ភ្នំពេញ៖ ថ្លែងពីប្រទេសបារាំង លោក សម រង្ស៊ី មេដឹកនាំអតីតគណបក្សសង្គ្រោះជាតិ បង្ហាញជំហរមិនខ្លាចការគំរាមរបស់សម្ដេចនាយករដ្ឋមន្ត្រី ហ៊ុន សែន ដែលគ្រោងប្ដឹងលោក ទៅតុលាការបារាំង ជុំវិញករណីស្លាប់របស់លោក ហុក ឡង់ឌី អតីតអគ្គស្នងការនគរបាលជាតិឡើយ។ មិនតែប៉ុណ្ណោះលោក សម រង្ស៊ី ថែមទាំងចំអកវិញថា បើមេដឹកនាំរដ្ឋាភិបាលកម្ពុជា ហ៊ានប្ដឹងលោកមែននោះ ប្រាកដជាចាញ់ក្តី ព្រោះលោកមានឯកសារគ្រប់គ្រាន់សម្រាប់យកឈ្នះរឿងក្តីនេះ។
«ខ្ញុំបានទទួលព័ត៌មានពីមជ្ឈដ្ឋានជិតស្និទលោក ហ៊ុន សែន បានឲ្យខ្ញុំដឹងថា ទីបញ្ចប់លោក ហ៊ុន សែន អត់ហ៊ានប្ដឹងខ្ញុំទេ ពីព្រោះគាត់ដឹងថា បើហ៊ានមកប្ដឹងខ្ញុំ នៅចំពោះមុខតុលាការប្រទេសបារាំង គឺគាត់ច្បាស់ជាចាញ់»។ នេះជាការលើកឡើងរបស់លោក សម រង្ស៊ី ដែលបានបន្ថែមថា លោកមានឯកសារ និងភស្តុតាងគ្រប់គ្រាន់ដែលបង្ហាញពីបំណងទុច្ចរិតរបស់សម្ដេច ហ៊ុន សែន និងភរិយា នៅក្នុងសំណុំរឿងនៃការស្លាប់របស់លោក ហុក ឡង់ឌី។ តាមរយៈភស្តុតាងនៅក្នុងដៃខ្លួនទាំងនេះលោក សម រង្ស៊ី ដែលមានជំនឿចិត្តលើការកាត់ក្តីរបស់តុលាការបារាំងនោះ បានអះអាងថា លោកអាចយកឈ្នះក្តីលោកនាយករដ្ឋមន្ត្រី ហ៊ុន សែន បើសិនជាហ៊ានប្ដឹងលោកមែន។
អះអាងបែបនេះហើយលោក សម រង្ស៊ី ដែលកំពុងជាប់បណ្ដឹង និងទោសជាច្រើន តាមរយៈការប្ដឹងពីរដ្ឋាភិបាលកម្ពុជា និងបុគ្គលផ្សេងទៀតនោះ បានពន្យុះឲ្យមេបក្សកាន់អំណាចនៅកម្ពុជា ប្ដឹងលោកឲ្យកាន់តែឆាប់ទៀតផង។ ត្រង់ចំណុចនេះលោក សម រង្ស៊ី បាននិយាយបែបឌឺដងវិញថា បើសិនជាសម្ដេច ហ៊ុន សែន មិនហ៊ានប្ដឹងលោកទេនោះ បានន័យថា មេដឹកនាំកម្ពុជារូបនេះ ទទួលស្គាល់ការពិតនៃបំណងសម្លាប់លោក ហុក ឡង់ឌី ពិតប្រាកដមែន។
មេដឹកនាំអតីតគណបក្សសង្គ្រោះជាតិ ដែលកំពុងរស់នៅប្រទេសបារាំងនោះ បានថ្លែងតាមរយៈវីដេអូឃ្លីប ១០នាទី យ៉ាងដូច្នេះថា៖«ខ្ញុំបញ្ជាក់ម្ដងទៀត បើលោក ហ៊ុន សែន សឿងត្រូវតែប្ដឹងខ្ញុំដាច់ខាត បើមិនដូច្នេះទេ (បានន័យថា)គឺលោក ហ៊ុន សែន សារភាពថា គាត់ជាឃាតករពិតប្រាកដ។ កាយវិការរបស់គាត់ ដែលថាម្ដងប្ដឹង តែបែជាមិនហ៊ានប្ដឹងខ្ញុំវិញ មានន័យថា លោក ហ៊ុន សែន សារភាពកំហុសថា គាត់បានសម្លាប់លោក ហុក ឡង់ឌី យ៉ាងពិតប្រាកដ។ ហើយការសម្លាប់នេះ គឺគាត់បានដាក់គ្រាប់បែកលើឧទ្ធម្ភាគចក្រ ដែលលោក ហុក ឡង់ឌី ត្រូវជិះនៅថ្ងៃទី៩ វិច្ឆិកា ឆ្នាំ២០០៨»។
