សង្គមអន្តរជាតិ
អន្តរជាតិ
ស្ត្រីជប៉ុននាំគ្នាប្រឆាំងលក្ខខណ្ឌឲ្យពាក់ «ស្បែងជើងកែងចោត» នៅកន្លែងធ្វើការ
× ក្រុមហ៊ុនជាច្រើននៅប្រទេសជប៉ុន តម្រូវឲ្យបុគ្គលិកនារី «ពាក់ស្បែកជើងចោត»។ ស្ត្រីជប៉ុនចាប់ផ្តើមនាំគ្នាប្រឆាំងលក្ខខណ្ឌនេះ តាមរយៈយុទ្ធនាការ #KuToo ។ បើតាមការផ្សាយរបស់ទីភ្នាក់ងារព័ត៌មានក្យូដូ ញត្តិដែលមានអ្នកចូលរួមជាង២៥,០០០នាក់ ត្រូវបានដាក់ទៅក្រសួង សុខាភិបាល ការងារ និងសង្គមកិច្ច។
#KuToo ដែលយកលំនាំតាមយុទ្ធនាការ #MeToo នោះ ធ្វើឡើងក្នុងបំណងប្រឆាំងលក្ខខណ្ឌតម្រូវឲ្យបុគ្គលិកនារី ពាក់ស្បែកជើងកែងចោត ដោយ «Kutsu» មានន័យថា «ស្បែកជើង» រីឯ «Kutsuu» ប្រែថា «ការឈឺចាប់»។ ញត្តិដែលផ្តួចផ្តើមដោយតារាសំដែង និងជាអ្នកនិពន្ធ ឈ្មោះ Yumi Ishikawa បានលើកឡើងពីការរើសអើងផ្លូវភេទ ដែលតម្រូវឲ្យរដ្ឋាភិបាលណែនាំបណ្តាក្រុមហ៊ុន លុបចោលលក្ខខណ្ឌរបស់ខ្លួន។
Yumi ទទួលបានការគាំទ្រជាង២៥,០០០ ក្នុងរយៈពេលតែប៉ុន្មានថ្ងៃប៉ុណ្ណោះ ហើយតារាវ័យ៣២ឆ្នាំរូបនេះ បានសម្រេចយកទៅដាក់ជូនក្រសួងសុខាភិបាល និងការងារ។ នាងបានរៀបរាប់ថា៖ «បន្ទាប់ពីការងារ ទាំងអស់គ្នាត្រូវដើរផ្លូវឆ្ងាយ និងឡើងខ្ពស់ ដូច្នេះការពាក់ស្បែកជើងចោត អាចបង្កឲ្យមានការឈឺចាប់ និងហើមប៉ោងជើង»។
លោកស្រី Kanako Otsuji សមាជិកបក្សប្រឆាំង និងជាសកម្មជន LGBT បាននិយាយក្នុងសភាថា លក្ខខណ្ឌនៃការស្លៀកពាក់ដែលតម្រូវសម្រាប់តែបុគ្គលិកនារី គឺជាការរើសអើងផ្លូវភេទមួយ និងជារឿងហួសសម័យទៅហើយក្នុងសង្គមជប៉ុន។
ផ្ទុយទៅវិញ Takumi Nemoto រដ្ឋមន្ត្រីក្រសួងសុខាភិបាល ការងារ និងសង្គមកិច្ច បានលើកឡើងថា លក្ខខណ្ឌដែលមិនអាចទទួលយកបាននោះ គឺការបង្ខំឲ្យពាក់ស្បែកជើងកែងចោត ទាំងឈឺជើង ប៉ុន្តែបើគ្មានបញ្ហាអ្វីទេនោះ ការពាក់បែនេះ គឺល្អបំផុត។
លោកបានលើកឡើងថា វាជាប្រពៃណីទៅហើយ ដែលស្ត្រីពាក់ស្បែកជើងកែងចោតទៅធ្វើការ ពីព្រោះវាមានសារសំខាន់ និងសមរម្យបំផុត។ បើតាមការផ្សាយរបស់រ៉យទ័រ លោករដ្ឋមន្ត្រីក៏បានឃើញញត្តិ #KuToo នោះដែរ ប៉ុន្តែមិនមានការបញ្ចេញយោបល់អ្វីបន្ថែមឡើយ៕
© រក្សាសិទ្ធិដោយ thmeythmey.com