សង្គមអន្តរជាតិ
អន្តរជាតិ
អ្នកកាសែតជុំវិញពិភពលោកបង្ហាញកង្វល់ និងដំណោះស្រាយ ចំពោះឥទ្ធិពលបណ្តាញសង្គម
×![]()
ដោយ: ភួង វ៉ាន់ថា
អ្នកសារព័ត៌មានមកពីគ្រប់ទ្វីបលើលោក ជួបជុំគ្នាវេទិកាប្រព័ន្ធផ្សព្វផ្សាយពិភពលោក ២០១៩ (The world Global Media Forum 2019) នៅទីក្រុងបុន (Bonn) ប្រទេសអាល្លឺម៉ង់ ក្រោមប្រធានបទ Shifting Powers ដែលនិយាយសំដៅទៅលើការផ្លាស់ប្តូរជាវិជ្ជមាន។ វាគ្មិនជំនាញជាច្រើនរូបបានធ្វើបទបង្ហាញទៅលើប្រធានបទសំខាន់ៗពាក់ព័ន្ធនឹងការប្រែប្រួលនៃប្រព័ន្ធផ្សព្វផ្សាយនាពេលបច្ចុប្បន្ន។ ជាពិសេសទិដ្ឋភាពទូទៅទាក់ទងនឹងសារព័ត៌មាន និងបញ្ហាប្រឈមនានាដែលកើតមានឡើង ក្នុងសម័យបច្ចេកវិទ្យានេះ។
អគ្គនាយកនៃប្រព័ន្ធផ្សព្វផ្សាយអាល្លឺម៉ង់ (Deutsche Welle) លោក Peter Limbourg ដែលជាអ្នកដឹកនាំរៀបចំវេទិកានេះ បាននិយាយថា ជំនួបពិភាក្សានេះ នឹងផ្តល់ឱកាសដល់អ្នកសារព័ត៌មានពិភាក្សាទៅលើឥទ្ធិពលនៃការប្រឈមនៃសារព័ត៌មាន និងសេរីភាពនៃការបញ្ចេញមតិ ដើម្បីជំរុញឲ្យមានការផ្លាស់ប្តូរជាវិជ្ជមាននៅលើពិភពលោក។
លោកបានលើកឡើងថា៖«អ្នកនយោបាយជាច្រើនបានប្រើប្រាស់ប្រព័ន្ធផ្សព្វផ្សាយដើម្បីចែករំលែកព័ត៌មានក្លែងក្លាយនៅលើបណ្ដាញសង្គម និងប្រព័ន្ធផ្សព្វផ្សាយរបស់ខ្លួន ដើម្បីគ្រប់គ្រងអំណាច ដែលធ្វើឲ្យសេរីភាពបញ្ចេញមតិធ្លាក់ចុះ។ ទន្ទឹមនឹងនេះអ្នកកាសែតទូទៅពិសេសអ្នកកាសែតក្នុងស្រុកសុទ្ធតែជួបការលំបាកនានា(ព័ត៌មានក្លែងក្លាយ ការចែកចាយសារលើបណ្ដាញសង្គម ) ដែលបណ្ដាលមកពីនិន្នាការកើនឡើងនៃការប្រើប្រាស់បណ្តាញសង្គមនានាតួយ៉ាងដូចជាហ្វេសប៊ុក យូធូប វត់អាប់។ល។ ដូច្នេះអ្នកកាសែតត្រូវការអភិវឌ្ឍន៍ខ្លួនជាប្រចាំទើបងាយស្រួលធ្វើការ ដឹងថាព័ត៌មានមួយណាពិតមិនពិតដើម្បីយកទៅផ្សព្វផ្សាយ»។
អ្នកជំនាញផ្នែកបណ្ដាញសង្គម លោក Jochen Spangenberg ជំរុញឲ្យអ្នកសារព័ត៌មានចូលរួមទប់ស្កាត់ព័ត៌មានក្លែងក្លាយក្នុងបណ្ដាញសង្គម តាមរយៈពង្រឹងសមត្ថភាពជាប្រចាំលើការងារវិជ្ជាជីវៈមួយនេះ។ សម្រាប់លោក Jochen ការចុះផ្សាយព័ត៌មានត្រូវអនុវត្តតាមមធ្យោបាយ ក្នុងការវិភាគទៅលើអត្ថបទ រូបភាព និងបច្ចេកទេសផ្សេងៗទៀតក្នុងការបញ្ជាក់ពីភាពត្រឹមត្រូវ នៃព្រឹត្តិការណ៍ ឬហេតុការណ៍ដែលត្រូវបានបង្ហោះលើបណ្ដាញសង្គម។
