ភ្នំពេញ៖ គឺជាជោគជ័យដ៏ធំមួយសម្រាប់ព្រះតេជគុណ ប៊ុន សាលួត ក្នុងដំណើរការការពារព្រៃឈើ និងសត្វព្រៃក្នុងដែនព្រៃសង្ឃរុក្ខវ័ន ក្នុងស្រុកអន្លង់វែង ខេត្តឧត្តមានជ័យ។ បន្ទាប់ពីបានឃើញជោគជ័យ ក្នុងការការពារព្រៃធម្មជាតិ ដែលមានផ្ទៃដីជិត២ម៉ឺនហិកតាកន្លងមកនោះសម្ដេចនាយករដ្ឋមន្ត្រី ហ៊ុន សែន បានប្រគល់ដីរហូតដល់ទៅជាង៣ម៉ឺនហិកតា ដើម្បីឲ្យព្រះអង្គការពារបន្ថែម។ ទៅថ្ងៃអនាគត ព្រះតេជគុណ ប៊ុន សាលួត មានគម្រោងរៀបចំដែនព្រៃសង្ឃរុក្ខវ័ន ទៅជាតំបន់អេកូទេសចរណ៍ផងដែរ។
ព្រោះមានព្រះទ័យចង់ថែរក្សាព្រៃឈើ និងសត្វព្រៃទុកដល់ក្មេងជំនាន់ក្រោយ ព្រះតេជគុណ ប៊ុន សាលួត បានលះបង់ទាំងកម្លាំងកាយ ក្នុងកិច្ចការការពារដែនព្រៃសង្ឃរុក្ខវ័ន ក្នុងផ្ទៃដីចំនួនជិត២ម៉ឺនហិកតា តាំងពីឆ្នាំ២០០០មក។
ព្រះតេជគុណ ប៊ុន សាលួត បានផ្ដល់បទសម្ភាសដល់សារព័ត៌មានថ្មីៗ ក្រោយការចាក់បញ្ចាំងភាពយន្តឯកសារក្រោមចំណងជើងថា «ឆ្មាំព្រៃ» ដែលជាភាពយន្តបង្ហាញពីការការពារព្រៃឈើនិងសត្វព្រៃ នៅក្នុងស្រុកអន្លង់វែង ក្នុងខេត្តឧត្តរមានជ័យ។ ព្រះអង្គ មានថេរដីកាថា ការងារនេះ ត្រូវការការលះបង់ច្រើន និងការតស៊ូខ្លាំង។
និមន្តក្នុងព្រៃដោយព្រះហស្តទទេ គ្មានអាវុធការពារព្រះកាយអ្វីទាំងអស់ ព្រះអង្គ ប៊ុន សាលួត តែងតែយកឋានៈជាព្រះសង្ឃ និងទ្រឹស្ដីព្រះពុទ្ធ ដើម្បីចរចាជាមួយអ្នកកាប់ឈើ និងអ្នកប្រមាញ់សត្វព្រៃ។ ការដោះស្រាយតាមសន្តិវិធី និងយុទ្ធសាស្ត្ររកការគាំទ្រពីប្រជាពលរដ្ឋ និងអាជ្ញាធរក្នុងតំបន់បានល្អនោះហើយ ទើបមកដល់ពេលបច្ចុប្បន្ន ព្រះអង្គអាចការពារដីក្នុងដែនព្រៃសង្ឃរុក្ខវ័ន ក្នុងស្រុកអន្លង់វែងបាន១០០ភាគរយ និងព្រៃឈើបានប្រមាណ៩៥ភាគរយ និងសត្វព្រៃបានប្រមាណ៧០ភាគរយ។ ព្រះអង្គ មានសង្ឃដីកាថា៖«សត្វព្រៃនៅក្នុងតំបន់ដែលយើងការពារ មានគ្រប់ទាំងអស់ លើកលែងតែសត្វដំរីមួយដែលមិនមាន។ យើងពិបាកការពារសត្វ ក៏ព្រោះតែគេដាក់ឧបករណ៍នេសាទនៅខែទឹក ដល់ខែគោក គេមិនបានយកទៅវិញ។ ដូច្នេះសត្វវាដើរទៅ ក៏ជាប់ឧបរណ៍ទាំងនោះ»។
