អន្តរជាតិ
តៃវ៉ាន់ ប្រកាសគាំទ្របាតុករហុងកុងដែលប្រឆាំងសំណើច្បាប់ធ្វើបត្យាប័នជាមួយចិន ការតវ៉ាប្រឆាំងសំណើច្បាប់ធ្វើបត្យាប័ននៅហុងកុង។ រូបភាព AFP
× កោះតៃវ៉ាន់ នៅថ្ងៃទី១២ ខែមិថុនា បានប្រកាសគាំទ្របាតុករហុងកុងដែលកំពុងតវ៉ាសំណើច្បាប់ធ្វើបត្យាប័នជាមួយចិន។ រដ្ឋមន្ត្រីការបរទេសកោះតៃវ៉ាន់ Joseph Wu ចាត់ទុកការធ្វើបាតុកម្មនេះ ជាការតវ៉ាដើម្បីនីតិរដ្ឋ។ បាតុករបានប្រមូលផ្ដុំគ្នាតាំងពីល្ងាចថ្ងៃទី១១ ខែមិថុនា ហើយការតវ៉ាទ្រង់ទ្រាយធំបានធ្វើឡើងនៅថ្ងៃទី១២ ខែមិថុនា ដែលធ្វើឲ្យផ្នែកជាច្រើនរបស់ហុងកុងគ្មានដំណើរការ។ ការប៉ះទង្គិចក៏កើតមានក្រោយបាតុករប្រឹងរុលចូលអាគារសភាហុងកុង។
បាតុកម្មលើកទីពីរប្រឆាំងសំណើច្បាប់ធ្វើបត្យាប័នជនសង្ស័យទៅកាត់ក្ដីនៅតុលាការចិន បានធ្វើឡើងនៅថ្ងៃទី១២ ខែមិថុនានៅផ្នែកជាច្រើនរបស់ទីក្រុងហុងកុង។ បាតុកររាប់ពាន់នាក់ បានប្រមូលផ្ដុំគ្នាត្រៀបត្រានៅតាមផ្លូវឆ្ពោះទៅកាន់អាគារដ្ឋាភិបាលហុងកុង និងអាគារសភាជាទីដែលសំណើច្បាប់ធ្វើបត្យាប័នឈានដល់ការជជែកលើកទីពីរ។ យ៉ាងណាមិញ ការជជែកលើសំណើនេះ ត្រូវបានពន្យារពេលដោយសារក្រុមបាតុករ។
រដ្ឋមន្រ្តីការបរទេសតៃវ៉ាន់ Joseph Wu ។ រូបភាព AFP
រដ្ឋាភិបាលកោះតៃវ៉ាន់ បានចេញមកប្រកាសការគាំទ្រក្រុមបាតុករហុងកុង។ រដ្ឋមន្ត្រីការបរទេសតៃវ៉ាន់ Joseph Wu បានសរសេរលើ Twitter ក្រសួងការបរទេស ថា៖ «ខ្ញុំឈរប្រកៀកស្មាជាមួយបាតុកររាប់រយពាន់នាក់នៅហុងកុងដែលប្រឆាំងសំណើច្បាប់ធ្វើបត្យាប័ន និងដើម្បីនីតិរដ្ឋ។ សូមដឹងថា អ្នកមិននៅតែឯងឡើយ។» ប្រមុខការទូតតៃវ៉ាន់បន្តថា តៃវ៉ាន់នឹងឈរជាមួយប្រជាជនហុងកុង ហើយឆន្ទៈរបស់ប្រជាជន នឹងឈ្នះ។
ជាមួយគ្នានោះ តំណាងអង្គការអន្តរជាតិច្រើនប្រចាំតៃវ៉ាន់ដូចជាតម្លាភាពអន្តរជាតិ និងអ្នកសារព័ត៌មានគ្មានព្រំដែន (RSF) បានប្រមូលផ្ដុំគ្នាខាងមុខការិយាល័យសេដ្ឋកិច្ច ពាណិជ្ជកម្ម និងវប្បធម៌ហុងកុងក្នុងទីក្រុងតៃប៉ិដើម្បីបង្ហាញការគាំទ្ររបស់ពួកគេដែរ។ លោក Cedric Alviani ប្រធានការិយាល័យអាស៊ីបូព៌ារបស់ RSF និយាយថា សំណើច្បាប់នេះ ជាការគំរាមកំហែងដល់ប្រជាជន និងអ្នកទេសចរនៅហុងកុងរាប់ទាំងអ្នកកាសែត និងប្រភពព័ត៌មានរបស់ពួកគេផង។
យ៉ាងណាមិញ ការប៉ះទង្គិចបានកើតឡើងនៅរសៀលថ្ងៃទី១២ ខែមិថុនានេះ បន្ទាប់ពីឱសានវាទរបស់បាតុករដែលទាមទារឲ្យដកចេញសេចក្ដីស្នើច្បាប់នេះ។ ក្រុមបាតុករដែលពាក់ម៉ាស និងទទូលឆត្រផងនោះ បានព្យាយាមជ្រៀតចូលសភាហុងកុង តែត្រូវរុញច្រានដោយប៉ូលិសដែលបាញ់ម្សៅម្រិច និងឧស្ម័នបង្ហូរទឹកភ្នែកដើម្បីបំបែកបាតុករ។
ស្នងការប៉ូលិសហុងកុង Stephen Lo Wai បានប្រកាសការប៉ះទង្គិចនេះជាកុបកម្ម បន្ទាប់ស្ថានករណ៍កាន់តែតានតឹង។ ការចាត់ថា្នក់បែបនេះ នឹងបើកសិទ្ធិឲ្យប៉ូលិសមានអំណាចច្រើនក្នុងការទប់ទល់នឹងការតវ៉ា ខណៈអ្នកតវ៉ាដែលត្រូវចាប់ខ្លួន ប្រឈមមុខទោសទណ្ឌធ្ងន់ធ្ងរផង។ បើតាមកាសែត South China Morning Post មេប៉ូលិសហុងកុងព្រមានបាតុករកុំធ្វើសកម្មភាពដែលនាំឲ្យមានវិប្បដិសារីមួយជីវិតឲ្យសោះ៕
© រក្សាសិទ្ធិដោយ thmeythmey.com