អន្តរជាតិ
លោក ត្រាំ ប្រឆាំងការប្រើគិញ CIA ដើម្បីស៊ើបព័ត៌មានពីមេដឹកនាំកូរ៉េខាងជើង រូបភាព AFP
× ប្រធានាធិបតីអាមេរិក ដូណាល់ ត្រាំ នៅថ្ងៃទី១១ ខែមិថុនា បានប្រកាសជំហរប្រឆាំងជាសាធារណៈទៅនឹងការប្រើប្រាស់គិញសម្ងាត់របស់ទីភ្នាក់ងារចារកម្មកណ្ដាល (CIA) ដើម្បីប្រមូលព័ត៌មានពីមេដឹកនាំកូរ៉េខាងជើង គីម ជុងអ៊ុន ។ លោក ត្រាំ ប្រាប់អ្នកសារព័ត៌មាននៅសេតវិមានថា លោក នឹងមិនអនុញ្ញាតឲ្យមានការធ្វើបែបនេះក្រោមអាណត្តិរបស់លោកឡើយ។ ការប្រកាសរបស់ប្រធានាធិបតីអាមេរិកបែបនេះ ទំនងផ្ដាច់ផ្លូវរបស់សហគមន៍ចារកម្មអាមេរិកក្នុងការស៊ើបការណ៍ពីរដ្ឋឯកោមួយនេះ។
មួយថ្ងៃក្រោយធ្លាយព័ត៌មានថា លោក គីម ជុងណាម បងប្រុសម្ដាយទីទៃរបស់ប្រមុខដឹកនាំកូរ៉េខាងជើង គីម ជុងអ៊ុន ដែលស្លាប់នៅម៉ាឡេស៊ីជាអ្នកស៊ើបការណ៍ឲ្យទីភ្នាក់ងារចារកម្មកណ្ដាល (CIA) លោក ដូណាល់ ត្រាំ បានចេញមុខមកជំទាស់ការប្រមូលព័ត៌មានពីមេដឹកនាំកូរ៉េខាងជើងតាមរយៈគិញសម្ងាត់បែបនេះ។
ប្រាប់ពីអ្នកសារព័ត៌មាននៅសួនច្បារសេតវិមាន លោក ត្រាំ និយាយនៅថ្ងៃទី១១ ខែមិថុនា ថា លោកបានដឹងព័ត៌មានពី CIA ទាក់ទងលោក គីម ជុងណាម បងប្រុសលោក គីម ជុងអ៊ុន ។ បើតាមទីភ្នាក់ងារព័ត៌មាន Reuters ប្រធានាធិបតីអាមេរិករូបនេះបញ្ជាក់ថា លោកនឹងមិនរឿងបែបនេះកើតឡើងក្នុងអាណត្តិរបស់លោកឡើយ។
ការលើកឡើងរបស់លោក ត្រាំ ទំនងជាការបន្តគោលនយោបាយថ្នមចិត្តមេដឹកនាំកូរ៉េខាងជើង សំដៅដោះស្រាយបញ្ហានុយក្លេអ៊ែរដែលកំពុងជាប់គាំង។ ប៉ុន្តែវាបង្ហាញពីការផ្ទុយគំនិតជាមួយសហគមន៍ចារកម្មអាមេរិកដែលត្រូវការប្រមូលព័ត៌មានពីរដ្ឋកុម្មុយនីស្តមួយនេះ។
អតីតមន្ត្រីអាមេរិកខ្លះ បានបង្ហាញការមិនពេញចិត្តចំពោះការប្រកាសជាសាធារណៈរបស់លោក ត្រាំ បែបនេះ។ លោកស្រី Susan Rice អតីតទីប្រឹក្សាសន្តិសុខជាតិសម័យលោក បារ៉ាក់ អូបាម៉ា បានបង្ហោះសារក្នុងន័យចំអកឲ្យលោក ត្រាំ តាមបណ្ដាញសង្គម Twitter ។ ដោយសំដៅការអធិប្បាយរបស់លោក ត្រាំ លោកស្រីថា៖ «ប្រជាជនអាមេរិក សម្ដីនេះបានប្រាប់អ្នកថា អ្នកត្រូវដឹងពីអគ្គមេបញ្ជាការរបស់អ្នក។»
កូរ៉េខាងជើង ត្រូវបានសហគមន៍ចារកម្មចាត់ទុកជាគោលដៅដែលពិបាកជ្រើសរើសមនុស្សធ្វើការឲ្យខ្លួន។ ការបិទជិតខ្លាំងពេកពីពិភពខាងក្រៅ គឺជារឿងសាំញាំសម្រាប់អាមេរិក និងប្រទេសណាដែលចង់ប្រមូលព័ត៌មានពីប្រព័ន្ធដឹកនាំរដ្ឋកូរ៉េខាងជើង។ ព័ត៌មានទាក់ទងមេដឹកនាំសំខាន់ៗ ពិសេសលោក គីម ជុងអ៊ុន និងគ្រួសារត្រកូល គីម មិនត្រូវបានបញ្ចេញជាសាធារណៈឡើយ ហើយក៏ត្រូវបានបិទបាំងយ៉ាងអាថ៌កំបាំងទៅទៀតផង។
ចារកម្មអាមេរិក ត្រូវការព័ត៌មានពីកូរ៉េខាងជើងដើម្បីវិភាគស្ថានការណ៍ ស្របពេលដែលការចរចារឿងរំសាយនុយក្លេអ៊ែរមិនដំណើរការ។ ពីសេតវិមាន លោក ត្រាំ ក៏បង្ហើបដែរថា លោកបានទទួលសំបុត្រដ៏ស្រស់ស្អាត និងកក់ក្ដៅពីមេដឹកនាំកូរ៉េខាងជើង។ លោកលើកឡើងថា រឿងវិជ្ជមាននឹងកើតឡើងនៅពេលខាងមុខ៕
Tag:
អាមេរិក
កូរ៉េខាងជើង
ដូណាល់ ត្រាំ
CIA
© រក្សាសិទ្ធិដោយ thmeythmey.com