ជោគជ័យទាំងនោះហើយ បានធ្វើឲ្យថ្នាក់ដឹកនាំរាជរដ្ឋាភិបាល សម្រេចផ្ដល់តំបន់ការពារជាង១ម៉ឺនបន្ថែម ដែលសរុបផ្ទៃដីដល់ទៅជាង៣ម៉ឺនហិកតា ដល់ព្រះអង្គ ដើម្បីការពារបន្ត។
ទោះបានលទ្ធផលល្អក្នុងពេលបច្ចុប្បន្នយ៉ាងនេះក្ដី ប៉ុន្តែកាលពីឆ្នាំ២០០៨ និងឆ្នាំ២០១៧ ព្រះអង្គមានការប្រឈមខ្លាំងណាស់ដែរ ព្រោះតែការរុករានដីធ្លីពីឈ្មួញ និងប្រជាជន រួមទាំងបញ្ហាទឹកជំនន់ដោយសារទំនប់វារីអគ្គិសនី។
«ពេលមានបញ្ហាកាប់ព្រៃ យើងសួររកឯកសារអនុញ្ញាត ឬឯកសារពាក់ព័ន្ធពីពួកគាត់។ បើពួកគាត់បានទិញ ឬពួកគាត់មានការអនុញ្ញាតពីច្បាប់ យើងឲ្យគាត់កាប់តែតំបន់នោះទេ មិនឲ្យគាត់ពង្រីកដីបន្ថែម មិនឲ្យផ្ទេរទៅអ្នកផ្សេង មិនឲ្យគ្រៀវដើមឈើ និងមិនឲ្យយកដីនោះ ទៅធ្វើជាកម្មសិទ្ធិ។ បើមិនមានឯកសារអ្វីទេ យើងងាយស្រួលនិយាយជាមួយគាត់ទៀត។ បើអាត្មា មិនប្រឹងប្រែងខ្លាំងទេ នោះរដ្ឋាភិបាល នឹងដកយកដីនោះទៅវិនិយោគ។ រាល់ការដោះស្រាយ អាត្មាបានដើរត្រូវតួនាទី»។ នេះជាការបញ្ជាក់របស់ព្រះតេជគុណ ប៊ុន សាលួត។
ដោយសារក្នុងដែនព្រៃសង្ឃរុក្ខវ័ន មានអាងរក្សាទឹកតាំងពីបុរាណ មានភ្នំរូងដែក ដែលជាភ្នំប្រវត្តិសាស្ត្រ មានឡស្លដែកចំនួន៨ នៅក្បែរភ្នំរូងដែក ដែលប្រហែលជាមានអាយុកាលតាំងពីសម័យអង្គរ មានប្រាសាទប្រមាណជាង២០ និងមានស្រែបុរាណថែមទៀតផងនោះ ព្រះតេជគុណ ប៊ុន សាលួត គ្រោងរៀបចំតំបន់នោះ ឲ្យក្លាយជាតំបន់អេកូទេសចរណ៍ធំជាងគេ នៅក្នុងខេត្តឧត្តរមានជ័យ ដោយមានដែនជម្រកសត្វព្រៃ រួមទាំងជាកន្លែងសិក្សាស្រាវជ្រាវផងដែរ។
ព្រះអង្គ បង្ហាញជំនឿថា៖«យើងគ្រោងធ្វើតំបន់នេះ ឲ្យក្លាយជាកន្លែងស្រាវជ្រាវបែបធម្មជាតិ។ នៅទីនេះ មានទាំងធនធានធម្មជាតិ និងសម្បត្តិវប្បធម៌ប្រវត្តិសាស្ត្រ»។ ព្រះតេជគុណ បានផ្ដល់ជាគំនិតថា ក្នុងមួយភូមិ គួរតែមានដីព្រៃការពារមួយកន្លែង សម្រាប់រកឱសថ អូសដុត និងជាជម្រកសត្វព្រៃ ដើម្បីជាប្រយោជន៍សម្រាប់អ្នកភូមិទាំងមូល។
សូមបញ្ជាក់ថា ក្រុមអ្នកការពារដែនអភិរក្សព្រៃសង្ឃរុក្ខវ័ន មានគណៈកម្មការកណ្ដាលចំនួន៩រូប មានអនុគណៈកម្មការចំនួន៤៣រូប និងមានសមាជិកចំនួន៣,៤៤៧រូប៕