កីឡាជាតិ
ជាតិ
Felix៖ អ្នកណា Superstar? ខ្ញុំអត់ដឹងដែរ ខ្ញុំគ្រាន់តែដឹងថា យើងធ្វើការជាក្រុម
× លោក Felix Dalmas គ្រូបង្វឹកក្រុមជម្រើសជាតិកម្ពុជា មិនបានផ្តល់ចម្លើយឡើយ ទាក់ទងនឹងការមិនជ្រើសរើសកីឡាករមួយចំនួន ដោយអ្នកគាំទ្រខ្លះយល់ថា ជាកីឡាករឆ្នើម Superstar។ តើអ្នកណាជា Superstar? គ្រូបង្វឹកអាហ្សង់ទីនរូបនេះ បានសួរទៅកាន់អ្នកកាសែតវិញ នាសន្និសីទសារព័ត៌មានមួយថ្ងៃ មុនការប្រកួតវគ្គជម្រុះបឋម World Cup ជើងទីមួយ ជាមួយប៉ាគីស្ថាន។
លោក Felix បានពន្យល់ថា លោកមិនមានកីឡាករណាមួយជា Superstar ឡើយ ពីព្រោះអ្វីៗទាំងអស់កើតចេញពីការងារជាក្រុម។ ទាក់ទងនឹងការជ្រើសរើសកីឡាករមួយចំនួនដែលមិនបានលេងឲ្យក្លិប គ្រូបង្វឹករូបនេះ បានអះអាងថា ក្រុមការងាររបស់លោកបានទាក់ទងជាប្រចាំជាមួយក្លិបនានា យើងដឹងច្បាស់ពីការខំប្រឹងប្រែងប្រចាំថ្ងៃរបស់កីឡាករទាំងនោះ។
ខ្សែការពារ សឿយ វិសាល ដែលជាប្រធានក្រុមជម្រើសជាតិ បានលើកឡើងថា បើទោះបីជាការហ្វឹកហាត់រយៈពេលខ្លីក៏ដោយ ប៉ុន្តែការប្រកួតជាប្រចាំនៅក្នុងក្របខណ្ឌមិត្តហ្វូនខេមបូឌានលីគ ជាជំនួយយ៉ាងសំខាន់នៃការត្រៀមខ្លួនសម្រាប់ព្រឹត្តិការណ៍នៅថ្ងៃស្អែក។ «យើងធ្លាប់ហាត់ជាមួយគ្រូ យើងដឹងពីគោលដៅរបស់គាត់ យើងមិនមានបញ្ហាផ្នែកកម្លាំងឡើយ ព្រោះយើងលេងជាប្រចាំនៅក្នុងលីគ»។ នេះជាការអះអាងរបស់ខ្សែការពារមកពីក្លិបព្រះខ័នរាជស្វាយរៀង៕
Tag:
ជម្រើសជាតិកម្ពុជា
World Cup
© រក្សាសិទ្ធិដោយ thmeythmey.com