស្រាយបញ្ហាដោយសន្តិវិធី»។ នេះជាការបញ្ជាក់បន្ថែមរបស់ព្រះតេជគុណ ប៊ុន សាលួត។

ព្រោះតែជោគជ័យក្នុងការការពារដែនអភិរក្សព្រៃសង្ឃរុក្ខវ័នលើផ្ទៃដី ១៨,២៦១ហិកតា បានជំរុញទឹកចិត្តថ្នាក់ដឹកនាំកំពូលសម្ដេចនាយករដ្ឋមន្ត្រី ឱ្យផ្ដល់តំបន់ការពារបន្ថែមសរុបផ្ទៃដីដល់ទៅ ៣០២៥៤ហិកតា ដល់ព្រះអង្គការពារបន្ត។ ព្រះអង្គសង្កត់ធ្ងន់ដូច្នេះថា« ព្រោះតែអាត្មាបានដើរត្រូវតួនាទី ទើបសម្ដេចនាយករដ្ឋមន្ត្រីបានផ្ដល់តំបន់បន្ថែម ឱ្យអាត្មាការពារបន្ត។ បើអាត្មាធ្វើការងារមិនបានជោគជ័យទេ រដ្ឋាភិបាលនឹងដកយកទៅវិនិយោគ ដូច្នេះអាត្មាប្រឹងប្រែងណាស់»។

ជាផលិតករវីដេអូឯកសារ "ឆ្មាំព្រៃ" លោក អ៊ូច មករា បានចំណាយពេលរហូតដល់ទៅជិតមួយឆ្នាំ ទម្រាំផលិតបានវីដេអូឯកសារដែលមានរយៈពេល៥៦នាទីនេះ។ បានស្គាល់ដែនព្រៃសង្ឃរុក្ខវ័ន ស្គាល់ព្រះសង្ឃ ប៊ុន សាលួត និងការងារការពារបរិស្ថានរបស់ព្រះអង្គ តាមរយៈដំណើរទស្សនាចរទៅតំបន់អន្លង់វែងជាច្រើនលើក។ លោក អ៊ូច មករា បានមើលឃើញពីការលះបង់មួយដែលគួរជាគំរូសម្រាប់ក្មេងជំនាន់ក្រោយ។

ទោះជាយ៉ាងណាក៏ដោយ ដំណើរការថតភាពយន្តឯកសារនេះ មិនមែនជារឿងងាយឡើយ ជាពិសេសការផ្ដិតយករូបភាពសត្វព្រៃ។ បុរសអាយុ៣០ឆ្នាំដែលមានស្រុកកំណើតនៅទីក្រុងភ្នំពេញរូបនេះ សង្ឃឹមថាភាពយន្តឯកសាររឿង “ឆ្មាំព្រៃ" នឹងក្លាយជាផ្នែកមួយជួយជំរុញទឹកចិត្តអ្នកទស្សនា ស្វែងយល់នឹងគាំទ្រការងាររបស់ព្រះអង្គ ប៊ុន សាលួត។

សូមបញ្ជាក់ថា បច្ចុប្បន្នព្រះសង្ឃ ប៊ុន សាលួត កំពុងការពារដែនព្រៃសង្ឃរុក្ខវ័ន ដែលមាន៣ស្រុកគឺស្រុកអន្លង់វែង ស្រុកចុងកាល់ និងស្រុកសំរោង ក្នុងផ្ទៃដីសរុបចំនួន ៣០,២៥៤ហិកតា៕