ជាតិ
សង្គមជាតិ
គ្រឿងញៀន១៧គីឡូក្រាម ត្រូវសមត្ថកិច្ចចាប់បាន នៅបាវិត
×
គ្រឿងញៀន១៧គីឡូក្រាម ត្រូវកម្លាំងនគរបាលការពារព្រំដែនលេខ៦១១ នៃស្នងការដ្ឋាននគរបាលខេត្តស្វាយរៀង ចុះបង្ក្រាបនៅក្បែនឹងច្រកអន្តរជាតិបាវិតនៅម៉ោង៨យប់ថ្ងៃទី១៣មិថុនា ឆ្នាំ២០១៩។ ចំណែកឯជនសង្ស័យត្រូវបានរត់គេចខ្លួន។ នេះបើតាមចេញផ្សាយរបស់អគ្គស្នងការដ្ឋាននគរបាលជាតិ។
លោក កែវ សុថា វរសេនីយ៍ឯក ស្នងការរងនគរបាលខេត្តស្វាយរៀង បានឲ្យដឹងថា កម្លាំងនគរបាលការពារព្រំដែនលេខ៦១១ ចេញល្បាតតាមខ្សែក្រវ៉ាត់ព្រំដែន ត្រង់ចំណុចបង្គោលព្រំដែនលេខ១៧០ ស្លាបខាងឆ្វេងច្រកទ្វារអន្តរជាតិបាវិត បានជួបនឹងជនសង្ស័យម្នាក់ ដើរកាត់វាលស្រែក្បែរចម្ការប្រេងខ្យល់ ដោយមានយួរវ៉ាលីធំមួយ។
លោក កែវ សុថា បានអះអាងថា «សមត្ថកិច្ចមានការសង្ស័យ ក៏បានហៅឲ្យឈប់ដើម្បីសួរនាំ តែជនសង្ស័យបានទម្លាក់ វ៉ាលីនោះចោល ហើយរត់គេចខ្លួនចូលចម្ការប្រេងខ្យល់បាត់។ ក្រោយត្រួតពិនិត្យឆែកឆេរវ៉ាលីនោះ សមត្ថកិច្ចបានរកឃើញម្សៅក្រាមពណ៌សថ្លា ដែលសង្ស័យថា ជាគ្រឿងញៀនប្រភេទអំហ្វេតាមីនចំនួន១៧ដុំ ស្មើនឹង១៧គីឡូក្រាម។
វរសេនីយ៍ឯករូបនេះ សន្និដ្ឋានថាជនសង្ស័យប្រុងនាំគ្រឿងញៀននេះ ទៅប្រទេសវៀតណាម ។ បច្ចុប្បន្ននេះកម្លាំងសម្ថកិច្ចកំពុងទាក់ទងភាគីវៀតណាម ដើម្បីស្រាវជ្រាវមុខសញ្ញាពាក់ព័ន្ធ។ រីឯគ្រឿងញៀន១៧គីឡូក្រាម ត្រូវរក្សាទុកនៅប៉ុស្តិ៍ព្រំដែនធ្លក រង់ចាំតំណាងអយ្យការចូលរួមវេចខ្ចប់តាមនីតិវិធី នាំយកទៅកាន់ស្នងការដ្ឋាននគរបាលខេត្តស្វាយរៀង៕
© រក្សាសិទ្ធិដោយ thmeythmey.com