តើអ្នកស្រឡាញ់អាជីពអ្នកសារព័ត៌មានដែរទេ? តើអ្នកចង់លើកកម្ពស់ការយកព័ត៌មានបរិស្ថាននៅកម្ពុជាឬទេ? តើអ្នកមានការប្ដេជ្ញាចិត្តដើម្បីបង្រៀនអ្នកកាសែតកម្ពុជាឬទេ? វគ្គបណ្ដុះបណ្ដាលគ្រូបង្គោល Mekong News បានមកដល់ហើយ។
វគ្គបណ្ដុះបណ្ដាលគ្រូបង្គោលកម្ពុជា នឹងប្រព្រឹត្តទៅពីខែមិថុនា ដល់ខែធ្នូឆ្នាំ២០១៩ សម្រាប់អ្នកចូលរួម៦នាក់ ហើយមានគោលដៅបណ្ដុះបណ្ដាលគ្រូបង្គោលឲ្យមានជំនាញលើប្រធានបទច្បាស់លាស់ទាក់ទងគោលដៅអភិវឌ្ឍន៍ដោយចីរភាព (SDGs) នៅតំបន់មេគង្គ។ វគ្គបណ្ដុះបណ្ដាលនេះ នឹងជួយពង្រីកការយកព័ត៌មានលើបញ្ហាបរិស្ថាននៅកម្ពុជា។ កម្មវិធីបណ្ដុះបណ្ដាលនេះមានដូចជា៖
• សិក្ខាសាលាពីរថ្ងៃស្ដីពីការរាយការណ៍ព័ត៌មានបរិស្ថានបែបវិទ្យាសាស្ត្រ (ពីថ្ងៃទី២២ដល់ទី២៣ ខែមិថុនា ឆ្នាំ២០១៩)
• សិក្ខាសាលាពីរថ្ងៃស្ដីពីការបាត់បង់គម្របព្រៃឈើ (ពីថ្ងៃទី២៧ដល់ទី២៨ ខែកក្កដា ឆ្នាំ២០១៩)
• សិក្ខាសាលាពីរថ្ងៃស្ដីពីបញ្ហានៅទីក្រុង (ពីថ្ងៃទី១០ដល់ទី១១ ខែសីហា ឆ្នាំ២០១៩)
• សិក្ខាសាលាពីរថ្ងៃស្ដីពីបញ្ហាតំបន់ឆ្នេរ (ពីថ្ងៃទី១៤ដល់ទី១៥ ខែកញ្ញា ឆ្នាំ២០១៩)
ផលប្រយោជន៍
វគ្គបណ្ដុះបណ្ដាល នឹងផ្ដល់ឲ្យអ្នកចូលរួមនូវ៖
• ការយល់ដឹងគ្រប់ជ្រុងជ្រោយពីគោលដៅអភិវឌ្ឍន៍ដោយចីរភាព (SDGs) និងសារសំខាន់នៃការយកព័ត៌មានបែបវិទ្យាសាស្ត្រ
• ការយល់ដឹងស៊ីជម្រៅពីសន្ធិសញ្ញាអន្តរជាតិ និងតំបន់ សេចក្ដីថ្លែងការណ៍ និងការណែនាំដែលអាចប្រើប្រាស់ក្នុងការកំណត់ការឆ្លើយតបរបស់ជាតិទៅនឹងគោលដៅអភិវឌ្ឍន៍ដោយចីរភាព (SDGs)
• កម្មវិធីសិក្សាពិសេសដើម្បីបណ្ដុះបណ្ដាលអ្នកសារព័ត៌មានលើប្រធានបទជាក់លាក់ទាក់ទង គោលដៅអភិវឌ្ឍន៍ដោយចីរភាព (SDGs)
• ប្រភព និងព័ត៌មានទំនាក់ទំនងរបស់អ្នកជំនាញដែលអនុញ្ញាតឲ្យអ្នកចូលរួមអាចរៀបចំវគ្គបណ្ដុះបណ្ដាលដោយខ្លួនឯងលើបញ្ហាបរិស្ថាន
លក្ខខណ្ឌចូលរួម
• សម្រាប់បេក្ខជនជាជនជាតិខ្មែរ
• អ្នកដាក់ពាក្យត្រូវមានការប្ដេជ្ញាចិត្តលើសីលធម៌ក្នុងការរាយការណ៍ និងស្តង់ដាវិជ្ជាជីវសារព័ត៌មាន
• អ្នកដាក់ពាក្យត្រូវមានចំណាប់អារម្មណ៍ខ្ពស់ក្នុងការរាយការណ៍ពីគោលដៅអភិវឌ្ឍន៍ដោយចីរភាព និងលើបញ្ហាជាក់លាក់ដូចជាបម្រែបម្រួលអាកាសធាតុលើជីវភាពប្រចាំថ្ងៃ សុវត្ថិភាពចំណីអាហារ និងការគ្រប់គ្រងទឹក
• អ្នកដាក់ពាក្យត្រូវចេះភាសាខ្មែរច្បាស់ និងជំនាញអង់គ្លេសស្ទាត់
• ស្ត្រីត្រូវបានលើកទឹកចិត្តឲ្យដាក់ពាក្យ
ការដាក់ពាក្យ
នៅពេលដាក់ពាក្យស្នើសុំ ត្រូវភ្ជាប់មកជាមួយឯកសារដូចខាងក្រោម៖
• ប្រវត្តិរូបសង្ខេប
• លិខិតបង្ហាញចំណាប់អារម្មណ៍មួយទំព័រ ដោយពន្យល់ពីផលប្រយោជន៍ដែលអាចទទួលបានពីការចូលរួមវគ្គបណ្ដុះបណ្ដាល និងផែនការក្នុងការប្រើប្រាស់ចំណេះ និងជំនាញដែលទទួលបាន
• អត្ថបទចំនួនមួយដែលធ្លាប់បានសរសេរទាក់ទងបញ្ហាបរិស្ថាននៅកម្ពុជា
• លិខិតគាំទ្រពីប្រធានអង្គភាពដែលអ្នកកំពុងបំពេញការងារ
• ការប្ដេជ្ញាចិត្តរបស់អ្នកដើម្បីចំណាយពេលចូលរួមក្នុងការបណ្ដុះបណ្ដាលអ្នកកាសែតអំឡុងពេលចុងសប្ដាហ៍ចន្លោះខែតុលា និងធ្នូឆ្នាំ២០១៩
ពាក្យស្នើសុំ ត្រូវផ្ញើទៅកាន់លោក គី សុខលីម តាមរយៈអសយដ្ឋានអ៊ីមែល
[email protected] និង Clothilde Le Coz តាមរយៈ
[email protected] ។ ផុតកំណត់ទទួលពាក្យនៅថ្ងៃទី១៥ ខែមិថុនា។