អន្តរជាតិ
លោក ត្រាំ បើកភ្លើងខៀវឲ្យលោក អាបេ ទៅសម្របសម្រួលបញ្ហាជាមួយអ៊ីរ៉ង់
× ប្រធានាធិបតីអាមេរិក ដូណាល់ ត្រាំ នៅតែចង់ដោះស្រាយបញ្ហាជាមួយអ៊ីរ៉ង់ដោយការចរចាដដែល។ ពីទីក្រុងតូក្យូ លោក ត្រាំ បានផ្ញើសារទៅកាន់ទីក្រុងតេហេរ៉ង់ថា បើអ៊ីរ៉ង់ចង់ចរចា អាមេរិកក៏មិនទោមនស្សអ្វីដែរ។ យ៉ាងណាមិញ សម្រាប់កាលៈទេសៈបច្ចុប្បន្ន ការចរចាដោយផ្ទាល់រវាងអាមេរិក និងអ៊ីរ៉ង់ ទំនងមិនអាចកើតឡើងបានឡើយ។ ជប៉ុនដែលជាមិត្តល្អរបស់ភាគីទាំងពីរ ចង់ចូលខ្លួនជួយដោះស្រាយប្រឈមគួរឲ្យបារម្ភនេះ។
ជាថ្មីម្ដងទៀត ប្រធានាធិបតីអាមេរិក ដូណាល់ ត្រាំ បញ្ចេញសារមានន័យទន់ភ្លន់ទៅកាន់អ៊ីរ៉ង់ ស្របពេលដែលភាពតានតឹងជាមួយសត្រូវប្រវត្តិសាស្ត្រមួយនេះនៅតែតានតឹងដដែល។ អ្វីដែលគេមើលឃើញនោះ រដ្ឋបាលទីក្រុងវ៉ាស៊ីនតោន បានបង្ហាញជំហរចម្រុះគ្នាលើបញ្ហាប្រឈមជាមួយអ៊ីរ៉ង់ ដោយពេលខ្លះមន្ត្រីក្រោមបង្គាប់លោក ត្រាំ គំរាមប្រើធម៌ក្ដៅប្រឆាំងទីក្រុងតេហេរ៉ង់ ហើយពេលខ្លះទៀត បង្ហាញជំហររាងទន់បន្តិចវិញ ខណៈពេលអ៊ីរ៉ង់វិញ ក៏ប្រកាន់ជំហររឹងប៉ឹងតែម្ដង។
មុនការចរចាផ្លូវការជាមួយនាយករដ្ឋមន្ត្រីជប៉ុន ស៊ីនហ្សូ អាបេ នៅថ្ងៃទី២៧ ខែឧសភា លោក ត្រាំ អះអាងថា អ៊ីរ៉ង់ចង់ជជែកជាមួយអាមេរិក ហើយបើសិនជាដូច្នោះមែន អាមេរិកក៏ចង់ជជែកជាមួយអ៊ីរ៉ង់វិញដែរ។ យ៉ាងណាមិញ ប្រធានាធិបតីអាមេរិករូបនេះ មិនបញ្ជាក់ទេថា ការចរចាអាចធ្វើឡើងនៅពេលណាដែរ ហើយឲ្យរង់ចាំមើលសិន ព្រោះគ្មាននរណាចង់ឲ្យរឿងអាក្រក់កើតឡើយរាប់ទាំងលោក អាបេ ដែលលោក ត្រាំ ជឿថា ក៏មានទំនាក់ទំនងល្អជាមួយក្បាលម៉ាស៊ីនដឹកនាំអ៊ីរ៉ង់ដែរ។
ប្រមុខរដ្ឋាភិបាលជប៉ុនរូបនេះ ត្រូវបានរាយការណ៍ថា កំពុងរៀបចំដំណើរទស្សនកិច្ចមួយទៅកាន់ទឹកដីអ៊ីរ៉ង់ក្នុងគោលដៅសម្របសម្រួលបញ្ហាដែលកំពុងក្ដៅនៅតំបន់មជ្ឈិមបូព៌ា។ លោក ត្រាំ ឯណេះវិញ ហាក់បានបើកភ្លើងខៀវឲ្យលោក អាបេ ដូចគ្នាដែរ។ ដោយចង់សំដៅដល់គម្រោងទស្សនកិច្ចរបស់លោក អាបេ នៅអ៊ីរ៉ង់នោះ ប្រធានាធិបតីអាមេរិករូបនេះបញ្ជាក់ថា យើងនឹងដឹងពីអ្វីដែលកើតឡើង ហើយវាគឺរឿងល្អ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ការប្រឈមមុខរវាងអាមេរិក និងអ៊ីរ៉ង់ ឡើងកម្ដៅខ្លាំងតាំងពីពេលអាមេរិកដើរចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ។ ចាប់ពេលនោះ អាមេរិកបានដាក់សម្ពាធផ្ទួនលើអ៊ីរ៉ង់ចាប់តាំងពីការផ្ដាច់ការនាំចេញប្រេងរហូតដល់ការរឹតត្បិតការនាំចេញលោហៈផង។ ការវិវត្តចុងក្រោយនេះនៅតំបន់ឈូងសមុទ្រពែរ្ស រឹតតែធ្វើឲ្យគេឯងព្រួយបារម្ភខ្លាំង ក្រោយអាមេរិកបញ្ជូននាវាដឹកយន្តហោះ និងយន្តហោះទម្លាក់គ្រាប់បែកទៅកាន់តំបន់នោះដើម្បីទប់ទល់ការគំរាមរបស់អ៊ីរ៉ង់។
ចំណែកអ៊ីរ៉ង់វិញ មិនបានបង្ហាញជំហររាថយនឹងការគំរាមរបស់អាមេរិកឡើយ។ ជារឿយៗ មន្ត្រីយោធាអ៊ីរ៉ង់អួតអាងពីសមត្ថភាពរបស់ខ្លួន ហើយតែងគំរាមបាញ់ពន្លិចនាវាចម្បាំងរបស់អាមេរិកទៀតផង។ ចុងក្រោយនេះ មន្ត្រីយោធាជាន់ខ្ពស់អ៊ីរ៉ង់ម្នាក់បានហៅអាមេរិកជាបិសាច ហើយបោះសម្ដីថា ការចរចាជាមួយបិសាច មិនបានផលអ្វីឡើយ៕
Tag:
អាមេរិក
ជប៉ុន
អ៊ីរ៉ង់
ដូណាល់ ត្រាំ
ស៊ីនហ្សូ អាបេ
© រក្សាសិទ្ធិដោយ thmeythmey.com