អន្តរជាតិ
មុនជួបលោក ត្រាំ នៅចុងខែមិថុនា, លោក មូន សង្ឃឹមបានជួបលោក គីម សិន រូបភាព AFP
× ប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី១២ ខែមិថុនា បង្ហាញក្ដីសង្ឃឹមជួបជាមួយមេដឹកនាំកូរ៉េខាងជើង គីម ជុងអ៊ុន ឲ្យបានមុនដំណើរទស្សនកិច្ចប្រធានាធិបតីអាមេរិកនៅកូរ៉េខាងត្បូង សំដៅរក្សាបរិយាកាសនៅឧបទ្វីបឲ្យល្អប្រសើរ ខណៈការខ្វែងគំនិតគ្នារវាងអាមេរិក និងកូរ៉េខាងជើង ធ្វើឲ្យមានភាពតានតឹងខ្លះៗវិញ។ ពីទឹកដីន័រវ៉េស លោក មូន ក៏លើកឡើងភាពចាំបាច់ដែលអាមេរិក និងកូរ៉េខាងជើងត្រូវចាប់ផ្ដើមការចរចាឡើងវិញដើម្បីដោះស្រាយបញ្ហានុយក្លេអ៊ែរដែលរាំងស្ទះ។
ប្រធានាធិបតីអាមេរិក ដូណាល់ ត្រាំ នឹងធ្វើទស្សនកិច្ចនៅទឹកដីកូរ៉េខាងត្បូងនៅចុងខែមិថុនាមុខអំឡុងពេលធ្វើដំណើរមកកាន់តំបន់អាស៊ីដើម្បីចូលរួមមេដឹកនាំប្រទេសរីកចម្រើនទាំង២០ (G20) នៅទីក្រុងអូសាកា ប្រទេសជប៉ុន។ តាមគម្រោង លោក ត្រាំ ចូលរួមកិច្ចប្រជុំជប៉ុនពីរថ្ងៃ២៨ ខែមិថុនា។ ប៉ុន្តែគម្រោងទស្សនកិច្ចនៅកូរ៉េខាងត្បូង នៅមិនទាន់ច្បាស់ថា ធ្វើឡើងមុនទៅជប៉ុន ឬឆ្លៀតចូលពេលត្រឡប់ទៅអាមេរិកឡើយ។
ទោះជាយ៉ាងណា ប្រធានាធិបតីកូរ៉េខាងត្បូង មូន ចេអ៊ីន ចង់ជួបមេដឹកនាំកូរ៉េខាងជើង គីម ជុងអ៊ុន សិន សឹមជួបលោក ត្រាំ តាមក្រោយ។ ក្នុងវេទិកាមួយក្នុងទីក្រុងអូស្លូ ប្រទេសន័រវ៉េស លោក មូន និយាយថា លោកចង់ជួបលោក គីម ហើយបើអាមេរិក ជំនួបលើកទីបួននេះ អាចធ្វើមុនដំណើរទស្សនកិច្ចរបស់ប្រធានាធិបតីអាមេរិកនៅសេអ៊ូល។
សម្រាប់ជំនួបជាមួយមេដឹកនាំកូរ៉េខាងជើង លោក មូន បញ្ជាក់ថា លោកត្រៀមជួបលោក គីម គ្រប់ទីកន្លែង និងគ្រប់ពេលវេលាតាមការចង់បានរបស់លោក គីម ផ្ទាល់។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។
ក្នុងវេទិកាដដែល ប្រធានាធិបតីកូរ៉េខាងត្បូង បានបង្ហើបពីការផ្លាស់ប្ដូរសំបុត្ររវាងលោក ត្រាំ និងលោក គីម នាពេលថ្មីៗនេះ។ ការដោះដូរសំបុត្ររវាងមេដឹកនាំអាមេរិក និងកូរ៉េខាងជើងតាមរយៈកូរ៉េខាងត្បូង ឬមធ្យោបាយដទៃទៀត ក្លាយជាច្រកទំនាក់ទំនងរវាងប្រទេសដែលគ្មានទំនាក់ទំនងការទូតផ្លូវការនឹងគ្នាទាំងពីរ។ លោក មូន ចាត់ទុកសកម្មភាពបែបនេះ ជាការរក្សាបរិយាកាសសន្ទនាឲ្យនៅតែល្អប្រសើរដូចឆ្នាំមុន។
យ៉ាងណាមិញ ប្រមុខរដ្ឋកូរ៉េខាងត្បូង ក៏ព្រមានដែរថា បរិយាកាសនេះ អាចបាត់បង់ទៅវិញ ប្រសិនភាពទ័លច្រកក្នុងការជជែកពីការរំសាយនុយក្លេអ៊ែរ និងការបង្កើតសន្តិភាព ចេះតែអូសបន្លាយទៀតនោះ។ លោក មូន បានអំពាវនាវឲ្យមានជំនួបរវាងលោក គីម និងលោក ត្រាំ ឲ្យបានឆាប់កាន់តែអាចធ្វើបានដើម្បីដោះស្រាយបញ្ហា។ បើជំនួបលើកទីបួនជាមួយលោក គីម កើតឡើងរយៈពេលខ្លីខាងមុខ ជំនួបមេដឹកនាំអាមេរិក-កូរ៉េខាងជើងលើកទីបី ក៏អាចកើតឡើងបានលឿនដែរ៕
Tag:
កូរ៉េខាងត្បូង
កូរ៉េខាងជើង
អាមេរិក
មូន ចេអ៊ីន
គីម ជុងអ៊ុន
ដូណាល់ ត្រាំ
© រក្សាសិទ្ធិដោយ thmeythmey.com