សៀមរាប៖ អ្នករត់កង់បីនៅក្នុងខេត្តសៀមរាប បានត្អូញត្អែរស្ទើរគ្រប់មាត់ថា មិនសូវបានដឹកភ្ញៀវនោះទេនៅក្នុងរយៈពេលចុងក្រោយនេះ បើទោះជាស្ថិតនៅក្នុងខែសម្បូរភ្ញៀវ(High Season)ក៏ដោយ។ តួលេខភ្ញៀវទេសចរមកទស្សនាខេត្តនេះ កើនឡើង ប៉ុន្តែបាត់ភ្ញៀវទេសចរអឺរ៉ុប ហើយជំនួសមកវិញដោយទេសចរអាស៊ី ពិសេសជនជាតិចិន ដែលភាគច្រើនមកជាក្រុមធំៗ និងមិនសូវប្រើប្រាស់មធ្យោបាយធ្វើដំណើរដោយកង់បីនេះឡើយ។ ដូច្នេះហើយបានជាធ្វើឲ្យអ្នករត់កង់បី បាត់ចំណូល ដែលធ្លាប់រកបាន ដែលធ្វើឲ្យប្រកបអាជីពនេះខ្លះ បោះបង់ចោលហើយទៅប្រកបរបរផ្សេង, ចំណាកស្រុក ឬឆ្លៀតទៅប្រកបរបរផ្សេងបន្ថែមពីការរត់កង់បី។
សូមស្ដាប់បទយកការណ៍ដែលរៀបរៀងដោយអ្នកស្រី អ៊ីសា រ៉ហានី ពីខេត្តសៀមរាបដូចតទៅ៖
នៅពេលដែលខេត្តមួយពឹងស្ទើរទាំងស្រុងទៅលើវិស័យទេសចរណ៍ វាក៏បានធ្វើឱ្យប៉ះពាល់ដល់សេដ្ឋកិច្ចក្នុងខេត្តខ្លាំងដែរ នៅពេលវិស័យទេសចរណ៍មានការធ្លាក់ចុះ។ អ្នកលក់ដូរមួយចំនួនធំក៏រអ៊ូរឿងលក់មិនសូវដាច់ដូចមុនៗ ឯអ្នករត់កង់បីវិញ ក៏រិតតែរអ៊ូពីបញ្ហានេះ។
សព្វថ្ងៃនេះ អ្នករត់កង់បីត្រូវប្រឹងជាងពេលមុនបន្ដិច ដោយត្រូវបន្ថែមម៉ោងរត់ និងចល័តរត់ច្រើនជាងពេលមុន នៅពេលដែលអ្នកជិះហាក់រៀងស្ងាត់។ អ្នករត់កង់បីខ្លះពីមុនធ្លាប់តែដឹកភ្ញៀវទេសចរអឺរ៉ុបដោយគ្មានពេលសម្រាកផង តែនៅពេលនេះ ត្រូវងាកមកដឹកដោយមិនរើសមុខ សំខាន់ឱ្យតែមានភ្ញៀវដឹកមានចំណូលចូលគ្រួសារ។
លោក វាសនា កំពុងឈប់កង់បីនៅមុខមន្ទីរពេទ្យខេត្តសៀមរាប ដើម្បីហូបអាហារ និងចាប់ភ្ញៀវបាននិយាយថា លោកអត់មានភ្ញៀវដឹកជិត២ខែមកហើយ គឺបន្ទាប់ពីបុណ្យចូលឆ្នាំរួច។ លោក វាសនា ដឹកទាំងភ្ញៀវខ្មែរ និងបរទេស តែដោយសារមិនសូវមានភ្ញៀវបរទេសច្រើនដូចមុនៗ លោកក៏ងាកមកដឹកភ្ញៀវខ្មែរ នៅតាមតំបន់ប្រជុំជនមួយចំនួនក្នុងក្រុងសៀមរាប។ បើតាមការបញ្ជាក់របស់លោក វាសនា ដោយសារការរត់កង់បីរៀងពិបាកបន្ដិច បង្ខំឱ្យមិត្តភក្ដិខ្លះរបស់លោក បោះបង់ចោលអាជីពនេះ ដោយខ្លះរត់ទៅធ្វើការនៅប្រទេសថៃ ខ្លះទៀតរត់ទៅរស់នៅនៅស្រុកកំណើតវិញ ឬធ្វើការនៅកន្លែងផ្សេងៗ។