ក្នុងចំណោមអ្នកសារព័ត៌មានចូលរួមទាំងជាង២០០០នាក់នោះ ក៏មានអ្នកកាសែតខ្មែរមួយចំនួនចូលរួមស្តាប់និងសិក្សារៀនសូត្រពីវេទិការនេះដែរ។អ្នកសារព័ត៌មានកម្ពុជា មកពីកាសែតខ្មែរថាមស៍ (Khmer Times) លោក តាំង វីដា បាននិយាយថា វេទិកាប្រព័ន្ធផ្សព្វផ្សាយនេះ បានផ្តល់ជាបទពិសោធន៍ពាក់ព័ន្ធនឹងបញ្ហាប្រឈម ក៏ដូចជាការប្រកួតប្រជែងក្នុងវិស័យសារព័ត៌មាននៃបណ្តាប្រទេសផ្សេងៗ ដែលអ្នកសារព័ត៌មានកម្ពុជា គប្បីសិក្សាស្វែងយល់ និងរក្សាគំនិតទាំងនេះទុកជាដំណោះស្រាយនាពេលអនាគត ។
លោកថា៖ «វេទិកានេះ មានសារសំខាន់សម្រាប់អ្នកសារព័ត៌មាន ដើម្បីទទួលបានចំណេះដឹងពីរៀមច្បងក្នុងវិស័យនេះ អាចដោះស្រាយបញ្ហាប្រឈមនានាដែលពួកយើងកំពុងជួបប្រទះសម្រាប់អាជីពទៅថ្ងៃមុខ។ វេទិការបានផ្តល់ឱកាសបង្កើតទំនាក់ទំនងរវាងអ្នកសារព័ត៌មានមកពីបណ្តាប្រទេសផ្សេងៗ»។
ស្របគ្នានេះ គ្រូបង្រៀនផ្នែកសារព័ត៌មាននៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ កញ្ញា នូវ ពៅលក្ខិណា ដែលចូលរួមកម្មវិធីវេទិកាប្រព័ន្ធផ្សព្វផ្សាយពិភពលោកនេះជាលើកទី១នោះ បាននិយាយថា៖« វេទិកាប្រព័ន្ធផ្សព្វផ្សាយពិភពលោកនេះបានជួយឲ្យខ្ញុំអាចធ្វើបច្ចុប្បន្នភាព អំពីទំនោរ និងបច្ចេកវិទ្យាប្រើប្រាស់ក្នុងប្រព័ន្ធផ្សព្វផ្សាយ ។ បញ្ហានានាដែលអ្នកកាសែតជួបប្រទះ ដូច្នេះខ្ញុំអាចចែករំលែកចំណេះដឹងទៅកាន់សិស្សរបស់ខ្ញុំ ដើម្បីរៀបចំខ្លួនក្នុងការក្លាយជាអ្នកកាសែតឆ្នើម ក្នុងសម័យឌីជីថលនេះ»។
នាបច្ចុប្បន្ននេះ អ្នកប្រើប្រាសអ៊ីនធើណិត មានចំនួនប្រមាណ ៣,២ ពាន់លាននាក់ ជុំវិញពិភពលោក ខណៈអ្នកប្រើប្រាស់បណ្ដាញសង្គម មានចំនួនប្រមាណជាង ៣, ៤៨ ពាន់លាននាក់។ ក្នុងនោះគណនីហ្វេសប៊ុកក្លែងក្លាយ ប្រមាណជាង ១លាន ត្រូវបានបង្កើតជារៀងរាល់ថ្ងៃ។ នេះបើយោងតាមអ្នកជំនាញផ្នែកព័ត៌វិទ្យាធ្វើបទបង្ហាញក្នុងវេទិកាប្រព័ន្ធផ្សព្វផ្សាយពិភពលោកឆ្នាំ ២០១៩៕
Tag:
កាសែត
© រក្សាសិទ្ធិដោយ thmeythmey.com
