ជាតិ
ស្ថាប័នរដ្ឋាភិបាល និងដៃគូពាក់ព័ន្ធ នឹងរៀបចំវេទិកាថ្នាក់ជាតិលើកទី២ ស្ដីពីអនុផលព្រៃឈើ នៅថ្ងៃទី១០-១១ មិថុនានេះ
× ភ្នំពេញ៖ ក្រសួងបរិស្ថាន, អង្គការ NTFP-EP, អង្គការ WCS, អង្គការ WWF រួមទាំងដៃគូពាក់ព័ន្ធ នឹងរៀបចំវេទិកាថ្នាក់ជាតិលើកទី ២ ស្ដីពីអនុផលព្រៃឈើ រយៈពេល ២ថ្ងៃ ចាប់ពីថ្ងៃទី១០-១១ មិថុនា នៅសណ្ឋាគារហ៊ីម៉ាវ៉ារី។ វេទិកាថ្នាក់ជាតិលើកទី២ ស្ដីពីអនុផលព្រៃឈើ នឹងបង្ហាញនូវលទ្ធផល និងសកម្មភាពការងារដែលសហគមន៍មូលដ្ឋានសម្រេចបានក្នុងការអភិវឌ្ឍ និងលើកកម្ពស់ខ្សែសង្វាក់ផលិតកម្មអនុផលព្រៃឈើ ដោយប្រើវិធីសាស្ត្រការពារបរិស្ថានក្នុងការប្រមូលផល និងកែច្នៃ។
វេទិកាថ្នាក់ជាតិលើកទី ២ ស្ដីពីអនុផលព្រៃឈើ ដែលរៀបចំរយៈពេល២ថ្ងៃនេះ នឹងមានការធ្វើបទបង្ហាញរបស់សហគមន៍អនុផលព្រៃឈើ និងសហគ្រាសសង្គម ស្ដីពីអនុវត្តគំរូអាជីវកម្ម រួមទាំងបច្ចេកទេស និងគំនិតច្នៃប្រឌិតលើផលិតផលអនុផលព្រៃឈើ។ តាមរយៈវេទិកានេះ នឹងមានកិច្ចពិភាក្សាដេញដោលលើប្រធានបទដែលពាក់ព័ន្ធនឹងអនុផលព្រៃឈើ និងសកម្មភាពមួយចំនួនទៀត។
ក្នុងវេទិកាដដែលនេះ ក៏មានបង្ហាញពីការរៀបចំ និងអនុវត្តក្រិតក្រមស្ដង់ដានៃការគ្រប់គ្រងអនុផលព្រៃឈើ និងការពង្រីកគំរូអាជីវកម្មសហគ្រាសសហគមន៍ទៅក្នុងប្រភេទផលិតផលអនុផលព្រៃឈើផ្សេងៗដូចជា ទឹកឃ្មុំព្រៃ, ផ្ដៅ, ឫស្សី, ជ័រទឹក និងទ្រាំង។ វេទិកាថ្នាក់ជាតិលើកទី២ ស្ដីពីអនុផលព្រៃឈើ នឹងមានការចូលរួមពីស្ថាប័នរដ្ឋាភិបាល អង្គការ សហគ្រិន និងភាគីពាក់ព័ន្ធប្រមាណ ២០០នាក់ ដោយក្នុងនោះមានតំណាងសហគមន៍មកពីខេត្តចំនួន ១០។
សូមបញ្ជាក់ថា វេទិកាថ្នាក់ជាតិលើកទី ១ ស្ដីពីអនុផលព្រៃឈើ បានរៀបចំឡើងក្នុងឆ្នាំ២០១៥ ដោយផ្ដោតសំខាន់លើការអភិវឌ្ឍខ្សែសង្វាក់ផលិតកម្មអនុផលព្រៃឈើនៅកម្ពុជា៕
Tag:
វេទិកាថ្នាក់ជាតិ
អនុផលព្រៃឈើ
ប្រជាសហគមន៍
បរិស្ថាន
© រក្សាសិទ្ធិដោយ thmeythmey.com