ចាន់ វឌ្ឍនាកា វិលមកទ្រនំចាស់វិញ ដោយចុះកុងត្រា៣ឆ្នាំ

កីឡាជាតិ

ជាតិ

ចាន់ វឌ្ឍនាកា វិលមកទ្រនំចាស់វិញ ដោយចុះកុងត្រា៣ឆ្នាំ

12, Jun 2019 , 2:12 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ កីឡាករខ្សែប្រយុទ្ធវ័យក្មេងកម្ពុជា ចាន់ វឌ្ឍនាកា បានត្រឡប់ចូលរួមជាមួយក្លិបបាល់ទាត់បឹងកេតជាថ្មី ក្រោយចាកចេញពីក្លិប PKNS របស់ម៉ាឡេស៊ី កាលពីពេលថ្មីៗនេះ។ ចាន់ វឌ្ឍនាកា បន្តកុងត្រាជាមួយក្លិបបឹងកេត រយៈពេល៣ឆ្នាំ។ នេះបើតាមការចុះផ្សាយលើហ្វេសប៊ុកផ្លូវការរបស់ក្លិបបាល់ទាត់បឹងកេត នៅថ្ងៃទី១២ មិថុនា។

ក្លិបបាល់ទាត់បឹងកេត បានបញ្ជាក់ថា ចាន់ វឌ្ឍនាកា ដែលប្រើឯកសណ្ឋានលេខ១១ ដដែលនេះ នឹងត្រូវចូលរួមជួយក្រុម ក្នុងការប្រកួតជើងទី២ នៃក្របខ័ណ្ឌលីគកំពូលកម្ពុជា រដូវកាល ២០១៩ និងពានរង្វាន់សម្តេច ហ៊ុន សែន ប្រចាំឆ្នាំ ២០១៩ ។

តាមរយៈហ្វេសប៊ុកក្លិបបឹងកេត ដែលបានស្រង់សម្ដីគ្រូបង្វឹក ហៅ សុជាតិ ពីចំណាប់អារម្មណ៍ចំពោះខ្សែប្រយុទ្ធវ័យក្មេងរូបនេះ យ៉ាងដូច្នេះថា៖ « ការមកវិញរបស់ វឌ្ឍនាកា គឺល្អសម្រាប់យើងក្នុងជើងទី២ ព្រោះចំណុចល្អរបស់គាត់ នឹងបំពេញនូវអ្វីដែលយើងខ្វះខាតក្នុងជើងទី១នេះ ពិសេសគឺតំបន់ប្រយុទ្ធ » ។

ការវិលត្រឡប់មកកាន់ទ្រនំចាស់វិញនេះ គឺធ្វើឡើងក្រោយពី ចាន់ វឌ្ឍនាការ បដិសេធទៅចូលរួមជាមួយក្លិប Terengganu FC របស់ម៉ាឡេស៊ី និងក្លិបមួយចំនួនទៀត។ នេះបើតាមការអះអាងរបស់ក្លិបបឹងកេត។

នេះជាលើកទី៣ហើយ ដែលខ្សែប្រយុទ្ធ ចាន់ វឌ្ឍនាកា បានរួមរស់ជាមួយក្លិបបឹងកេត បន្ទាប់ពីរូបគេ បានចូលរួមជាលើកដំបូង គឺនៅឆ្នាំ២០១២ ក្រោយផ្លាស់ពីក្លិបស្វាយរៀង និងឆ្នាំ២០១៨ ក្រោយពីទៅលេងឲ្យក្លិប Fujieda MYFC នៅជប៉ុន រយៈពេល១ឆ្នាំ។

ខ្សែប្រយុទ្ធ ចាន់ វឌ្ឍនាកា ទើបតែចាកចេញពី PKNS FC របស់ម៉ាឡេស៊ី កាលពីថ្ងៃទី២៩ ឧសភា នៃពាក់កណ្ដាលរដូវកាល ឆ្នាំ២០១៩។ ចាន់ វឌ្ឍនាកា បានជួយក្រុម PKNS រយៈពេលខ្លី គឺចាប់ដើមខែមករា ដល់ខែឧសភា ឆ្នាំ២០១៩។ ហើយកីឡាករកម្ពុជារូបនេះ ក៏ធ្លាប់ត្រូវបានក្លិប Pahang FA បញ្ចប់កុងត្រាពាក់កណ្ដាលរដូវកាល ២០១៨ ក្នុងក្របខ័ណ្ឌលីគកំពូលម៉ាឡេស៊ី Malaysia Super League ផងដែរ៕