កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
កីឡាករវាយសីម៉ាឡេស៊ី Lee Chong Wei នៅថ្ងៃទី១៣ ខែមិថុនានេះ បានប្រកាសចូលនិវត្តន៍ហើយ បន្ទាប់ពីប្រកបអាជីពអស់រយៈពេល ១៩ ឆ្នាំ។
Lee ដែលសព្វថ្ងៃមានអាយុ៣៦ឆ្នាំ បានរៀបរាប់ពីការបញ្ចប់អាជីពរបស់ខ្លួនទាំងទឹកភ្នែកប្រាប់អ្នកកាសែតក្នុងសន្និសីទសារព័ត៌មានថា៖«ការសម្រេចចិត្តចូលនិវត្តន៍របស់ខ្ញុំគឺទាំងបង្ខំចិត្ត។ ខ្ញុំពិតជាចូលចិត្តកីឡានេះខ្លាំងណាស់។ ខ្ញុំសូមអរគុណដល់ប្រជាជនម៉ាឡេស៊ីសម្រាប់ការគាំទ្ររយៈពេល ១៩ ឆ្នាំមកនេះ»។
អតីតកីឡាករវាយសីលំដាប់ទី១ពិភពលោក និងជាម្ចាស់មេដាយប្រាក់អូឡាំពិក៣សម័យរូបនេះ ពិតជាចង់បង្ហាញខ្លួនលើកចុងក្រោយនៅកីឡាអូឡាំពិកក្រុងតូក្យូឆ្នាំ២០២០ ប៉ុន្តែយ៉ាងណាក៏ដោយគ្រូពេទ្យបានណែនាំរូបគេសម្រាកចាប់ពីពេលនេះតទៅតែម្តង ដើម្បីកាត់បន្ថយសម្ពាធជំងឺ។
Lee ដែលត្រូវបានគេចាត់ទុកជាវីរបុរសម៉ាឡេស៊ី បានធ្វើរោគវិនិច្ឆ័យឃើញថាមានជំងឺមហារីកច្រមុះដំណាក់កាលដំបូងកាលពីខែកក្កដាឆ្នាំមុន ហើយព័ត៌មានពីស្ថានភាពរបស់លោក និងការព្យាបាលជាបន្តបន្ទាប់នៅតៃវ៉ាន់ក៏បានបង្ហាញជាសាធារណៈនៅខែកញ្ញាកន្លងទៅផងដែរ។
បន្ទាប់ពីរកឃើញថាមានជំងឺមហារីក Lee ដែលមានកូនពីរនាក់ផងរៀបរាប់ថា ខ្លួនចង់សម្រាក និងចំណាយពេលជាមួយគ្រួសារដោយនាំប្រពន្ធកូនដើរកម្សាន្តវិញម្តង ដ្បិតមិនបាននាំភរិយាទៅក្រេបទឹកឃ្ញុំចាប់តាំងពីរៀបអាពាហ៍ពិពាហ៍រួចនៅឆ្នាំ២០១២ មក៕
Tag:
កីឡាវាយសី
Lee Chong Wei
© រក្សាសិទ្ធិដោយ thmeythmey.com
