រដ្ឋមន្ត្រីសេដ្ឋកិច្ច៖ សង្គ្រាមពាណិជ្ជកម្មរវាងចិន-អាមេរិក ពុំជះឥទ្ធិពលដល់កម្ពុជាទេ

ជាតិ

សេដ្ឋកិច្ច

រដ្ឋមន្ត្រីសេដ្ឋកិច្ច៖ សង្គ្រាមពាណិជ្ជកម្មរវាងចិន-អាមេរិក ពុំជះឥទ្ធិពលដល់កម្ពុជាទេ

01, Jun 2019 , 2:15 pm

រូបភាព

រូបពីហ្វេសប៊ុកក្រសួងសេដ្ឋកិច្ច និងហិរញ្ញវត្ថុ

ដោយ: ភួង វ៉ាន់ថា

លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអះអាងថា សង្គ្រាមពាណិជ្ជកម្មរវាងចិន និង អាមេរិក មិនជះឥទ្ធិពលដល់កម្ពុជានោះទេ ។ នោះក៏ព្រោះតែកម្ពុជា ជាប្រទេសមានសេដ្ឋកិច្ចបើកចំហ និងទីផ្សារនាំចេញផលិតផលមានលក្ខណៈចម្រុះ។

មិនត្រឹមតែមិនប៉ះពាល់ដល់សេដ្ឋកិច្ចកម្ពុជាហើយ សង្គ្រាមពាណិជ្ជកម្មរវាងមហាអំណាចនេះ វាអាចផ្ដល់ផ្លែផ្កាវិជ្ជាមានដល់កម្ពុជាទៀតផង។ ក្នុងន័យនេះ លោក អូន ព័ន្ធមុនីរ័ត្ន បានសង្កត់ធ្ងន់ថា សង្គ្រាមពាណិជ្ជកម្មនេះ ជាឱកាសសម្រាប់កម្ពុជា ក្នុងការពង្រីកទីផ្សារនាំចេញ និងដើម្បីត្រៀមខ្លួនទាក់ទាញអ្នកវិនិយោគបន្ថែមទៀតផង។ បើតាមលោក អូន ព័ន្ធមុនីរ័ត្ន រាជរដ្ឋាភិបាលកម្ពុជាបានត្រៀមខ្លួនក្នុងការចាប់យកឱកាសនេះរួចជាស្រេចហើយ តាមរយៈការដាក់ចេញនូវវិធានការកែទម្រង់ដ៏មុតស្រួចលើគ្រប់វិស័យ។

ថ្លែងក្នុងកិច្ចប្រជុំជាមួយលោក Arnaud Darc ប្រធានសភាពាណិជ្ជកម្មអឺរ៉ុបប្រចាំនៅកម្ពុជា កាលពីថ្ងៃ៣០ ខែឧសភា រដ្ឋមន្ត្រីក្រសួងសេដ្ឋកិច្ចរូបនេះ បាននិយាយដូច្នេះថា៖«សម្តេចនាយករដ្ឋមន្ត្រី បានដាក់ចេញនូវវិធានការមុតស្រួចជាកញ្ចប់មួយចំនួនក្នុងគោលដៅបង្កើនភាពប្រកួតប្រជែងរបស់កម្ពុជា ក៏ដូចជាដើម្បីទាក់ទាញការវិនិយោគពីបរទេសបន្ថែមទៀត ដែលរួមមានការលើកកម្ពស់កិច្ចសម្រួលពាណិជ្ជកម្ម, ការកាត់បន្ថយថ្លៃអគ្គិសនី,ការបន្តកសាងហេដ្ឋារចនាសម្ព័ន្ធរូបវ័ន្ត, និងការបន្តកំណែទម្រង់ស្ថាប័នជាដើម»។

ទន្ទឹមនឹងការទទួលបានផលប្រយោជន៍នោះ កម្ពុជាក៏អាចជួបផលអវិជ្ជមានផងដែរ។ ត្រង់ចំណុចនេះលោក អូន ព័ន្ធមុនីរ័ត្ន បានបញ្ជាក់ថា ក្នុងករណីសង្គ្រាមពាណិជ្ជកម្មនៅតែបន្តអូសបន្លាយរយៈពេលវែងនោះ កម្ពុជាអាចនឹងជួបបញ្ហាប្រឈម និងផលប៉ះពាល់អវិជ្ជមានមួយចំនួនផងដែរ ដូចជា ការថយចុះនៃលំហូរភ្ញៀវទេសចរអន្តរជាតិ និងលំហូរទុនវិនិយោគបរទេស ដែលបណ្ដាលមកពីកំណើនយឺតនៃសេដ្ឋកិច្ចសកលោក។

អត្ថបទទាក់ទង

សម្តេច ហ៊ុន សែន៖ ចិន-អាមេរិកនឹងជម្នះការលំបាក ព្រោះមិនមែនជាបញ្ហាប្រឈមដែលមិនចេះចប់នោះឡើយ

សង្គ្រាមពាណិជ្ជកម្មឡើងកម្ដៅវិញ ក្រោយលោក ត្រាំ ប្រកាសដំឡើងពន្ធលើទំនិញចិន

ទាក់ទងនឹងបញ្ហាសង្គ្រាមពាណិជ្ជកម្ម ដែលកំពុងឡើងកម្ដៅនេះ បានកើតឡើងក្រោយពីសហរដ្ឋអាមេរិកប្រកាសដំឡើងថ្លៃពន្ធលើថ្លៃទំនិញរបស់ចិនជាបន្តបន្ទាប់។ មូលហេតុដែលនាំឲ្យអាមេរិកចេញវិធានការដំឡើងថ្លៃពន្ធទំនិញចិននេះ ក្រោមហេតុថា ចិនរកស៊ីមិនស្មើភាពគ្នា ពោលគឺចិនដើរខ្សែលើអាមេរិក។ ត្រង់ចំណុចប្រធានាអាមេរិក លោក ដូណាល់ ត្រាំ បានចោទចិនថា រកស៊ីទុច្ចរិត ដោយចិនបានបង្ខំឲ្យក្រុមហ៊ុនអាមេរិកផ្ទេរបច្ចេកវិទ្យារបស់ខ្លួន ជាថ្នូរនឹងការរកស៊ីនៅលើទឹកដីចិន ដែលវាអាចផ្ដល់ឱកាសឲ្យចិនប្រើបច្ចេកវិទ្យារបស់អាមេរិកក្នុងការអភិវឌ្ឍផលិតផលរបស់ខ្លួនជាដើម។

តែចិនក៏មិនណយដែរ។ ចិនក៏បានប្រកាសដំឡើងពន្ធលើទំនិញអាមេរិកមួយចំនួនវិញ ដើម្បីសងសឹកនឹងទង្វើរបស់អាមេរិក។

ត្រង់បញ្ហានេះសម្តេច ហ៊ុន សែន ថ្លែងក្នុងសន្និសីទអន្តរជាតិលើកទី២៥ ស្តីពី «អនាគតរបស់អាស៊ី» នៅក្រុងតូក្យូ ប្រទេសជប៉ុន កាលពីថ្ងៃទី៣០ ខែឧសភា ឆ្នាំ ២០១៩ ថា បណ្តារដ្ឋនៅអាស៊ី និងលើពិភពលោក គប្បីការពារខ្លួនកុំឲ្យក្លាយខ្លួនជាស្រមោច សង្អារឲ្យប្រទេសមហាអំណាចជាន់ស្លាប់នោះទេ៕