អន្តរជាតិ
អាមេរិកចោទអុីរ៉ង់ថា នៅពីក្រោយការវាយប្រហារកប៉ាល់ពីរគ្រឿងនៅឈូងសមុទ្រអូម៉ង់
× ស្ថានការណ៍នៅតំបន់ឈូងសមុទ្រពែរ្ស បានតានតឹងជាថ្មី បន្ទាប់ពីមានការប្រហារលើកប៉ាល់ពីរគ្រឿងក្នុងដែនទឹកនៃឈូងសមុទ្រអូម៉ង់នៅថ្ងៃទី១៣ ខែមិថុនា។ ភ្លាមៗអាមេរិកបានចោទអុីរ៉ង់ថា នៅពីក្រោយការវាយប្រហារនេះ ហើយខ្លួនមានភស្តុតាងទៀតផង ប៉ុន្តែអុីរ៉ង់បានបដិសេធ។ ប្រមុខអង្គការសហប្រជាជាតិ បានស្នើឲ្យមានការបញ្ចៀសជម្លោះនៅតំបន់នេះ ខណៈសហភាពអឺរ៉ុបបានទទូចឲ្យមានការអត់ធ្មត់ខ្ពស់។
កប៉ាល់ពីរគ្រឿងដែលជាកម្មសិទ្ធិរបស់ន័រវ៉េស និងជប៉ុន បានរងការវាយប្រហារនៅក្នុងឈូងសមុទ្រអូម៉ង់ បន្ទាប់ពីចេញផុតច្រកសមុទ្រ Hormuz ក្នុងដំណើរឆ្ពោះទៅកាន់អាស៊ី។ អាជ្ញាធរសមុទ្រន័រវ៉េស និយាយថា កប៉ាល់ Front Altair ដែលដឹកនាំអេតាណុល បានរងការបំផ្ទុះចំនួនបី ហើយបន្តឆេះដល់យប់ថ្ងៃទី១៣ ខែមិថុនា។ ចំណែកកប៉ាល់ជប៉ុន Kokuka Courageous ដែលដឹកមេតាណុល ក៏រងការបំផ្ទុះដែរ ប៉ុន្តែភ្លើងបានរលត់វិញ។
មិនមានការប្រកាសទទួលខុសត្រូវលើករណីនេះឡើយ ប៉ុន្តែស្ថានការណ៍ក្នុងតំបន់កំពុងឡើងកម្ដៅខ្លាំង។ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានទម្លាក់លើអុីរ៉ង់ចំៗតែម្ដង បន្ទាប់ពីកងទ័ពជើងទឹកអាមេរិកនិយាយថា ខ្លួនរកឃើញគ្រាប់មីនម៉ាញ៉េទិកដែលមិនទាន់ផ្ទុះលើកប៉ាល់មួយក្នុងចំណោមកប៉ាល់ទាំងពីរ។ លោក ប៉ុមប៉េអូ ប្រកាសថា ក្នុងតំបន់ទាំងមូលមានតែអុីរ៉ង់មួយគត់ដែលមានសមត្ថភាពធ្វើសកម្មភាពបែបនេះបាន។
«នេះជាការវាយតម្លៃរបស់អាមេរិកដែលសាធារណរដ្ឋឥស្លាមអុីរ៉ង់ទទួលខុសត្រូវការវាយប្រហារនេះ។» នេះជាការលើកឡើងរបស់លោក ប៉ុមប៉េអូ ដែលបន្តថា ការវាយតម្លៃនេះ គឺពឹងផ្អែកលើព័ត៌មានចារកម្ម អាវុធដែលត្រូវបានប្រើប្រាស និងកម្រិតនៃភាពជំនាញក្នុងការអនុវត្តប្រតិបត្តិការនេះ ការវាយប្រហារថ្មីៗលើកប៉ាល់ដឹកប្រេង។ បើតាមទីភ្នាក់ងារព័ត៌មាន AFP ប្រមុខការទូតអាមេរិករូបនេះអះអាងថាទៀតថា នៅតំបន់នេះ ក៏គ្មានក្រុមណាដែលមានធនធាន អាចធ្វើប្រតិបត្តិការដូចនេះដែរ។
ទីក្រុងតេហេរ៉ង់ឯណោះវិញ បានទាត់ចោលការចោទប្រកាន់របស់អាមេរិក ហើយចាត់ទុកការវាយប្រហារនេះជាករណីសង្ស័យប៉ុណ្ណោះ។ ការវាយប្រហារលើកប៉ាល់ជប៉ុននេះ ធ្វើឡើងខណៈដែលនាយករដ្ឋមន្ត្រីជប៉ុន ស៊ិនហ្សូ អាបេ កំពុងធ្វើទស្សនកិច្ចនៅអុីរ៉ង់ដើម្បីសម្របសម្រួលភាពតានតឹងរវាងអាមេរិក និងអុីរ៉ង់ផ្ទាល់ ប៉ុន្តែទំនងជាមិនអាចទទួលបានផ្លែផ្កាអ្វីទេ ព្រោះមេដឹកនាំកំពូលអុីរ៉ង់ប្រកាសមិនចរចាជាមួយអាមេរិកទៅហើយ។
ជាមួយនឹងការចោទអុីរ៉ង់ លោក ប៉ុមប៉េអូ ក៏បានព្រមានដែរថា អាមេរិកនឹងការពារទាហានរបស់ខ្លួន ផលប្រយោជន៍ក្នុងតំបន់ និងឈរនៅជាមួយដៃគូក្នុងតំបន់ដើម្បីការពារពាណិជ្ជកម្មសាកល និងស្ថិរភាពតំបន់។ ដោយឡែកក្នុងកិច្ចប្រជុំបិទក្រុមប្រឹក្សាសន្តិសុខវិញ តំណាងអាមេរិកបានការវាយប្រហារនេះជាការគំរាមយ៉ាងច្បាស់បង្កដោយអុីរ៉ង់។
រឿងស្ថិរភាពតំបន់នោះ បេសកកម្មអុីរ៉ង់បានតបវិញថា ទណ្ឌកម្ម និងការបង្កើនយោធារបស់អាមេរិកទៅវិញដែលជាការគំរាមកំហែងធ្ងន់ធ្ងរដល់សន្តិភាព និងសន្តិសុខតំបន់។ អុីរ៉ង់បានប្រាប់ឲ្យអាមេរិក និងសម្ព័ន្ធមិត្តរបស់ខ្លួនឈប់សកម្មភាពបង្កសង្ក្រាមរបស់ខ្លួន៕
Tag:
អាមេរិក
អ៊ីរ៉ង់
ម៉ៃ ប៉ុមប៉េអូ
© រក្សាសិទ្ធិដោយ thmeythmey.com