ជាតិ
ប្រមុខរដ្ឋាភិបាល ប្រាប់ឲ្យមន្ត្រីទទួលថ្នាក់ដឹកនាំបរទេស ដោយម្ហូបខ្មែរ ដើម្បីចំណេញផលិតផលជាតិ
× ភ្នំពេញ៖ ពីពិធីចែកសញ្ញាបត្រដល់និស្សិតសាកលវិទ្យាល័យពុទ្ធិសាស្ត្រ នៅថ្ងៃទី៦ មិថុនានេះ សម្ដេចនាយករដ្ឋមន្ត្រី ហ៊ុន សែន បានជំរុញឲ្យថ្នាក់ដឹកនាំ និងមន្ត្រីតាមក្រសួងទាំងអស់ រៀបចំម្ហូបខ្មែរ សម្រាប់ទទួលភ្ញៀវបរទេស ដើម្បីលើកកម្ពស់អត្តសញ្ញាណជាតិ។
សម្ដេច ហ៊ុន សែន ធ្លាប់បានរៀបចំម្ហូបខ្មែរសម្រាប់ទទួលភ្ញៀវបរទេសកន្លងមកហើយ ក្នុងនោះរួមមាន អាម៉ុក សម្លរកកូរជាដើម។ បើតាមប្រមុខរដ្ឋាភិបាល បណ្ដាប្រទេសដទៃទៀត ក៏គេយកម្ហូបក្នុងប្រទេសគេ យកមកទទួលភ្ញៀវ ដើម្បីផ្សព្វផ្សាយពីអត្តសញ្ញាណជាតិដែរ។ ដូច្នេះកម្ពុជា ត្រូវធ្វើបែបនេះ ដើម្បីលើកកម្ពស់ម្ហូប និងផលិតផលជាតិ។
«ចាំមើលតទៅខាងមុខ ព្រោះឥឡូវខ្ញុំចាប់ផ្ដើមបណ្ដើៗ ខ្ញុំដាក់ម្ហូបអាម៉ុក ទទួលភ្ញៀវជប់លៀងថ្នាក់នាយករដ្ឋមន្ត្រី ។ មានអាម៉ុក សម្លរកកូរ ហើយថ្ងៃក្រោយចាំដាក់ម្ហូបសម្លរម្ជូរ ព្រោះគេក៏ដាក់(ម្ហូបគេ)ឲ្យយើងស៊ីដូចតែគ្នាហ្នឹង ម្ហូបរបស់គេ។ អ៊ីចឹងយើងបង្ហាញម្ហូបរបស់យើងឲ្យបានច្រើនតិចមើល…។ ខ្ញុំគិតថា ចំណុចនេះយើងនឹងជំរុញនូវការប្រើប្រាស់ផលិតផលជាតិរបស់យើងតែម្ដង »។
ថ្នាក់ដឹកនាំនៅតាមបណ្ដារដ្ឋនីមួយៗភាគច្រើន តែងតែយកម្ហូបក្នុងតំបន់នៃប្រទេសពួកគេ មកទទួលភ្ញៀវបរទេស ដើម្បីឲ្យសាកភ្លក់រសជាតិ ក្នុងការផ្សាភ្ជាប់ទំនាក់ទំនងប្រពៃណី និងបង្ហាញពីអត្តសញ្ញាណជាតិជាដើម ។ ជាក់ស្ដែងដូចជានៅក្នុងប្រទេសឡាវ គឺគេតែងតែយកបាយដំណើប មកឲ្យភ្ញៀវពិសារ ដោយរួមមានម្ហូបឡាប (ឈ្មោះម្ហូបភ្លាឡាវមួយប្រភេទ ធ្វើដោយហាន់សាច់ស្រស់ឬត្រីស្រស់ផ្សំគ្រឿងផ្សេងៗ មានលាយទឹកអង្ករលីងផង) ដែលជាម្ហូបបែបប្រពៃណីជនជាតិឡាវ។ នៅពេលដែលគេនិយាយពីឈ្មោះម្ហូបឡាបនេះ គឺគេប្រាកដជាស្គាល់ថា វាជាប្រភេទម្ហូបមួយបែប ដែលកើតចេញពីប្រទេសឡាវ៕
Tag:
ហ៊ុន សែន
រដ្ឋាភិបាល
ម្ហូបខ្មែរ
© រក្សាសិទ្ធិដោយ thmeythmey.com