ជាតិ
បទយកការណ៍ / បទសម្ភាសន៍
សេដ្ឋកិច្ច
លោក សុវណ្ណ ពិសិដ្ឋ៖ កម្ពុជាមានសក្ដានុពលលើវិស័យផ្ដៅ-ឫស្សី
× ភ្នំពេញ៖ រដ្ឋាភិបាលកំពុងដំណើរការនីតិវិធីបញ្ចូលកម្ពុជា ទៅជាសមាជិកអង្គការបណ្តាញអន្តរជាតិឫស្សី និងផ្ដៅ ដើម្បីលើកស្ទួយវិស័យនេះ។ បើតាមប្រធានសមាគមផ្ដៅឫស្សីកម្ពុជា លោក សុវណ្ណ ពិសិដ្ឋ កម្ពុជាពិតជាមានសក្ដានុពលផ្នែកនេះប្រាកដមែន ដោយឫស្សី និងផ្ដៅ ដែលជាវត្ថុធាតុដើម សម្រាប់កែច្នៃទៅជាគ្រឿងសង្ហារិមផ្សេងៗ មាននៅតាមបណ្ដាខេត្តទូទាំងប្រទេស តែការយកមកកែច្នៃនៅតិចតួចនៅឡើយ។ លោក ពិសិដ្ឋ ប្រាប់ថា ផលិតផលធ្វើពីផ្ដៅ ឫស្សី កាន់តែពេញនិយម ពិសេសការប្រើប្រាស់ក្នុងគេហដ្ឋាន ហាងកាហ្វេ ភោជនីយដ្ឋាន សណ្ឋាគារ និងរមណីយដ្ឋានជាដើម។ ប៉ុន្តែទន្ទឹមនឹងនេះ លោក ពិសិដ្ឋ អះអាងថា អ្នកប្រកបរបរក្នុងវិស័យនេះប្រឈមបញ្ហាខ្លះ ដូចជាការទាញផល និងចរាចរផ្ដៅឫស្សី ត្រូវសុំលិខិតអនុញ្ញាតក្នុងលក្ខខណ្ឌ ដូចឈើដែរ ដែលលោកសុំឲ្យមានការបន្ធូរបន្ថយ។
សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងលោក សុវណ្ណ ពិសិដ្ឋ ប្រធានសមាគមផ្ដៅឫស្សីកម្ពុជា ដូចតទៅនេះ៖
បើតាមលោក សុវណ្ណ ពិសិដ្ឋ សមាគមផ្ដៅឫស្សីកម្ពុជានេះ មានសមាជិក និងបណ្ដាញ ទាំងសិប្បកម្មកែច្នៃ សហគមន៍តាមមូលដ្ឋាន និងដៃគូសហការជាអង្គការអន្តរជាតិជាដើម។ លោកប្រាប់ថា ពីមុនសមាគមនេះគ្របដណ្ដាប់៦ខេត្ត តែដោយសារខ្វះថវិកាសមាគមនេះបានចងក្រងសហគមន៍តែនៅខេត្តចំនួន៣ប៉ុណ្ណោះ ដែលរួមមានខេត្តកោងកុង ព្រះសីហនុ និងខេត្តកំពត។ បណ្ដាញសហគមន៍ក្នុងបីខេត្តនេះ មានវិសាលភាពលើផ្ទៃដីជាង៨ពាន់ហិកតា ដែលអាចដកហូតផ្ដៅឫស្សីប្រមាណជាង ៣០០០តោនក្នុងមួយឆ្នាំ តែលោក ពិសិដ្ឋ ឲ្យដឹងសមាគមទើបតែអាចទាញផលបាន ៣០០តោនក្នុងមួយឆ្នាំប៉ុណ្ណោះ។ លោក សុវណ្ណ ពិសិដ្ឋ អះអាងថា សមាគមនេះមានបញ្ចេកទេសដកហូតអនុផលផ្ដៅឫស្សី ដើម្បីធានានិរន្តរភាពរបស់វាមិនឲ្យបាត់បង់។
មិនមែនមានតែសមាគមនេះមួយនោះទេនៅកម្ពុជាសម្រាប់វិស័យផ្ដៅឫស្សី លោក ពិសិដ្ឋ ឲ្យដឹងថា មានការចងក្រងជាសហគមន៍ ឬអង្គរការធ្វើការពាក់ព័ន្ធផ្នែកនេះមួយចំនួនទៀត។
កម្ពុជាជិតក្លាយជាសមាជិកអង្គរបណ្ដាញអន្តរជាតិសម្រាប់ឫស្សី និងផ្ដៅ នៅពេលខាងមុខ។ លោក សុវណ្ណ ពិសិដ្ឋ សាទរការវិវឌ្ឍន៍នេះ។ លោកថ្លែងដូច្នេះថា៖«បើកម្ពុជាអាចចូលក្នុងអង្គការដែលអាចជំរុញការនាំចេញ ឬបច្ចេកទេសបាន យើងក៏សប្បាយចិត្ត ព្រោះសមាគមយើងនៅតែតស៊ូមតិជាមួយរដ្ឋាភិបាល ដើម្បីជួយដោះស្រាយបញ្ហារបស់សិប្បកម្មនីមួយៗ។ បញ្ហាមួយចំនួនគឺនៅមិនទាន់ដោះស្រាយ តែយើងនៅតែសហការជាមួយរដ្ឋាភិបាល ដើម្បីជួយសម្រួលការកែច្នៃ និងនាំចេញផលិតផលពាក់កណ្ដាលសម្រេច និងផលិតសម្រេចចេញពីផ្ដៅឫស្សី»៕
Tag:
ផ្ដៅ ឫស្សី
សុវណ្ណ ពិសិដ្ឋ
© រក្សាសិទ្ធិដោយ thmeythmey.com