អន្តរជាតិ
ដឹកនាំប្រទេសនៅអាណត្តិទីពីរ លោក ម៉ូឌី ដោះដូររដ្ឋមន្ត្រីគួរឲ្យភ្ញាក់ផ្អើល នាយករដ្ឋមន្រ្តីឥណ្ឌា នារិន្ទ្រា ម៉ូឌី និងបណ្ដារដ្ឋមន្រ្តីថ្មីនាពិធីស្បថចូលកាន់តំណែង។ រូបភាព AFP
× បន្ទាប់ពីស្បថចូលកាន់តំណែងនាយករដ្ឋមន្ត្រីសម្រាប់អាណត្តិទីពីររួចមក លោក នារិន្ទ្រា ម៉ូឌី បានប្រកាសសមាសភាពគណៈរដ្ឋមន្ត្រីថ្មី។ រឿងគួរឲ្យភ្ញាក់ផ្អើល លោក ម៉ូឌី បានផ្លាស់ប្ដូរតំណែងរដ្ឋមន្ត្រីជាច្រើន បើប្រៀបធៀបទៅអាណត្តិទីមួយ ពិសេសការតែងតាំងមន្ត្រីជាន់ខ្ពស់បក្សដែលមិនធ្លាប់កាន់តំណែងក្នុងជួររដ្ឋាភិបាលសោះឲ្យធ្វើជារដ្ឋមន្ត្រីមហាផ្ទៃ។ តំណែងរដ្ឋមន្ត្រីការពារជាតិ និងរដ្ឋមន្ត្រីការបរទេស ក៏ត្រូវបានផ្លាស់ប្ដូរដែរ។
លោក នារិន្ទ្រា ម៉ូឌី នៅថ្ងៃទី៣០ ខែឧសភា បានស្បថចូលកាន់តំណែងនាយករដ្ឋមន្ត្រីឥណ្ឌាសម្រាប់អាណតិ្ត៥ឆ្នាំលើកទីពីរ។ មេដឹកនាំប្រទេសជិតខាងរបស់ឥណ្ឌា ស្ថិតក្នុងចំណោមភ្ញៀវពិសេសជាង៨០០នាក់ ដែលចូលរួមក្នុងពិធីស្បថចូលកាន់តំណែងរបស់លោក ម៉ូឌី ក្រោយបក្ស Bharatiya Janata Party ទទួលជ័យជម្នះយ៉ាងត្រចះត្រចង់ក្នុងការបោះឆ្នោតជ្រើសរើសសមាជិកសភាដែលធ្វើឡើងចន្លោះខែមេសា និងឧសភា។
នៅថ្ងៃទី៣១ ខែឧសភា លោក ម៉ូឌី បញ្ចេញសមាសភាពរដ្ឋាភិបាលថ្មីដែលត្រូវដឹកនាំឥណ្ឌាទៅមុខ។ នៅអាណត្តិទីពីរនេះ លោក ម៉ូឌី បានផ្លាស់ប្ដូររដ្ឋមន្ត្រីសំខាន់ៗទាំងផ្នែកសន្តិសុខ ការពារជាតិ ការបរទេស និងហិរញ្ញវត្ថុ។ លោក Amit Shah ប្រធានបក្សកាន់អំណាច និងជាមនុស្សជំនិតលោក ម៉ូឌី ក្លាយជារដ្ឋមន្ត្រីមហាផ្ទៃ។ លោក Shah គ្មានប្រវត្តិកាន់តំណែងនៅស្ថាប័នរដ្ឋឡើយ ហើយការក្លាយជារដ្ឋមន្ត្រីពេលនេះ ក៏ព្រោះតែលោកជួយឲ្យលោក ម៉ូឌី ឈ្នះឆ្នោតមិនធ្លាប់មាន។
ការផ្លាស់ប្ដូរមុខតំណែងគួរឲ្យភ្ញាក់ផ្អើលមួយទៀត គឺលោកស្រី Nirmala Sitharaman ត្រូវបានផ្ទេរពីក្រសួងការពារជាតិទៅធ្វើជារដ្ឋមន្ត្រីហិរញ្ញវត្ថុវិញ ហើយក្លាយជាស្ត្រីមានតំណែងខ្ពស់បំផុតក្នុងជួរដ្ឋាភិបាលលោក ម៉ូឌី ។ កាលពីអាណត្តិមុន តំណែងរដ្ឋមន្ត្រីហិរញ្ញវត្ថុនេះត្រូវបានកាន់កាប់ដោយលោក Arun Jaitley ប៉ុន្តែនៅអាណត្តិថ្មីនេះ បានសុំដកខ្លួនវិញ។ ឯតំណែងរដ្ឋមន្ត្រីការពារជាតិ បានធ្លាក់លើ Rajnath Singh ។
អ្នកការទូតជើងចាស់ S. Jaishankar ត្រូវបានតែងតាំងជារដ្ឋមន្ត្រីការបរទេសថ្មីជំនួសលោកស្រី Sushma Swaraj ។ លោក S. Jaishankar ជាអ្នកជំនាញកិច្ចការប្រទេសចិន និងធ្លាប់ជាទីប្រឹក្សាផ្នែកគោលនយោបាយការបរទេសដ៏មានឥទ្ធិពលរបស់លោក ម៉ូឌី ។ ការតែងតាំងនេះ ត្រូវបានគេមើលឃើញថា លោក ម៉ូឌី នឹងផ្ដោតការយកចិត្តទុកខ្លាំងលើអ្នកជិតខាងរបស់ឥណ្ឌាសម្រាប់អាណត្តិថ្មីនេះ ស្របពេលទំនាក់ទំនងម្ដងឡើងម្ដងចុះ។
លោក ម៉ូឌី បានហៅសមាសភាពថ្មីជាមនុស្សម៉ូឌីជំនាន់ទីពីរ ដែលពោរពេញដោយថាមពល និងសម្បូរបទពិសោធផ្នែករដ្ឋបាល។ ការតែងតាំងរដ្ឋមន្ត្រីថ្មីពិសេសក្រសួងហិរញ្ញវត្ថុ ទំនងជាផ្នែកមួយនៃគោលនយោបាយរបស់លោក ម៉ូឌី ក្នុងការរក្សាកំណើនសន្ទុះសេដ្ឋកិច្ចរបស់ខ្លួន ខណៈមានការប៉ាន់ប្រមាណថា ចិននឹងវ៉ាឥណ្ឌាប្រទេសមានកំណើនសេដ្ឋកិច្ចលឿននៅអាស៊ី៕
Tag:
ឥណ្ឌា
នារិន្ទ្រា ម៉ូឌី
© រក្សាសិទ្ធិដោយ thmeythmey.com