កីឡាជាតិ
ជាតិ
លោក កែវ រ៉េមី៖ បើមិនយកចិត្តទុកដាក់លើថ្នាល កីឡាកម្ពុជាមិនអាចជោគជ័យលើឆាកអន្តរជាតិឡើយ លោក កែវ រ៉េមី ថ្លែងក្នុងពិធីបិទការប្រកួតកីឡាតេក្វាន់ដូ ITF ក្នុងព្រឹត្តិការណ៍កីឡាសិស្សថ្នាក់ជាតិ
× លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា ដែលឲ្យតម្លៃខ្ពស់លើយុវជនថ្នាល ជឿជាក់ថា កីឡាមួយមិនអាចជោគជ័យបានឡើយ បើគ្មានការយកចិត្តទុកដាក់លើការបណ្តុះបណ្តាលយុវជនថ្នាល។ ព្រោះការហ្វឹកហាត់ពីក្មេងជួយឲ្យយុវជនមានបច្ចេកទេសល្អជាងហ្វឹកហាត់ពេលពួកគេពេញវ័យ។ ការលើកឡើងរបស់ប្រធានគណៈកម្មការសិទ្ធិមនុស្សកម្ពុជារូបនេះ ក្នុងពិធីបិទការប្រកួតកីឡាតេក្វាន់ដូ ITF ជ្រើសរើសជើងឯកប្រចាំព្រឹត្តិការណ៍ប្រកួតកីឡាសិស្សថ្នាក់ជាតិ កាលពីថ្ងៃទី១៣ មិថុនា។
កីឡាបើមិនយកចិត្តទុកដាក់លើការបណ្តុះបណ្តាលយុវជនថ្នាល គឺមិនអាចប្រកួតប្រជែងឬដណ្តើមមេដាយលើឆាកអន្តរជាតិជូនជាតិមាតុភូមិបានឡើយ។ នេះជាការយល់ឃើញរបស់លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា ដែលតម្លៃខ្ពស់ការបណ្តុះបណ្តាលថ្នាលយុវជន។ សម្រាប់លោក ការហ្វឹកហាត់ពេលពេញវ័យ មិនសូវមានប្រសិទ្ធិភាពដូចការហ្វឹកហាត់នៅក្មេងឡើយ។ ព្រោះការហ្វឹកហាត់នៅក្មេងជួយកីឡាករមានបច្ចេកទេស និងសមត្ថភាពខ្ពស់ ពេលពួកគេពេញវ័យ។
«ការបណ្តុះថ្នាលមានសារសំខាន់ខ្លាំងណាស់ និយាយឲ្យចំជាអ្នកបន្តវេន។ កីឡាបើយើងមិនយកចិត្តទុកដាក់ថ្នាលដល់កូនតូចៗ ដែលជាអ្នកបន្តវេនទេ គឺមិនអាចដណ្តើមជើងឯកនៅលើពិភពលោក ឬក៏ប្រកួតនៅខាងក្រៅ ដើម្បីដណ្តើមយកមុខមាត់ជូនជាតិមាតុភូមិបានទេ។ រៀមច្បងចាស់ៗនៅពេលគាត់ចាស់ទៅលេងរួច យើងអត់មានអ្នកជំនួសនោះទេ ដូច្នេះថ្នាលមានសារសំខាន់»។ នេះជាការលើកឡើងរបស់លោក កែវ រ៉េមី ក្នុងពិធីបិទការប្រកួតកីឡាសិស្សថ្នាក់ជាតិលើវិញ្ញាសាតេក្វាន់ដូ ITF កាលពីថ្ងៃទី១៣ ខែមិថុនា ឆ្នាំ២០១៩។
ប្រធានគណៈកម្មការសិទ្ធិមនុស្សកម្ពុជារូបនេះ គាំទ្រក្រសួងអប់រំយុវជននិងកីឡាយ៉ាងពេញទំហឹង ចំពោះការយកចិត្តទុកលើការបណ្តុះបណ្តាលថ្នាល និងបង្កើតឲ្យមានការប្រកួតកីឡាសិស្សថ្នាក់ជាតិលើកទី១នេះ។ ព្រឹត្តិការណ៍នេះ គឺជាជំហានមួយដ៏ល្អក្នុងការឈានទៅរកភាពជោគជ័យសម្រាប់វិស័យកីឡានៅកម្ពុជានាថ្ងៃអនាគត។ ហើយវារឹតតែល្អ បើក្រសួងអប់រំ បង្កើតឲ្យមានការប្រកួតបែបនេះកម្រិតមធ្យមសិក្សានិងសាកលវិទ្យាល័យបន្ថែមទៀត។
ប្រធានសហព័ន្ធកីឡាតេក្វាន់ដូ ITF អាស៊ីអាគ្នេយ៍រូបនេះជឿជាក់ថា តាមរយៈព្រឹត្តិការណ៍នេះនឹងជួយទាក់ទាញយុវជនឲ្យចូលរួមលេងកីឡាកាន់តែច្រើន ពិសេសបង្កើតធនធានកីឡាករដ៏សម្បូរបែបសម្រាប់វិស័យកីឡាកម្ពុជា។ ជាមួយការវាយតម្លៃខ្ពស់លើការរៀបចំ និងសមត្ថភាពរីកចម្រើនរបស់កីឡាករកីឡាការិនី លោក កែវ រ៉េមី បានបញ្ជាក់ថា យុវជនដែលដណ្តើមបានមេដាយពីការប្រកួតកីឡាសិស្សថ្នាក់ជាតិលើកទី១ អាចនឹងត្រូវបានជ្រើសរើសឲ្យធ្វើជាយុវថ្នាលជម្រើសជាតិប្រចាំសហព័ន្ធ។
ក្រោយប្រកួតយ៉ាងស្វិតស្វាញរយៈពេល៣ថ្ងៃនៅទីលានដំបូលទូកក្នុងពហុកីឡដ្ឋានជាតិ អត្តពលិកខេត្តស្ទឹងត្រែង លេចធ្លោជាងគេលើវិញ្ញាសាកីឡាតេក្វាន់ដូ ITF បន្ទាប់ពីពួកគេដណ្តើមបានមេដាយមាស៤ ប្រាក់៤ និងសំរឹទ្ធ១។ តាមរយៈមេដាយទាំងនេះ ជួយខេត្តត្បូងឃ្មុំឈរចំណាត់ថ្នាក់លេខ១ ខណៈកំពង់ស្ពឺឈរលេខ២ក្រោយឈ្នះមេដាយមាស៣ ប្រាក់៤ និងសំរឹទ្ធ៣ និងប៉ៃលិនឈរលេខ៣ក្រោយឈ្នះមេដាយមាស៣ ប្រាក់១ និងសំរឹទ្ធ១។
ការប្រកួតនេះមានកីឡាករកីឡាការិនីមកពី៨រាជធានី-ខេត្តចំនួន៨១រូប(ស្រី៤០រូប)ចូលរួមដោយពួកគេប្រកួតប្រជែងគ្នាលើ១២វិញ្ញាសា៕
Tag:
តេក្វាន់ដូ ITF
ត្បូងឃ្មុំ
កីឡាសិស្សថ្នាក់ជាតិ
© រក្សាសិទ្ធិដោយ thmeythmey.com