ជារៀងរាល់ខែមន្ទីរពេទ្យបង្អែកខេត្តសៀមរាបមានតម្រូវការឈាមប្រមាណ៥០០ប្លោក

ជាតិ

ជារៀងរាល់ខែមន្ទីរពេទ្យបង្អែកខេត្តសៀមរាបមានតម្រូវការឈាមប្រមាណ៥០០ប្លោក

15, Jun 2019 , 9:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ យុទ្ធនាការក្នុងការបំផុសឱ្យចូលរួមបរិច្ចាគឈាម មានសកម្មភាពកាន់តែខ្លាំងក្លាឡើងនៅពេលដែលតាមបណ្ដាមន្ទីរពេទ្យនៅកម្ពុជាមានតម្រូវការឈាមជាប្រចាំ និងមានបរិមាណច្រើនពីមួយខែទៅមួយខែ។ ជាមួយគ្នានេះ គ្រាន់តែមន្ទីរពេទ្យបង្អែកខេត្តសៀមរាបមួយ មានតម្រូវការឈាមជាប្រចាំខែចន្លោះពី៤៥០ទៅ៥០០ប្លោកដើម្បីព្យាបាលអ្នកជំងឺ។ ក្នុងន័យផ្សព្វផ្សាយឱ្យប្រជាជនកម្ពុជាយល់និងចូលរួមបរិច្ចាគឈាមនេះ សមាគមនសហគ្រិនវ័យក្មេងកម្ពុជាខេត្តសៀមរាបបានរៀបចំកម្មវិធីបរិច្ចាគឈាមជាទ្រុងទ្រាយធំ ដើម្បីឱ្យយុវជនជួយសង្គមនិងជីវិតមនុស្សតាមរយៈការបរិច្ចាគឈាមនេះ។

ក្រុមយុវជនប្រមាណ១៥០០នាក់មកពីបណ្ដាគ្រឹះស្ថានអប់រំនៅក្នុងក្រុងសៀមរាប បានបង្ហាញវត្តមានដ៏សកម្មក្នុងកម្មវិធីបរិច្ចាគឈាមប្រចាំឆ្នាំរបស់សមាគមសហគ្រិនវ័យក្មេងកម្ពុជាខេត្តសៀមរាប ដែលឧបត្ថម្ភដោយធនាគារ ព្រីនស៍ នៅព្រឹកថ្ងៃទី១៥ មិថុនា នៅបរិវេណមន្ទីរពេទ្យបង្អែកខេត្តសៀមរាប។ នេះជារូបភាពដ៏មានអត្ថន័យបំផុត ក្នុងការចូលរួមជួយសង្គម ក៏ដូចជាជីវិតមនុស្សដែលត្រូវការឈាមបន្ទាន់។

លោក ឡាយ គឹមសួរ ប្រធានសមាគមសហគ្រិនវ័យក្មេងខេត្តសៀមរាប បានឱ្យដឹងថា នេះជាឆ្នាំទី៣ហើយដែលសមាគមរបស់លោកបានរៀបចំកម្មវិធីនេះឡើង ដើម្បីបំផុសឱ្យយុវជនចូលរួមបរិច្ចាគឈាម។ លោកបន្តថា ការចូលរួមបរិច្ចាគរយៈពេលត្រឹម២ថ្ងៃក្នុងកម្មវិធីនេះ មិនមានបរិមាណច្រើនដូចទៅនឹងតម្រូវការក៏ពិតមែន តែវាជារូបភាពមួយបណ្ដុះគំនិតឱ្យយុវជនចេះជួយគ្នា បរិច្ចាគឈាម ជួយជីវិតមនុស្ស និងចេះស្រឡាញ់សង្គម។ តាមការបញ្ជាក់ពីប្រធានសមាគមសហគ្រិនវ័យក្មេងខេត្តសៀមរាប អ្នកចូលរួមក្នុងកម្មវិធីបរិច្ចាគឈាមមានការកើនឡើងជារៀងរាល់ឆ្នាំ ហើយឆ្នាំនេះរំពឹងថានឹងទទួលអ្នកបរិច្ចាគច្រើនជាងឆ្នាំទៅដែលមានចំនួនជាង៣០០នាក់។

ឱសថការី ឆាយ គឹមឈន ប្រធានមជ្ឈមណ្ឌលផ្តល់ឈាមនៃមន្ទីរពេទ្យបង្អែកខេត្តសៀមរាប បាននិយាយថា នៅឆ្នាំ២០១៩នេះ តម្រូវការឈាមក្នុងមន្ទីរពេទ្យមានការកើនឡើងខ្ពស់ ដែលជាប្រចាំខែតម្រូវការឈាមមានចន្លោះពី៤៥០ទៅ៥០០ប្លោក ហើយប្រធានជំងឺដែលត្រូវការទាន់ពេលវេលានោះរួមមាន អ្នកជំងឺគ្រោះថ្នាក់ចរាចរណ៍ ស្ដ្រីឆ្លងទន្លេ ជំងឺហូរឈាមក្អួតធ្លាក់ឈាម និងជំងឺវះកាត់។ល។ តម្រូវការនេះ គឺរាប់បញ្ចូលទាំងអ្នកជំងឺដែលបញ្ជូនមកពីបណ្ដាខេត្តនៅជុំវិញសៀមរាបផងដែរ។ ជាមួយនឹងកម្មវិធីបរិច្ចាគឈាមរបស់ក្រុមយុវជននៅពេលនេះដែរ ប្រធានមជ្ឈមណ្ឌលផ្តល់ឈាមបានកោតសរសើរនិងថានេះជារូបភាពដ៏ល្អសម្រាប់ការងារជួយសង្គមមួយផ្នែកដែលយុវជនបានធ្វើ។

មានវត្តមានក្នុងកម្មវិធីបរិច្ចាគឈាមនោះដែរ អភិបាលរងខេត្តសៀមរាប លោក ពិន ប្រាកដ ថានេះជារូបភាពបង្ហាញពីសាមគ្គីភាព និងជាចំណែកយ៉ាងសំខាន់ក្នុងការជួយសង្គ្រោះជីវិតជនរងគ្រោះដែលកំពុងសម្រាកព្យាបាលក្នុងមន្ទីរពេទ្យ និងបានបង្ហាញពីសកម្មភាពមនស្សធម៌ដ៏ល្អសម្រាប់សង្គមជាតិ។ លោកអភិបាលរងបានលើកទឹកចិត្តឱ្យប្រជាពលរដ្ឋទាំងអស់ចូលរួមបរិច្ចាគឈាម ដែលវាជាកាយវិការប្រកបដោយមនុស្សធម៌ដ៏មានតម្លៃសម្រាប់ពលរដ្ឋគ្រប់រូប។

គួរបញ្ជាក់ថា ព្រឹត្តិការណ៍បរិច្ចាគឈាមរយៈពេលពេញ២ថ្ងៃនេះ ទទួលបានអ្នកបរិច្ចាគចំនួន ៤៦៣នាក់ ឬស្មើនឹង ៤៦៣ប្លោកឈាម៕