លោក គី តិច មេធាវីការពារក្តីឲ្យសម្ដេច ហ៊ុន សែន បាននិយាយថា នៅពេលនេះលោក និងមេធាវីផ្សេងទៀត កំពុងសិក្សាផ្នែកច្បាប់ ក្នុងការប្រមូលភស្តុតាង ដើម្បីប្ដឹងលោក សម រង្ស៊ី ទៅតុលាការបារាំង។ ថ្លែងប្រាប់សារព័ត៌មានថ្មីៗ លោក គី តិច បានបកស្រាយយ៉ាងដូច្នេះថា៖«ខ្ញុំមិនទាន់ឆ្លើយតប(លោក សម រង្ស៊ី) ឥឡូវបានទេ ព្រោះខ្ញុំកំពុងសិក្សាផ្លូវច្បាប់។ ហើយលោក សម រង្ស៊ី តែងតែចេញវិដេអូឃ្លីបពីរ ទៅបីដងហើយ ប៉ុន្តែខាងយើងមិនតបតអ្វីទេ។ ក៏ប៉ុន្តែពាក់ព័ន្ធនឹងការប្ដឹង ឬមិនប្ដឹង ខ្ញុំរក្សាសិទ្ធិបន្តិចសិន ព្រោះខ្ញុំកំពុងសិក្សា ហើយនៅពេលសម្រេចចិត្តថាយ៉ាងណា ខ្ញុំនឹងជូនដំណឹងទៅឲ្យសារព័ត៌មានជាសាធារណៈ»។
ក្រៅពីសម្ដេច ហ៊ុន សែន គ្រោងប្ដឹងលោក សម រង្ស៊ី ពាក់ព័ន្ធនឹងករណីចោទប្រកាន់សម្ដេច នៅពីក្រោយការស្លាប់របស់លោក ហុក ឡង់ឌី អតីតអគ្គស្នងការនគរបាលជាតិនោះ ក៏មានសម្ដេច ស ខេង រដ្ឋមន្ត្រីក្រសួងមហាផ្ទៃ គ្រោងប្ដឹងលោក សម រង្ស៊ី ដែរ។ សម្ដេច ស ខេង នឹងប្ដឹងជុំវិញករណីដែលមេដឹកនាំអតីតគណបក្សប្រឆាំងរូបនេះ និយាយថា សម្ដេចមានគម្រោងផ្ដួលរំលំរដ្ឋាភិបាល និងធ្វើបក្សប្រហារទម្លាក់សម្ដេចនាយករដ្ឋមន្ត្រី ហ៊ុន សែន ចេញពីប្រធានបក្ស។
ចំណែកកូនប្រុសលោក ហុក ឡង់ឌី គឺលោក ឌី វិជ្ជា អគ្គស្នងការរងនគរបាលជាតិ ឯណោះវិញ ក៏មិនពេញចិត្តចំពោះការលើកឡើងរបស់លោក សម រង្ស៊ី ដែរ។ លោក ឌី វិជ្ជា ដែលត្រូវជាកូនប្រសាររបស់នាយករដ្ឋមន្ត្រីកម្ពុជារូបនេះ បានស្នើឲ្យមេធាវីសិក្សាពីផ្លូវច្បាប់ ដើម្បីប្តឹងលោក សម រង្ស៊ី ដែលចោទសម្តេច ហ៊ុន សែន ថា ជាអ្នកសម្លាប់ឪពុកខ្លួន ។ សម្រាប់លោក ឌី វិជ្ជា ការលើកឡើងរបស់លោក សម រង្ស៊ី គឺជាការប្រឌិតព័ត៌មាន ដែលធ្វើឲ្យមតិជាតិនិងអន្តរជាតិភាន់ច្រឡំ មកលើរដ្ឋាភិបាល។
ម្ដងជាពីរដង លោក សម រង្ស៊ី តែងតែនិយាយចំៗថា សម្ដេច ហ៊ុន សែន ជាអ្នកសម្លាប់លោក ហុក ឡង់ឌី តាមរយៈការដាក់គ្រាប់បែកឲ្យផ្ទុះក្នុងឧទ្ធម្ភាគចក្រ (Helicopter) នៅពេលដែលកំពុងតែហោះហើរលើខេត្តស្វាយរៀង កាលពីថ្ងៃទី ០៩ ខែវិច្ឆិកា ឆ្នាំ ២០០៨។ លោក សម រង្ស៊ី ថែមទាំងអះអាងថា សម្ដេច ហ៊ុន សែន បានសម្រេចចិត្តសម្លាប់លោក ហុក ឡង់ឌី ដោយសារតែអតីតស្នងការនគរបាលជាតិរូបនេះ បានដឹងរឿងអាក្រក់របស់សម្ដេច ហ៊ុន សែន ច្រើនពេក។ ជាពិសេសកាលណោះលោក ហុក ឡង់ឌី ត្រៀមលាតត្រដាងអំពីបញ្ជា ដែលគាត់បានទទួលពីសម្ដេច ហ៊ុន សែន ឲ្យសម្លាប់លោក ជា វិជ្ជា អតីតមេដឹកនាំសហជីពដ៏ខ្លាំងក្លាមួយរូប កាលពីឆ្នាំ ២០០៤ជាដើម៕