មេដឹកនាំហុងកុងប្រកាសសុំទោស ខណៈបាតុករទាមទារឲ្យចុះចេញពីតំណែង

អន្តរជាតិ

មេដឹកនាំហុងកុងប្រកាសសុំទោស ខណៈបាតុករទាមទារឲ្យចុះចេញពីតំណែង

17, Jun 2019 , 10:09 am

រូបភាព

ប្រមុខរដ្ឋាភិបាលតំបន់ស្វយ័តហុងកុង Carrie Lam ប្រកាសសុំទោស។ រូបភាព AFP

ដោយ: តន ចាន់រិទ្ធារ៉ា

សេចក្ដីស្នើច្បាប់របស់ហុងកុងដែលបើកផ្លូវដល់ការធ្វើបត្យាប័នជាមួយចិន ធ្វើឲ្យរំជើបរំជួលទីក្រុងហិរញ្ញវត្ថុនេះយ៉ាងខ្លាំង។ រលកនៃការតវ៉ាផ្ទួនៗ បានបង្ខំឲ្យរដ្ឋាភិបាលហុងកុងប្រកាសព្យួរសេចក្ដីស្នើច្បាប់ចម្រូងចម្រាសនេះ។ ប៉ុន្តែក្រុមបាតុករមិនមែនទាមទារត្រឹមនេះឡើយ គឺពួកគេចង់ឲ្យលុបចោលតែម្ដង ហើយលោកស្រី Carrie Lam ប្រមុខតំបន់ស្វយ័តហុងកុង ត្រូវតែចុះចេញពីតំណែង។ នៅថ្ងៃទី១៦ ខែមិថុនា លោកស្រី Lam បានសុំទោសចំពោះរឿងរ៉ាវដែលកើតឡើង។

ពលរដ្ឋហុងកុងប្រមាណពីរលាននាក់ នៅថ្ងៃទី១៦ ខែមិថុនាបានប្រមូលផ្ដុំគ្នាតាមដងផ្លូវក្នុងមហាបាតុកម្មប្រឆាំងសេចក្ដីស្នើច្បាប់ធ្វើបត្យាប័នជាមួយចិន និងដាក់សម្ពាធកាន់តែខ្លាំងលើនាយកប្រតិបត្តិតំបន់រដ្ឋបាលស្វយ័តហុងកុង Carrie Lam ដែលប្រកាសផ្អាកសេចក្ដីស្នើច្បាប់នេះសិន។ ប៉ុន្តែចំនួនបាតុករនេះ មិនមានការរាប់ឲ្យបានច្បាស់លាស់នៅឡើយទេ តែបើជាការពិតដូចអ្នករៀបចំអះអាង វាជាបាតុកម្មធំបំផុតក្នុងប្រវត្តិសាស្ត្រហុងកុង។

បាតុកម្មថ្ងៃទី១៦ ខែមិថុនា ជាការប្រមូលផ្ដុំធំបំផុតទីពីរក្នុងរយៈពេលជាងមួយសប្ដាហ៍មកនេះ ខណៈពលរដ្ឋហុងកុងគ្រប់មជ្ឈដ្ឋាន បង្ហាញការមិនពេញចិត្តការព្យាយាមរបស់រដ្ឋាភិបាលោកស្រី Lam ដែលចង់អនុម័តសេចក្ដីស្នើច្បាប់បត្យាប័នឲ្យបានលឿននោះ។ តាមពិតទៅ សេចក្ដីច្បាប់នេះ ជាគម្រោងធ្វើវិសោធនកម្មច្បាប់ដើម្បីធ្វើបត្យាប័នរវាងទីក្រុងហុងកុង និងប្រទេស ឬតំបន់ដទៃដែលមិនទាន់កិច្ចព្រមព្រៀងផ្លាស់ប្ដូរជនសង្ស័យ ដែលវាក៏រាប់បញ្ចូលចិនផង។

អត្ថបទទាក់ទង

ហុងកុង ប្រកាសព្យួរសំណើច្បាប់ធ្វើបត្យាប័នដ៏ចម្រូងចម្រាស ក្រោយបាតុកម្មផ្ទួនៗ

អតីតម្ចាស់អាណានិគមអង់គ្លេស ស្នើឲ្យរដ្ឋាភិបាលហុងកុងស្តាប់កង្វល់ពលរដ្ឋ

តៃវ៉ាន់ ប្រកាសគាំទ្របាតុករហុងកុងដែលប្រឆាំងសំណើច្បាប់ធ្វើបត្យាប័នជាមួយចិន

ពលរដ្ឋហុងកុង ប្រមូលផ្ដុំតវ៉ាជាថ្មី ខណៈរដ្ឋាភិបាលមិនចុះញ៉មរឿងច្បាប់បត្យាប័នជាមួយចិន

