នៅចិន រថយន្តចាក់ទឹកជំនួសប្រេងឥន្ធនៈ អាចរត់បានចម្ងាយ៥០០គីឡូម៉ែត្រ?

រថយន្ត

អន្តរជាតិ

27, May 2019 , 7:19 pm

រូបភាព

ដោយ:

ក្រុមហ៊ុនរថយន្តចិនមួយ បានអះអាងថា ខ្លួនបានបង្កើតរថយន្តដើរដោយថាមពលអ៊ីដ្រូសែន ដែលអាចធ្វើដំណើរបានចម្ងាយដល់ ៥០០គីឡូម៉ែត្រ ដោយគ្រាន់តែចាក់ទឹក។

រថយន្តគំរូដំបូង ដែលបានផលិតឡើងដោយក្រុមហ៊ុន Qingnian Cars ត្រូវបានគេជិះសាកល្បងជាលើកដំបូង កាលពីថ្ងៃពុធ ទី២២ ឧសភា កន្លងទៅ។ តាមការចុះផ្សាយរបស់កាសែតក្នុងស្រុកចិន Nanyang Daily ក្រុមហ៊ុនផលិតរថយន្តនេះ មានមូលដ្ឋានក្នុងទីក្រុង ណានយ៉ាង (Nanyang) ខេត្ត ហៀណាន ប្រទេសចិន ។

ជុំវិញការសាកល្បងនេះ លោក Pang Qingnian អគ្គនាយកក្រុមហ៊ុនផលិតរថយន្តខាងលើ បានអះអាងប្រាប់ក្រុមអ្នកសារព័ត៌មានថា រថយន្តរបស់ក្រុមហ៊ុនលោក មានសមត្ថភាពធ្វើដំណើរចន្លោះពីចម្ងាយ ៣០០គីឡូម៉ែត្រ ទៅ ៥០០គីឡូម៉ែត្រ ដោយគ្រាន់តែចាក់ទឹកប្រមាណពី ៣០០ ទៅ ៤០០ លីត្រប៉ុណ្ណោះ។ យ៉ាងណាមិញ អំឡុងពេលសាកល្បងជាលើកដំបូងនេះ គេមិនដឹងទេថា រថយន្តចាក់ទឹករបស់ចិននេះ រត់បានចម្ងាយឆ្ងាយប៉ុណ្ណានោះឡើយ។

ឆ្លើយនឹងសំណួរអ្នកសារព័ត៌មានពាក់ព័ន្ធនឹងថ្លៃចំណាយក្នុងការផលិត លោក Pang និយាយថា តម្លៃនៃការអភិវឌ្ឍ និងស្រាវជ្រាវ ជាព័ត៌មានសម្ងាត់របស់ក្រុមហ៊ុន ដូចច្នេះ លោកពុំអាចបង្ហើបឲ្យដឹងបានឡើយ។ ប៉ុន្តែ លោក គ្រាន់តែនិយាយថា ក្រុមហ៊ុនលោក បានផលិតរថយន្តនេះក្នុងតម្លៃទាប ព្រោះនេះជាបច្ចេកវិទ្យាផ្ទាល់របស់ក្រុមហ៊ុនលោក។

តាមកាសែតចិន Nanyang Daily លោកអគ្គនាយក Pang ពន្យល់តាមលក្ខណៈបច្ចេកទេសថា ម៉ាស៊ីនរថយន្តដើរដោយថាមពលអ៊ីដ្រូសែន ដែលកកើតឡើងដោយប្រតិកម្មគីមីមួយ នៅពេលដែលកត្តាលីសមួយ ត្រូវដាក់បញ្ចូលឲ្យប្រតិកម្មជាមួយនឹងម្ស៉ៅអាលុយមីញ៉ូម និងទឹក។

គួរឲ្យកត់សម្គាល់ថា រថយន្តដើរដោយថាមពលអ៊ីដ្រូសែន មានប្រជាប្រិយភាពខ្លាំងក្នុងទីផ្សាររថយន្តថាមពលប្រភេទថ្មី ទោះបីជាប្រភេទរថយន្ត ពុំសូវមានលក្ខណៈផ្លូវការដូចជារថយន្តអគ្គិសនីក្តី។ ជាធម្មតា រថយន្តប្រភេទនេះ ប្រើប្រាស់ប្រតិកម្មរវាង អ៊ីដ្រូសែន និងអុកស៊ីសែន ដើម្បីផលិតថាមពលដល់ម៉ូទ័រអគ្គិសនី។

យោងតាមក្រុមអ្នកជំនាញ ដើម្បីដំណើការរថយន្តដើរដោយថាមពលអ៊ីដ្រូសែន ដោយគ្រាន់តែចាក់ទឹកមួយមុខ ទឹកដែលចាក់ចូលក្នុងរថយន្តនេះ នឹងត្រូវបំលែងទៅជាអគ្គិសនីវិភាគ (Electrolysis) ។ ហើយអគ្គិសនីវិភាគនេះ នឹងបង្កើតទៅជាអ៊ីដ្រូសែន ដែលផ្តល់ថាមពលដល់ម៉ាស៊ីនរថយន្តនេះ។

កន្លងទៅ មនុស្ស និងក្រុមហ៊ុនជាច្រើនមកពីជុំវិញពិភពលោក ធ្លាប់បានអះអាងថា ពួកគេផលិតបានរថយន្តដំណើរការដោយចាក់ទឹក ជំនួសឲ្យប្រេងឥន្ធនៈ ប៉ុន្តែក្រោយមកព័ត៌មាន បានលេចធ្លាយថា វាសុទ្ធសឹងតែរឿងប្រឌិតប៉ុណ្ណោះ៕