ជាតិ
អ្នកកាសែតអាស៊ី និងកម្ពុជាជាង៦០០នាក់កំពុងជជែកពីស្ថានភាពសារព័ត៌មាននៅសៀមរាប
× កម្ពុជាកំពុងធ្វើជាម្ចាស់ផ្ទះរៀបចំកិច្ចកំពូលសារព័ត៌មានអាស៊ីលើកទី១៦នៅក្នុងទីក្រុងនៃប្រាសាទបុរាណ ដោយមានសម្តេចនាយករដ្ឋមន្ត្រី ហ៊ុន សែន ធ្វើសុន្ទរកថាបើកកិច្ចប្រជុំនេះផ្លូវការនៅព្រឹកថ្ងៃទី១២ខែមិថុនា។ ព្រឹត្តិការណ៍នេះបានចាប់ផ្តើមតាំងពីថ្ងៃ១០ដល់ថ្ងៃទី១៤ខែមិថុនា ការសិក្សាលើវិស័យបច្ចេកវិទ្យា កិច្ចពិភាក្សាលើប្រធានបទជាច្រើនទាក់ទងនឹងការវិវិត្តនៃវិស័យសារព័ត៌មានក្នុងសម័យបដិវត្តឧស្សាហកម្មនៃបញ្ញាញានសប្បនិម្មិត។ កិច្ចប្រជុំអន្តរជាតិនេះត្រូវបានសហការរៀបចំដោយវិទ្យាស្ថានអាស៊ីប៉ាស៊ីហ្វិកដើម្បីការអភិវឌ្ឍប្រព័ន្ធផ្សព្វផ្សាយ (Asia Pacific Institute for Broadcasting Developpment, AIBD)។
ទាំងប្រតិភូអ្នកសារព័ត៌មានបរទេស ទាំងអ្នកកាសែតកម្ពុជា និងភ្ញៀវអ្នកពាក់ព័ន្ធក្នុងវិស័យព័ត៌មានជាង៦០០នាក់ កំពុងមានវត្តមាននៅក្នុងសាលសន្និសីទសុខានៃក្រុងសៀមរាបនៅព្រឹកថ្ងៃទី១២ខែមិថុនានេះ។ នេះបើតាមការបញ្ជាក់របស់លោក ហាស សំអាត អនុរដ្ឋលេខាធិការក្រសួងព័ត៌មានទទួលបន្ទុកលេខាធិការដ្ឋាននៃព្រឹត្តិការណ៍អន្តរជាតិនេះ។ បើតាមការអះអាងរបស់មន្ត្រីជាន់ខ្ពស់នេះដដែល ប្រតិភូបរទេសដែលជាអ្នកសារព័ត៌មាន និងអ្នកជំនាញនានាពាក់ព័ន្ធវិស័យសារព័ត៌មានដែលកំពុងមានវត្តមាននៅក្នុងកិច្ចប្រជុំកំពូលនេះមានជាង២៥០រូប។
កិច្ចប្រជុំកំពូលសារព័ត៌មានអាស៊ីលើកទី១៦ត្រូវបានរៀបចំឡើងក្រោមប្រធានបទ «ប្រព័ន្ធផ្សព្វផ្សាយបែបឌីជីថល៖ ការផ្តោតទៅលើការអភិវឌ្ឍទីផ្សារ»។
មានប្រធានបទសំខាន់ចំនួន៨ ដែលត្រូវបានកំណត់ជាប្រធានបទពិភាក្សាក្នុងចំណោមអ្នកដឹកនាំក្រុមហ៊ុនសារព័ត៌មានមកពីប្រទេសនានាក្នុងតំបន់អាស៊ីដូចជា៖ ការសម្របវិស័យសារព័ត៌មានទៅនឹងបច្ចេកវិទ្យាឌីជីថល, ការស្វែងរកចំណូល និងការប្រកួតប្រជែងរវាងសារព័ត៌មានបុរាណនិងទំនើប, ការរក្សាឯកសារ និងការប្រយុទ្ធប្រឆាំងព័ត៌មានក្លែងបន្លំជាដើម។
គួរបញ្ជាក់ផងដែរថា ក្រោយពីកិច្ចពិភាក្សារយៈពេលពីរថ្ងៃ ប្រតិភូសារព័ត៌មានបរទេសនឹងត្រូវនាំទស្សនាប្រសាទបុរាណខ្មែរ និងសារមន្ទីរមីនផងដែរ ដើម្បីពួកគេអាចស្វែងយល់ពីប្រទេសកម្ពុជាបានកាន់តែច្រើន។
រដ្ឋមន្ត្រីក្រសួងព័ត៌មានកម្ពុជា លោក ខៀវ កាញារីទ្ធ បានមានប្រសាសន៍នៅក្នុងពិធីបើកសន្និសីទកំពូលសារព័ត៌មានអាស៊ីថា សន្និសីទនេះ គឺជាព្រឹត្តិការណ៍អន្តរជាតិនាំមុខមួយក្នុងវិស័យសោតទស្សន៍ ដែលផ្តល់កាលានុវត្តភាពដល់រដ្ឋមន្ត្រីព័ត៌មាន ប្រតិបត្តការណ៍សោតទស្សន៍ និងបុគ្គលិកបម្រើការងារឱ្យប្រព័ន្ធផ្សព្វផ្សាយ ថ្នាក់ដឹកនាំវិស័យឧស្សាហកម្មព័ត៌មាន អ្នកស្រាវជ្រាវ អ្នកជំនាញ ជាដើម។
សន្និសីទកំពូលសារព័ត៌មានអាស៊ី ត្រូវបានរៀបចំជាលើកដំបូងនៅក្នុងឆ្នាំ២០០៤ នៅក្នុងទីក្រុងកូឡាឡាំពួរ ប្រទេសម៉ាឡេស៊ី រហូតដល់ឆ្នាំ២០០៨។ បន្ទាប់មក សន្និសីទកំពូលនេះត្រូវបានរៀបចំ ជាបន្តបន្ទាប់នៅក្នុងទីក្រុងម៉ាកាវ ឥណ្ឌូនេស៊ី ថៃ វៀតណាម អារ៉ាប៊ីសាអូឌីត ឥណ្ឌា និងចុងក្រោយនេះនៅក្នុងខេត្តសៀមរាបប្រទេសកម្ពុជា។
Tag:
សារព័ត៌មាន
កាសែត
ឌីជីថល
© រក្សាសិទ្ធិដោយ thmeythmey.com