ពលរដ្ឋហុងកុងជាងមួយលាននាក់ ធ្វើបាតុកម្មប្រឆាំងសំណើច្បាប់ធ្វើបត្យាប័នជាមួយចិន

ជាមួយនឹងការតវ៉ាជាបន្តបន្ទាប់ លោកស្រី Lam នៅថ្ងៃទី១៥ ខែមិថុនា បានប្រកាសផ្អាកសេចក្ដីស្នើនេះ ប៉ុន្តែមិនបានគ្រវែងចោលទាំងស្រុងតាមការទាមទាររបស់បាតុករឡើយ។ ការប្រកាសរបស់លោកស្រី Lam មានគោលដៅបន្ធូរបន្ថយស្ថានការដែលតានតឹង ដ្បិតក្រុមបាតុករមានគម្រោងតវ៉ាទ្រង់ទ្រាយនៅថ្ងៃបន្ទាប់។ យ៉ាងណាមិញ ការផ្អាកនេះ មិនធ្វើឲ្យបាតុករសប្បាយចិត្តឡើយ ហើយការតវ៉ាបិទផ្លូវក៏ធ្វើឡើងជាថ្មី ដោយបាតុករនាំពាក់អាវខ្មៅ ហើយទាមទារឲ្យលោកស្រី Lam ចុះចេញផង។

ការតវ៉ាដែលធ្វើញាប់ញ័រទីក្រុងមានប្រជាជនប្រមាណ៧លាននាក់នេះ ធ្វើឲ្យរដ្ឋាភិបាលហុងកុងប្រកាសសុំទោសជាសាធារណៈ។ ក្នុងសេចក្ដីប្រកាសរបស់រដ្ឋាភិបាលហុងកុងនៅយប់ថ្ងៃទី១៦ ខែមិថុនា លោកស្រីប្រធានប្រតិបត្តិហុងកុងបានសារភាពពីកម្សោយរបស់រដ្ឋាភិបាលដែលនាំឲ្យមានរឿងចម្រូងចម្រាស និងជម្លោះក្នុងសង្គម បង្កការមិនពេញចិត្ត ក៏ដូចជាការខូចខាតក្នុងចំណោមប្រជាជនផងដែរ។ លោកស្រី Lam បានសុំទោសចំពោះបញ្ហាទាំងនេះ។

ប្រមុខតំបន់រដ្ឋបាលពិសេសរូបនេះ ក៏សន្យាប្រកាន់យកឥរិយាបថស្មោះត្រង់ ហើយដាក់ខ្លួនទទួលយកពាក្យរិះគន់ និងបម្រើប្រជាជនឲ្យកាន់ប្រសើរឡើង។ យ៉ាងណាក្ដី លោកស្រី Lam មិនបាននិយាយដល់រឿងចុះចេញពីតំណែងតាមការទាមទាររបស់បាតុករឡើយ។

ក្រៅពីការទាមទារឲ្យដកចេញទាំងស្រុងសេចក្ដីស្នើច្បាប់ធ្វើបត្យាប័ន និងទទូចឲ្យលោកស្រី Lam លាលែងនោះ បាតុករ ក៏ស្នើឲ្យវែកមុខអ្នកនៅពីក្រោយការបង្ក្រាបរបស់ប៉ូលិសអំឡុងពេលតវ៉ាលើកមុនដែរ។ មនុស្សប្រមាណ៨០នាក់ បានរងរបួសក្នុងការបំបែកក្បួនតវ៉ារបស់បាតុករដែលបានចោមរោមអាគារសភាហុងកុង។ ក្រុមបាតុករអះអាងថា ប៉ូលិសហាក់លេងខ្លាំងដៃពេកក្នុងការតទល់ជាមួយបាតុករ។ យ៉ាងណា ក្នុងការតវ៉ាចុងសប្ដាហ៍មុន ប៉ូលិសហុងកុងបានព្យាយាមរក្សាការអត់ធ្មត់ខ្លាំង សំដៅបញ្ចៀសការប៉ះទង្គិច៕