ក្រុមហ៊ុន អ អិម អេ ខេមបូឌា (RMA Cambodia) ដែលជាបុត្រសម្ព័ន្ធរបស់ក្រុមហ៊ុន អ អិម អេ គ្រុប (RMA Group) បានប្រារព្ធពិធីសម្ពោធ និងប្រគល់ «មជ្ឈមណ្ឌលបណ្តុះបណ្តាលបច្ចេក ទេស អ អិម អេ» ទៅដល់វិទ្យាស្ថានបច្ចេកទេសឧស្សាហកម្ម កាលពីថ្ងៃទី 0៦ ខែមិថុនា ឆ្នាំ ២០១៩ ក្រោមអធិបតីភាពដ៏ខ្ពង់ខ្ពស់ ឯកឧត្តមបណ្ឌិត ពេជ សោភ័ន រដ្ឋលេខាធិការប្រចាំការនៃក្រសួងការងារ និងបណ្ដុះបណ្ដាលវិជ្ជាជីវៈ។ មជ្ឈមណ្ឌលបណ្តុះបណ្តាលបច្ចេកទេស អ អិម អេ ជាមជ្ឈមណ្ឌលបណ្តុះបណ្តាលជំនាញបច្ចេកទេសជុសជុល និងថែទាំរថយន្ត Ford និង Jonh Deere ត្រាក់ទ័រ ដែលត្រូវបានបង្កើតឡើងសម្រាប់ប្រើប្រាស់ក្នុងការបណ្តុះបណ្តាលវិជ្ជាជីវៈក្នុងវិទ្យាស្ថានបច្ចេកទេសឧស្សាហកម្ម ដែលមានទីតាំងស្ថិតនៅមហាវិថីសហព័ន្ធរុស្សី សង្កាត់ទឹកថ្លា ខណ្ឌសែនសុខ (ជិតវត្តទឹកថ្លា)។
ក្រុមហ៊ុន អ អិម អេ បានឧបត្ថម្ភ និងគាំទ្រវិទ្យាស្ថានបច្ចេកទេសឧស្សាហកម្ម ក្នុងការបង្កើតមជ្ឈមណ្ឌលបណ្តុះបណ្តាលបច្ចេកទេសនេះឡើង ដោយជួសជុល និងកែលម្អរោងជាងទាំងមូល ព្រមទាំងបំពាក់នូវម៉ាស៊ីនត្រជាក់ គ្រឿងបរិក្ខាសម្រាប់សិក្សា និងគ្រឿងតុបតែងលម្អ រថយន្ត Ford មួយគ្រឿង ត្រាក់ទ័រ John Deere ពីរគ្រឿង ។ ជាពិសេសបង្កើតកម្មវិធីបណ្ដុះបណ្ដាលជំនាញបច្ចេកទេសនានា សម្រាប់ផ្ដល់ឱកាសដល់សិស្ស និស្សិតសិក្សារៀនសូត្រ ហ្វឹកហាត់ការងារដោយអនុវត្ដផ្ទាល់ជាមួយអ្នកជំនាញបច្ចេកទេស និងគ្រូបង្គោលរបស់ក្រុមហ៊ុន អ អិម អេ តាមរយៈកិច្ចសហប្រតិបតិ្តការរវាងក្រុមហ៊ុន អ អិម អេ និងវិទ្យាស្ថានបច្ចេកទេសឧស្សាហកម្ម។
លោក ងន សាំង អគ្គនាយកក្រុមហ៊ុន RMA Cambodia បានមានប្រសាសន៍ថា៖ «ថ្ងៃនេះ ខ្ញុំមានកិត្តិយសដ៏ខ្ពង់ខ្ពស់ និងសេចក្តីសោមនស្សរីករាយ ដែលបានចូលរួមក្នុងពិធីសម្ពោធមជ្ឈមណ្ឌលបណ្តុះបណ្តាលបច្ចេកទេស អ អិម អេ ជាមួយរាជរដ្ឋាភិបាលនៃព្រះរាជាណាចក្រកម្ពុជា សម្រាប់ដាក់ជូនប្រើប្រាស់បណ្តុះបណ្តាលក្នុងវិទ្យាស្ថានបច្ចេកទេសឧស្សាហកម្ម ។ ជារៀងរាល់ឆ្នាំក្រុមហ៊ុន អ អិម អេ បានចំណាយថវិកាប្រមាណជាង៥០ម៉ឺនដុល្លារ សម្រាប់ការវិនិយោគលើការបណ្ដុះបណ្ដាលបច្ចេកទេស និងជំនាញផ្សេងៗដល់បុគ្គលិក និងសិស្សនិស្សិតតាមសាលាបច្ចេកទេសនានា។ តាមរយៈការវិនិយោគទៅលើវិស័យធនធានមនុស្សនេះហើយ ដែលជាកត្តាជុំរុញឲ្យមជ្ឈមណ្ឌលបណ្តុះបណ្តាលបច្ចេកទេស អ អិម អេ លេចចេញជារូបរាងឡើង។
