ជាតិ
សង្គមជាតិ
ធុច សីហា បងប្រុស សាលិ រៀនគូរគំនូរ តែស្រឡាញ់ផ្នែកវិស្វករ
× សៀមរាប៖ នៅពេលគេនិយាយដល់ក្មេងប្រុស ធុច សាលិ នោះគេនឹងស្គាល់ភ្លាមដោយសារក្មេងប្រុសនេះមានទេពកោសល្យក្នុងការនិយាយច្រើនភាសា និងត្រូវបានសារព័ត៌មានជាតិនិងអន្ដរជាតិជាច្រើនផ្សព្វផ្សាយ។ ធ្លាប់លក់ដូរតាមប្រាសាទដូចប្អូនប្រុសដែរ ធុច សីហា មិនសូវចេះនិយាយច្រើនភាសាដូច សាលិប៉ុន្មានទេ។ សព្វថ្ងៃ សីហា រៀនថ្នាក់ទី១១ និងមានជំនាញគូរគំនូរលើក្រណាត់។
ធុច សីហា ជាបងប្រុសបង្កើតរបស់ក្មេងប្រុស ធុច សាលិ ដែលមានសមត្ថភាពខ្ពស់ផ្នែកភាសាដោយសារគេមានរបរលក់ដូរអនុស្សាវរីយ៍ឱ្យភ្ញៀវបរទេសនៅតាមប្រាសាទ។ កំពុងអង្គុយក្រោមសំយ៉ាបមុខផ្ទះដែលស្ថិតនៅខាងជើងកំពែងប្រាសាទបន្ទាយក្ដី សីហា ថាខ្លួនក៏ចេះភាសាលក់ដូចប្អូនខ្លួនដែរ តែមិនសូវបានច្រើនភាសា។
សីហា មានឪពុកជាជាងគំនូរ ហើយបានជំរុញការងារមកដល់រូបគេដើម្បីទុកគូរនៅពេលគេទំនេរពីការរៀនសូត្រ។ នេះបើតាមការបញ្ជាក់ពីក្មេងប្រុស សីហា អាយុ១៧ឆ្នាំ។ ក្មេងប្រុសរូបនេះមិនសូវស្រឡាញ់ខាងគំនូរនេះប៉ុន្មានទេកាលពីដំបូងពេលឪពុកបង្រៀន តែក្រោយពីចេះខាងនេះជាងមួយឆ្នាំមកនេះ គេហាក់ចូលចិត្តនិងសប្បាយជាមួយការងារនេះណាស់។ សីហា គូរគំនូរក្រណាត់ទាំងផ្ទាំងតូចនិងធំ តែដោយសារទីផ្សារទៅលើផ្ទាំងតូចច្រើន ទើបសីហាគូរខ្នាតនេះច្រើន។ ក្នុងមួយថ្ងៃ សីហា អាចគូររូបខ្នាតតូចអាចបានពី៥ ទៅ១០ផ្ទាំង ដែលបោះឱ្យម៉ូយក្នុងតម្លៃពី៤ដុល្លារកន្លះទៅ៥ដុល្លារ រីឯផ្ទាំងធំលក់បានតម្លៃ ៣០ដុល្លារ។
ដោយសារមានជីតាធម៌នៅភ្នំពេញដែលស្រឡាញ់រាប់អានគ្រួសារខ្លួន សីហា គ្រោងនឹងឡើងទៅរៀនថ្នាក់ទី១២នៅទីនោះ។ សីហា បញ្ជាក់ថា ក្រោយរៀនចប់ថ្នាក់បាក់ឌុប គេមានបំណងទៅបន្តការសិក្សានៅប្រទេសថៃលើជំនាញវិស្វករដែលគេស្រមៃ និងជំនាញកសិកម្មតាមការតម្រង់ទិសពីជីតាធម៌ដែលចង់ឱ្យ សីហា ជួយមើលការខុសត្រូវរបរកសិកម្មខ្លួននាពេលអនាគត។ សីហា ប្រាប់ថា ក្រោយរៀនចប់ខ្លួននឹងវិលមកស្រុកកំណើតវិញដើម្បីជួយអភិវឌ្ឍន៍ប្រទេស៕
Tag:
ធុច សីហា
សាលិ
គំនូរ
វិស្វករ
© រក្សាសិទ្ធិដោយ thmeythmey.com