អន្តរជាតិ
អនុប្រធានាធិបតីឥណ្ឌា Venkaiah Naidu និងនាយករដ្ឋមន្រ្តី នារិន្ទ្រា ម៉ូឌី ។ រូបភាព AFP
×![]()
ដោយ: តន ចាន់រិទ្ធារ៉ា
អនុប្រធានាធិបតីឥណ្ឌា Shri M. Venkaiah Naidu នៅថ្ងៃទី២៨ ខែឧសភា បានអំពាវនាវជាថ្មីមានការធ្វើកំណែទម្រង់ក្រុមប្រឹក្សាសន្តិសុខអង្គការសហប្រជាជាតិ ដើម្បីបើកផ្លូវឲ្យឥណ្ឌាក្លាយជាសមាជិកអចិន្ត្រៃយ៍មួយ។ សម្រាប់លោក Naidu ឥណ្ឌា ជាប្រទេសប្រជាធិបតេយ្យធំជាងគេ ត្រូវតែក្លាយជាសមាជិកអចិន្ត្រៃយ៍ដើម្បីឲ្យស្ថាប័នពិភពលោកនេះតំណាងឲ្យគ្រប់ភាគីពាក់ព័ន្ធ ហើយពិភពលោកក៏ត្រូវការឥណ្ឌាដែរ។
ការធ្វើកំណែទម្រង់ក្រុមប្រឹក្សាអង្គការសហប្រជាជាតិ នៅតែជាគោលដៅធំរបស់យក្សអាស៊ីខាងត្បូងឥណ្ឌា។ ឥណ្ឌាដែលយល់ថា ខ្លួនជាមហាអំណាចប្រជាធិបតេយ្យផង និងសេដ្ឋកិច្ចធំផងនោះ ពិតជាត្រូវការកៅអីអង្គុយមួយឲ្យសក្តិសមនឹងមុខមាត់នឹងរបស់ខ្លួន។ កំណែទម្រង់ក្រុមប្រឹក្សាសន្តិសុខ ជារឿងចាំបាច់មួយសម្រាប់ឥណ្ឌាដើម្បីឈានទៅដល់ដំណាក់កាលនោះ។
លោក Shri M. Venkaiah Naidu អនុប្រធានាធិបតីឥណ្ឌា នៅថ្ងៃទី២៨ ខែឧសភា បានលើកឡើងពីភាពចាំបាច់ក្នុងការធ្វើកំណែទម្រង់ស្ថាប័នទទួលបន្ទុកសន្តិសុខពិភពលោកដែលត្រូវបានគេមើលឃើញថា ស្ថិតក្នុងអំណាចផ្ដាច់មុខរបស់មហាអំណាចតែប្រាំប្រទេស។ លោក Naidu និយាយថា តួនាទីរបស់ឥណ្ឌាលើឆាកអន្តរជាតិ បានកើនឡើងយ៉ាងខ្លាំង ហើយការកែប្រែក្រុមប្រឹក្សាសន្តិសុខ ជារឿងដែលត្រូវធ្វើដើម្បីឲ្យមានតំណាងពីប្រទេសផ្សេងទៀត។
នាជំនួបជាមួយមន្ត្រីការទូតឥណ្ឌា និងប៊ូតង់ អនុប្រធានាធិបតីឥណ្ឌារូបនេះនិយាយច្បាស់ៗថា ពិភពលោកត្រូវការឥណ្ឌាព្រោះបញ្ហាប្រឈមដែលកើតឡើងនៅសព្វថ្ងៃ ត្រូវការទស្សនៈវិស័យមួយប្រកបដោយមេត្តាធម៌ ហើយត្រូវការសំឡេងនៃសន្តិភាព អហិង្សា និងការរស់នៅដោយសន្តិសហវិជ្ជមាន។ លោកបន្តថា សាកលលោកទាំងមូល ក៏ត្រូវការវត្តមានឥណ្ឌាដើម្បីសម្រេចឲ្យបានគោលដៅឆ្នាំ២០៣០ ផងដែរ។
ជាប្រទេសមានប្រជាជនច្រើនលំដាប់ទីមួយ ឥណ្ឌា និងប្រទេសដែលមានឥទ្ធិពលមួយចំនួនទៀតដូចជាអាល្លឺម៉ង់ ជប៉ុន ប្រេស៊ីល តែងតែតស៊ូមតិពីកំណែទម្រង់ក្រុមប្រឹក្សាសន្តិសុខ ជាមួយនឹងអំណះអំណាងថា ពួកគេក៏មានសិទ្ធិចូលរួមក្នុងការផ្ដល់ដំណោះស្រាយសម្រាប់ពិភពលោកដែរ។ ទោះជាយ៉ាងណា គម្រោងផ្លាស់ប្ដូររចនាសម្ព័ន្ធស្ថាប័ននេះ មិនទៅមុខសោះ ខណៈសមាជិកអចិន្ត្រៃយ៍ផ្សេងទៀត ហាក់ប្រឆាំងគំនិតនេះ។
អាមេរិក រុស្ស៊ី ចិន អង់គ្លេស និងបារាំង ជាសមាជិកអចិន្ត្រៃយ៍ទាំងប្រាំ ដែលមានអំណាចវ៉េតូពេញដៃ ឯ១០ប្រទេសទៀត ជាសមាជិកធម្មតា ហើយផ្លាស់ប្ដូររាល់ពីរឆ្នាំម្ដង។ អំណាចវ៉េតូនេះ ផ្ដល់សិទ្ធិឲ្យមហាអំណាចទាំងប្រាំ មានសិទ្ធិជំទាស់រាល់សេចក្ដីស្នើដំណោះស្រាយណាដែលពួកគេយល់ឃើញថា មិនសមស្រប។ ដោយហេតុនេះ ការកែប្រែសិទ្ធិវ៉េតូ ក៏ស្ថិតក្នុងចំណោមគម្រោងដែលត្រូវផ្លាស់ប្ដូរដែរ។ ប៉ុន្តែ សមាជិកអចិន្ត្រៃយ៍ទំនងមិនព្រមចែកអំណាចរបស់ខ្លួនដែរ៕
Tag:
ឥណ្ឌា
ក្រុមប្រឹក្សាសន្តិសុខ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
