ក្រុមហ៊ុនចិន នឹងធ្វើឡសម្ងួតនិងឃ្លាំងក្នុងខេត្ត៧ ដែលស្តុកស្រូវបាន១លានតោន

ជាតិ

ក្រុមហ៊ុនចិន នឹងធ្វើឡសម្ងួតនិងឃ្លាំងក្នុងខេត្ត៧ ដែលស្តុកស្រូវបាន១លានតោន

26, May 2019 , 1:19 pm

រូបភាព

រូបភាពពីក្រសួងពាណិជ្ជកម្ម

ដោយ: ថ្មីៗ

ភ្នំពេញ៖ ក្រុមហ៊ុនចិន Henan Yuguang International Economic & Technical Cooperation គ្រោងសាងសង់ឡសម្ងួតស្រូវ ដែលអាចសម្ងួតស្រូវបាន១៣ពាន់តោនក្នុងមួយថ្ងៃ និងឃ្លាំងស្រូវដែលអាចស្តុកស្រូវបាន១លានតោន នៅតាមបណ្តាខេត្តមួយចំនួនក្នុងប្រទេសកម្ពុជា។ នេះបើតាមការចេញផ្សាយលើទំព័រហ្វេសប៊ុករបស់ក្រសួងពាណិជ្ជកម្ម។

ជុំវិញគម្រោងសាងសង់ឃ្លាំងនិងឡសម្ងួតស្រូវនេះ លោក ស៊ាន ថៃ អ្នកនាំពាក្យក្រសួងពាណិជ្ជកម្ម ប្រាប់សារព័ត៌មានថ្មីៗ នៅថ្ងៃទី២៤ឧសភានេះថា «ឡសម្ងួតស្រូវនិងឃ្លាំងស្រូវ នឹងសាងសង់១២កន្លែង នៅខេត្តចំនួន៧ ដែលសម្បូរធនធានស្រូវ»។ លោក ស៊ាន ថៃ បន្តថា គម្រោងសាងសង់ អាចនឹងចាប់ផ្ដើមនៅចុងឆ្នាំនេះឬដើមឆ្នាំក្រោម ហើយអាចនឹងប្រើពេលប្រហែល១ឆ្នាំក្នុងការសាងសង់។

កាលពីថ្ងៃទី២៣ឧសភានេះ លោក ប៉ាន សូរស័ក្ដិ រដ្ឋមន្រី្តក្រសួងពាណិជ្ជកម្ម បានជួបពិភាក្សាជាមួយលោក ប៊ី គង់មីន (BI Guangmin) ប្រធានក្រុមប្រឹក្សានៃក្រុមហ៊ុន Henan Yuguang International Economic & Technical Cooperation អំពីគម្រោងសាងសង់ឃ្លាំងស្រូវនិងឡសម្ងួតស្រូវ។ ក្នុងកិច្ចពិភាក្សានេះ លោក ប៊ី គង់មីន បានលើកឡើងថា ទីតាំងនៃការសាងសង់ ក្រុមហ៊ុន នឹងសាងសង់ក្នុងខេត្តដែលមានសក្តានុពលផលិតស្រូវអង្ករ។ ក្រោយពេលបញ្ចប់ការសាងសង់ គម្រោងនេះនឹងជួយបង្កើនការនាំចេញអង្ករកម្ពុជាទៅទីផ្សារអន្តរជាតិក្នុងមួយឆ្នាំ៥០ម៉ឺនតោន។ ទន្ទឹមនេះដែរ លោក ប៊ី គង់មីន បានស្នើសុំឲ្យលោករដ្ឋមន្រី្ត ជំរុញគម្រោងសាងសង់ ដើម្បីអាចអនុវត្តបានឆាប់ៗ។

ពាក់ព័ន្ធនឹងគម្រោងនេះ លោក ប៉ាន សូរស័ក្ដិ បានស្នើឲ្យលោក ប៊ី គង់មីន សហការជាមួយក្រុមហ៊ុនហ្គ្រីនត្រេដ ដើម្បីរៀបចំកិច្ចសន្យាវិស្វកម្ម និងកិច្ចព្រមព្រៀងស្ដីពីការបង្កើតក្រុមហ៊ុនចម្រុះកម្ពុជា-ចិន។ ក្រៅពីនេះ មានកិច្ចព្រមព្រៀងសហប្រតិបត្តិការ និងគ្រប់គ្រងរវាងរដ្ឋាភិបាលកម្ពុជា និងក្រុមហ៊ុនវិនិយោគជាដៃគូ ដើម្បីជំរុញកិច្ចការទៅមុខដោយរលូននិងទទួលបានជោគជ័យ។ លើសពីនេះ រដ្ឋមន្ត្រីពាណិជ្ជកម្ម បានគ្រាំទ្រពេញទំហឹង លើគម្រោងខាងលើ ហើយបានបង្ហាញអំពីគោលនយោបាយស្រូវអង្ករ និងយុទ្ធសាស្ត្រសមាហរណកម្មពាណិជ្ជកម្មកម្ពុជា (CTIS)។

សូមបញ្ជាក់ថា កាលពីខែវិច្ឆិកា ឆ្នាំ២០១៧ រដ្ឋាភិបាលកម្ពុជា បានចុះអនុស្សរណៈយោគយល់គ្នាស្តីពីគម្រោងជំរុញផលិតកម្មស្រូវ និងការនាំចេញអង្ករជាមួយប្រទេសចិន។ ភាគីកម្ពុជា តំណាងដោយក្រសួងសេដ្ឋកិច្ច និងក្រសួងពាណិជ្ជកម្ម ខណៈភាគីចិនតំណាងដោយក្រុមហ៊ុន Henan Yuguang International Economic & Technical Cooperation, ធនាគារនីហរ័ណ-អាហរ័ណចិន និងក្រុមហ៊ុនស៊ីទីកហ្គ្រុប។ នៅក្នុងអនុស្សរណៈ ក្រុមហ៊ុន Henan Yuguang International Economic & Technical Cooperation នឹងទទួលការងារសាងសង់ឡសម្ងួត និងឃ្លាំងស្តុកស្រូវ-អង្ករ នៅក្នុងប្រទេសកម្ពុជា៕