«ខ្ញុំជឿជាក់យ៉ាងមុតមាំថា មជ្ឈមណ្ឌលបណ្តុះបណ្តាលបច្ចេកទេស អ អិម អេ នេះ នឹងក្លាយជាមជ្ឈមណ្ឌលមួយដែលចូលរួមយ៉ាងសកម្មក្នុងការអភិវឌ្ឍធនធានមនុស្សនៅក្នុងប្រទេសកម្ពុជា ដើម្បីឆ្លើយតបទៅនឹងតម្រូវការទីផ្សារការងារផ្នែកបច្ចេកទេសយានយន្ត និងគ្រឿងចក្រ»។ នេះជាការលើកឡើងរបស់លោក ងន សាំង អគ្គនាយកក្រុមហ៊ុន RMA Cambodia។
លើសពីនេះទៅទៀត គម្រោងសាងសង់មជ្ឈមណ្ឌលបណ្តុះបណ្តាលបច្ចេកទេស អ អិម អេ នេះ ទទួលបានការជ្រោមជ្រែងយ៉ាងខ្លាំងពីសំណាក់ក្រសួងការងារ និងបណ្តុះបណ្តាលវិជ្ជាជីវៈ តាមរយៈវិទ្យាស្ថានបច្ចេកទេសឧស្សាហកម្ម។
ឯកឧត្តមបណ្ឌិត ពេជ សោភ័ន រដ្ឋលេខាធិការប្រចាំការនៃក្រសួងការងារ និងបណ្តុះបណ្តាលវិជ្ជាជីវៈ និងជាអនុប្រធានគណៈកម្មាធិការជាតិបណ្តុះបណ្តាល បានមានប្រសាសន៍ថា៖ «តាមរយៈមជ្ឈមណ្ឌលបណ្តុះបណ្តាលបច្ចេកទេស អ អិម អេ ដែលបានសម្ពោធដាក់ឲ្យប្រើប្រាស់ថ្ងៃនេះ ខ្ញុំជឿជាក់ថានឹងក្លាយជាមជ្ឈមណ្ឌលមួយដែលចូលរួមយ៉ាងសកម្ម ក្នុងការបណ្តុះបណ្តាលបច្ចេកទេសនៅកម្ពុជា ដែលផ្តល់នូវសេវាបណ្តុះបណ្តាលតាមរយៈវិធានឆ្លាស់។ ក្នុងន័យនេះការបណ្តុះបណ្តាលត្រូវបានរៀបចំឡើងដោយមានការសហការចូលរូមរវាងមជ្ឈមណ្ឌល និងរោងជាងផ្ទាល់របស់ ក្រុមហ៊ុន RMA Cambodia ដែលកំពុងដំណើរការយ៉ាងសកម្មនៅកម្ពុជា។ ជាងនេះទៀត មជ្ឈមណ្ឌលនេះនិងអាចក្លាយទៅជាមជ្ឈមណ្ឌលឧត្តមភាព ដែលចូលរួមគ្រប់សកម្មភាពអភិវឌ្ឍន៍ធនធានមនុស្សនៅកម្ពុជា»។
ជាមួយគ្នានេះលោក ក៏បានកោតសរសើរដល់ក្រុមហ៊ុន Ford និង ក្រុមហ៊ុន RMA Cambodia ដែលបានចំណាយធនធានយ៉ាងច្រើន ក្នុងការរួមចំណែកក្នុងការអភិវឌ្ឍវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ និងចូលរួមចំណែកក្នុងកសាងធនធានមនុស្សនៅកម្ពុជាផងដែរ។
(អត្ថបទពាណិជ្ជកម្ម)