អន្តរជាតិ
អាមេរិក នឹងយកពន្ធ៥ភាគរយលើទំនិញម៉ិកស៊ិកគ្រប់មុខ ព្រោះបើកផ្លូវឲ្យជនអន្តោប្រវេសន៍ឆ្លងកាត់
×![]()
ដោយ: តន ចាន់រិទ្ធារ៉ា
ប្រធានាធិបតិអាមេរិក ដូណាល់ ត្រាំ នៅថ្ងៃទី៣០ ខែឧសភា បានប្រកាសគម្រោងយកពន្ធនាំចូលចំនួន៥ភាគរយលើទំនិញគ្រប់មុខដែលនាំចូលពីម៉ិកស៊ិកចាប់ពីថ្ងៃទី១០ ខែមិថុនាតទៅ។ តាមរយៈ Twitter របស់ខ្លួន លោក ត្រាំ បញ្ជាក់ថា ការយកពន្ធជំហានដំបូងនេះ នឹងអនុវត្តរហូតដល់ជនអន្តោប្រវេសន៍លែងឆ្លងកាត់ទឹកដីអ្នកជិតខាងមួយនេះដើម្បីលួចចូលទឹកដីអាមេរិកតាមព្រំដែនខាងត្បូងទៀត។ បើបញ្ហានេះមិនត្រូវបានដោះស្រាយទេ ម៉ិកស៊ិកនឹងត្រូវបង់ពន្ធនាំចូលកាន់តែធ្ងន់។
បច្ចុប្បន្ននេះ ទឹកដីម៉ិកស៊ិក ក្លាយជាទីឆ្លងកាត់ដ៏សំខាន់បំផុតរបស់ជនអន្តោប្រេសន៍មកពីតំបន់អាមេរិកខាងត្បូងក្នុងគោលដៅភៀសខ្លួនទៅកាន់ទឹកដីអាមេរិកដើម្បីអនាគតល្អប្រសើរ។ បញ្ហាលំហូរជនអន្តោប្រវេសន៍ ធ្វើឲ្យទំនាក់ទំនងរវាងទីក្រុងម៉ិចស៊ីកូ និងទីក្រុងវ៉ាស៊ីនតោន ប្រទាំងប្រទើសគ្នាយ៉ាងខ្លាំង ហើយក៏ជាដើមហេតុនាំឲ្យមាននយោបាយសាងសង់ជញ្ជាំងព្រំដែនដ៏ចម្រូងចម្រាសរបស់ប្រធានាធិបតី ដូណាល់ ត្រាំ ផងដែរ។
លោក ត្រាំ ពិតជាមិនពេញចិត្តឡើយចំពោះរដ្ឋាភិបាលម៉ិកស៊ិកដែលអនុញ្ញាតឲ្យក្បួនធ្វើដំណើររបស់ជនអន្តោប្រវេសន៍ទាំងខ្សែៗឆ្លងកាត់ទឹកដីខ្លួនរួចឆ្ពោះទៅកាន់ព្រំដែនជាមួយអាមេរិកនោះ។ ក្នុងគោលដៅដាក់សម្ពាធលើម៉ិកស៊ិក លោក ត្រាំ បានប្រកាសពីដំណឹងយកពន្ធនាំចូលចំនួន៥ភាគរយលើទំនិញគ្រប់មុខរបស់ម៉ិកស៊ិកចាប់ពីថ្ងៃទី១០ ខែមិថុនា ហើយនឹងអនុវត្តទាល់គ្មានលំហូរជនអន្តោប្រវេសន៍ចូលទឹកដីអាមេរិកទៀត។
ប្រធានាធិបតីអាមេរិករូបនេះបានសរសេរលើ Twitter នៅថ្ងៃទី៣០ ខែឧសភាទៀតថា ការយកពន្ធនេះ នឹងបន្តធ្វើរហូតដល់បញ្ហាអន្តោប្រវេសន៍ខុសច្បាប់ ត្រូវបានដោះស្រាយ។ ដោះស្រាយបញ្ហាចប់ ទើបការយកពន្ធនេះ ត្រូវដកវិញ។
ក្នុងសេចក្ដីប្រកាសរបស់សេតវិមាន ការយកពន្ធនាំចូលនេះ នឹងកើនដល់១០ភាគរយនៅថ្ងៃទី១ ខែកក្កដា ហើយឡើងដល់១៥ភាគរយនៅថ្ងៃទី១ ខែសីហា, ដល់២០ភាគរយនៅខែកញ្ញា និងចុងក្រោយ គឺ២៥ភាគរយនៅថ្ងៃទី១ ខែតុលា។ ចាប់ពីខែតុលាទៅ អាមេរិក នឹងយកពន្ធនាំចូលពីម៉ិកស៊ិកចំនួន២៥ភាគរយនេះ រហូតទាល់តែមានដំណោះស្រាយ។
ក្រោយការប្រកាសរបស់លោក ត្រាំ ម៉ិកស៊ិកឯណេះវិញ ក៏នៅមិនស្ងៀមដែរ និងព្រមានចាត់វិធានការតបវិញ។ អនុរដ្ឋមន្ត្រីការបរទេសម៉ិកស៊ិក Jesus Seade បានប្រាប់អ្នកសារព័ត៌មានថា ចំណាត់ការរបស់អាមេរិក ជារឿងបង្កមហន្តរាយ បើសិនជាអនុវត្តមែននោះ។ ក្នុងសន្និសីទសារព័ត៌មានថ្ងៃទី៣០ ខែឧសភា លោក Seade ដែលទទួលបន្ទុកកិច្ចការអាមេរិកខាងជើង និយាយទៀតថា បើអាមេរិកយកពន្ធនាំចូលលើទំនិញគ្រប់មុខ ម៉ិកស៊ិកនឹងឆ្លើយតបវិញមិនខាន។
ការប្រកាសយកពន្ធរបស់លោក ត្រាំ ធ្វើឡើងមួយថ្ងៃបន្ទាប់ពីមន្ត្រីព្រំដែនអាមេរិកឃាត់ខ្លួនជនអន្តោប្រវេសន៍មួយក្រុមដែលមានគ្នាទៅដល់ទៅជាងមួយពាន់នាក់នៅតំបន់ព្រំដែនក្នុងរដ្ឋតិចសាស់បន្ទាប់ពីពួកគេបានឆ្លងកាត់ទន្លេ Rio Grande ។ អង្គភាពគយ និងព្រំដែនអាមេរិកបញ្ជាក់ថា ជនអន្តោប្រវរេសន៍ទាំងនេះមកពីក្វាតេម៉ាឡា ហុងឌុយរ៉ាស ឬអែលសាល់វ៉ាឌ័រ៕
Tag:
អាមេរិក
ម៉ិកស៊ិក
ដូណាល់ ត្រាំ
© រក្សាសិទ្ធិដោយ thmeythmey.com