លោក វាសនា រត់កង់បីជិត៥ឆ្នាំហើយ លោកសង្កេតឃើញការធ្លាក់ចុះចំនួនទេសចរអឺរ៉ុប ពីមួយឆ្នាំទៅមួយឆ្នាំ គួរឱ្យកត់សម្គាល់ តែបែរជាមានការកើនឡើងនូវចំនួនទេសចរអាស៊ី។ បើតាមការយល់ឃើញពីបុរសរូបនេះ មានហេតុផលខ្លះដែលទេសចរអឺរ៉ុប មិនសូវមកកម្សាន្តខេត្តសៀមរាប ដោយសារវត្តមានទេសចរអាស៊ីច្រើន បញ្ហាសន្ដិសុខ និងអនាម័យក្នុងខេត្តទេសចរណ៍មួយនេះហាក់នៅមានកម្រិតទាប ដែលទាមទារឱ្យមានការអភិវឌ្ឍបន្ថែម ពិសេសផ្នែកប្រព័ន្ធផ្លូវថ្នល់ ភ្លើងបំភ្លឺផ្លូវ។ល។ លោក វាសនា ក៏មើលឃើញទៀតថា ការទស្សនារបស់ភ្ញៀវអឺរ៉ុបមកកម្ពុជា គឺមានរយៈពេលខ្លី ជាងនៅប្រទេសជិតខាង ដោយនៅកម្ពុជាពួកគេប្រើពេលកម្សាន្តខ្លី ត្រឹមតែ៣ថ្ងៃប៉ុណ្ណោះ តែនៅប្រទេសថៃ ឬវៀតណាម ទេសចរទាំងនោះចំណាយពេលស្នាក់នៅ ចាប់ពី១ ឬ២សប្ដាហ៍ឡើង។
ចំណែកលោក រ័ត្ន ក៏រអ៊ូរឿងអត់សូវមានអ្នកជិះកង់បីដែរ។ លោក រ័ត្ន ដឹកភ្ញៀវជាតិភាគច្រើន តែពេលខ្លះក៏ឆ្លៀតដឹកទេសចរបរទេសដែរ ព្រោះកន្លែងដឹករបស់លោក នៅជិតតំបន់ផាប់ស្ទ្រីតស្រាប់។
លោក ម៉ាប់ អ្នករត់កង់បីប្រចាំសណ្ឋាគារដ៏ធំមួយ នៅក្រុងសៀមរាប។ ដោយសារអត់មានភ្ញៀវដឹក លោក ម៉ាប់ កំពុងអង្គុយចុចទូរសព្ទលេង និងឆ្លៀតងាកមកតបនូវសំណួរអ្នកកាសែតដែលបានសាកសួរពីការងាររបស់លោក។ ដូចអ្នករត់កង់បីឯទៀតៗដែរ លោក ម៉ាប់ ប្រាប់ថាក្នុងខែឧសភាកន្លងទៅនេះ លោកមានភ្ញៀវដឹកតែ២ក្រុមប៉ុណ្ណោះ និងឆ្លៀតពេលរត់នៅខាងក្រៅបន្ថែមទៀត។ ភ្ញៀវអឺរ៉ុបពិតជាធ្លាក់ពិតមែន តែលោក ម៉ាប់ ថាភ្ញៀវអាស៊ីបង្ហាញវត្តមានច្រើន នៅតំបន់ប្រាសាទ។
ដោយសារគ្មានភ្ញៀវដឹកច្រើនដូចមុនៗ ធ្វើឱ្យលោក ម៉ាប់ ទំនេរច្រើន។ លោកនិងគ្រួសារ បានឆ្លៀតទៅជួលដីដាំដំឡូងនៅស្រុកអន្លង់វែង ដោយរំពឹងថានឹងអាចបានកំរៃខ្លះពីចម្ការមួយនេះ ដើម្បីផ្គត់ផ្គង់ការចំណាយក្នុងគ្រួសារ ដែលមានសមាជិកសរុប៧នាក់។
កំពុងអង្គុយចុចទូរសព្ទក្នុងអង្រឹងចងលើរ៉ឺម៉កកង់បី ដែលចតមុខសណ្ឋាគារដែលខ្លួនប្រចាំការដឹកភ្ញៀវ លោក សឿម សែត រៀងសើចបន្ដិចពេលឮសំណួរអ្នកកាសែតសួរពីបញ្ហាធ្លាក់ភ្ញៀវ។ មិនមានអ្វីត្រូវលាក់បាំង លោក សែត ប្រាប់ថាភ្ញៀវប៉ែកអឺរ៉ុបដែលលោកធ្លាប់ដឹកកន្លងមករៀងធ្លាក់ពិតមែន បើមានក៏មកជាលក្ខណៈក្រុមៗដែរ ដោយមិនជិះសេវាកម្មកង់បីលោកឡើយ។ ក្រៅពីមិនសូវមានភ្ញៀវហើយ ក្នុងនោះភ្ញៀវក៏ប្រើសេវាកម្មដឹកជញ្ជូននេះរយៈពេលខ្លះទៅទៀត គឺពេលខ្លះត្រឹមមួយថ្ងៃឬមួយថ្ងៃកន្លះតែប៉ុណ្ណោះ។
គ្មានភ្ញៀវដឹក ពិតជាប៉ះពាល់ដល់ជីវភាពគ្រួសារលោក សែត ពិតប្រាកដណាស់ តែលោកប្រាប់ថាមិនដឹងដោះស្រាយបែបណា មានតែទ្រាំនិងប្រឹងរកទៅកន្លែងផ្សេងទៀត ដើម្បីជីវភាពប្រចាំថ្ងៃ៕